شەتەلگە ساياحاتقا شىققاندا نەنى ەستە ۇستاعان ءجون

پەتروپاۆل. KAZINFORM - شەتەلگە ساياحاتىڭىز جاقسى ەستەلىكتەرمەن جادىڭىزدا ساقتالسىن دەسەڭىز، قاراپايىم ەرەجەلەردى ۇمىتپاڭىز.

جاز مەزگىلى - ساياحات پەن دەمالىستىڭ ۋاقىتى. بۇل كەزەڭدە كوپتەگەن ازامات شەتەلگە تۋريستىك ساپارعا اتتانادى. الايدا، باسقا مەملەكەتكە جولعا شىققاندا دەنساۋلىققا قاتىستى قاۋىپتەر دە ارتا تۇسەتىنىن ەستەن شىعارماعان ءجون. اسىرەسە، تروپيكالىق ايماقتاردا كەزدەسەتىن جۇقپالى اۋرۋلاردىڭ تارالۋ قاۋپى جوعارى.

سولتۇستىك قازاقستان وبلىسىنىڭ سانيتاريالىق- ەپيدەميولوگيالىق باقىلاۋ دەپارتامەنتى اسا ءقاۋىپتى ينفەكتسيالاردى جانە تۋبەركۋلەزدى ەپيدەميولوگيالىق قاداعالاۋ ءبولىمىنىڭ باس مامانى تولقىن قاجەنوۆا ماڭىزدى جادىناما تۋرالى ايتتى.

- قازىرگى ۋاقىتتا ىلعالدى كليماتقا جانە تروپيكالىق اۋرۋلاردىڭ جوعارى كونسەنتراتسياسىنا بايلانىستى افريكا، وڭتۇستىك امەريكا، وڭتۇستىك- شىعىس ازيا قاۋىپتى ەلدەردىڭ قاتارىندا. بۇل ەلدەردە بەزگەك، تىرىسقاق، دەنگە قىزباسى سياقتى ءقاۋىپتى ينفەكتسيالار تەز جۇعادى. بۇل جۇقپالى اۋرۋلار قازاقستانعا ءتان ەمەس بولعانىمەن، شەتەلدەن اكەلىنۋ قاۋپى بار. اۋىرعان جاعدايدا اۋىر ءوتىپ، ەمدەۋدە قيىندىقتار تۋىنداۋى مۇمكىن. سوندىقتان ساپارعا شىقپاس بۇرىن مىندەتتى تۇردە بارار ەلدىڭ ەپيدەميولوگيالىق جاعدايىمەن تانىسىپ، دارىگەردەن الدىن الا پروفيلاكتيكالىق كەڭەس الۋ قاجەت. جۇقتىرۋدىڭ نەگىزگى جولدارىنا لاستانعان سۋ مەن تاعام، ماسالاردىڭ شاعۋى، ناۋقاس ادامدارمەن تىكەلەي بايلانىس جانە جىنىستىق جول جاتادى. مىسالى، تىرىسقاقتان ساقتانۋ ءۇشىن تەك بوتەلكەدەگى نەمەسە قايناتىلعان سۋ ءىشۋ، كوكونىستەر مەن جەمىستەردى مۇقيات جۋىپ، قايناعان سۋمەن شايىپ پايدالانۋ، قولدى ءجيى سابىنمەن جۋۋ - باستى تالاپتاردىڭ ءبىرى»، - دەيدى دەپارتامەنتتىڭ اسا قاۋىپتى ينفەكسيالاردى جانە تۋبەركۋلەزدى ەپيدەميولوگيالىق قاداعالاۋ ءبولىمىنىڭ باس مامانى تولقىن قاجەنوۆا.

ماماننىڭ ايتۋىنشا، افريكا، ازيا، لاتىن امەريكاسى سياقتى ەلدەرگە ساياحاتتاپ بارعاندا بەزگەك پەن دەنگە سەكىلدى ماسا ارقىلى تارالاتىن اۋرۋلار بار. ولاردان قورعانۋ ءۇشىن جابىق كيىم كيىپ، تەرىنى جاندىكتەردەن قورعايتىن رەپەللەنتتەر جاعۋ، موسكيت تورلارىن پايدالانۋ، سونداي-اق فۋميگاتورلار مەن ارنايى اەروزولدەردى قولدانۋ قاجەت. اۋرۋ بەلگىلەرى بايقالعان جاعدايدا، ءوز بەتىنشە ەمدەلۋگە بولمايدى - دەرەۋ دارىگەرگە قارالعان ءجون.

- سونىمەن قاتار، جولعا شىعار الدىندا جەكە قورعانىس قۇرالدارى مەن دارىلىك قوبديشانى دايىنداپ الۋ ماڭىزدى. جاۋاپكەرشىلىكپەن قاراساڭىز، دەمالىسىڭىز تەك جاعىمدى اسەرمەن عانا ەمەس، دەنساۋلىعىڭىزدى نىعايتۋمەن دە ەستە قالادى، - دەيدى سانيتار دارىگەر.