شەتەل ازاماتىن قورقىتىپ، جالدامالى پاتەردە ۇستاعان قىلمىستىق توپ ۇستالدى
الماتى. KAZINFORM - ىشكى ىستەر مينيسترلىگى بوپسالاۋ جانە باسقا دا اۋىر قىلمىستاردى جاسايتىن قىلمىستىق توپتاردىڭ ارەكەتىنىڭ الدىن الۋ، انىقتاۋ جانە جولىن كەسۋ بويىنشا ءىس-شارالاردى جۇزەگە اسىرۋدى جالعاستىرىپ جاتىر، - دەپ جازدى Polisia.kz.
3-ماۋسىمدا الماتى قالاسى پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى ۇلتتىق قاۋىپسىزدىك كوميتەتى جانە پروكۋراتۋرا وكىلدەرىمەن بىرلەسىپ، ءبىرقاتار اۋىر قىلمىس جاسادى دەگەن كۇدىككە ىلىنگەن ادامدار توبىن ۇستادى.
- ولاردىڭ ءبىر ەپيزودىندا كۇدىكتىلەر شەتەل ازاماتىنا كۇش قولدانىپ، قورقىتۋ ارقىلى ونى جالدامالى پاتەردە زاڭسىز ۇستاعانى جانە قىسىم كورسەتۋ ارقىلى بەس ميلليون تەڭگە كولەمىندەگى قاراجاتىن تارتىپ العانى انىقتالدى. سونداي-اق زاڭسىز قارۋ ساقتاۋ جانە قۇقىققا قايشى جانجالدارعا قاتىسۋ فاكتىلەرى تىركەلدى. ءتىنتۋ جۇرگىزىلىپ، ناتيجەسىندە جەتى تاپانشا، وق- دارىلەر، سۋىق قارۋلار مەن ەسىرتكى زاتتارى تاركىلەندى. انىقتالعان بارلىق فاكتى بويىنشا قىلمىستىق ءىس قوزعالدى. بارلىق كۇدىكتى ۋاقىتشا ۇستاۋ يزولياتورىنا قامالىپ، زاڭعا سايكەس قاتاڭ جاۋاپكەرشىلىككە تارتىلادى، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
ءى ءى م ەلدەگى، ونىڭ ىشىندە ءىرى مەگاپوليستەردەگى جەدەل احۋال قۇقىق قورعاۋ ورگاندارىنىڭ تۇراقتى باقىلاۋىندا ەكەنىن اتاپ ءوتتى.
