شەرزاتتىڭ اپكەسى باقىت رەيموۆانى ەلدەن شىعارۋ شەشىمىنىڭ زاڭسىزدىعىنا دالەلدەر جەتكىلىكتى - دەپۋتات
تالعارداعى جانجال كەزىندە قازا تاپقان جاس ءوسپىرىم شەرزات بولاتتىڭ اپكەسى باقىت رەيموۆا «ميتينگكە ۇندەگەنى ءۇشىن» دەگەن ايىپ تاعىلىپ، 15 تاۋلىككە جابىلعان ەدى. سونىمەن قاتار رەيموۆانى سوت قازاقستاننان دەپورتاتسيالاۋ جونىندە شەشىم شىعارعان.
وسى رەتتە ءماجىلىس دەپۋتاتى قازىبەك يسا ەلىمىزدىڭ باس پروكۋرورى بەرىك اسىلوۆقا دەپۋتاتتىق ساۋال جولدادى، دەپ حابارلايدى Qaz365.kz.
الماتى وبلىسى ەڭبەكشىقازاق اۋداندىق سوتىنىڭ 2024 -جىلعى 11-جەلتوقسانداعى قاۋلىسى بويىنشا ازاماتشا باقىت رەيموۆا قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ (ا ق ب ت ك) 488-بابىنىڭ 8-بولىگىنە سايكەس كىنالى دەپ تانىلدى. وعان 15 تاۋلىك اكىمشىلىك قاماۋعا الۋ جانە قازاقستان رەسپۋبليكاسىنىڭ شەگىنەن اكىمشىلىك جولمەن شىعارۋ جازاسى تاعايىندالعان ەكەن. الايدا، بۇل شەشىمنىڭ زاڭدىلىعى مەن ادىلدىگىنە كۇمان كەلتىرەتىن تومەندەگى فاكتىلەردى نازارلارىڭىزعا ۇسىنامىن، - دەيدى دەپۋتات.
قازىبەك يسا وسى رەتتە بىرنەشە مىسال كەلتىردى:
1. سوت شەشىمىنىڭ نەگىزسىزدىگى جانە دالەلدەمەلەردىڭ جەتكىلىكسىزدىگى.
سوت قاۋلىسى بويىنشا، ب. رەيموۆا 2024 -جىلعى 10-جەلتوقساندا ازات اۋىلىندا بەيبىت جينالىستاردى وتكىزۋ ءتارتىبىن بۇزعانى ءۇشىن كىنالى دەپ تانىلعان. الايدا ب. رەيموۆا سوت وتىرىسىندا بۇل جينالىسقا قاتىسپاعانىن، تەك تۋىسىنىڭ جانازاسىندا بولعانىن، كەزدەيسوق جول جابىلعان كەزدە، قوعامدىق ءتارتىپتى ساقتاۋ ءۇشىن جاقىندارىن سابىرعا شاقىرعانىن مالىمدەگەن.
ا ق ب ت ك-نىڭ 765-بابىنىڭ 5-بولىگىنە سايكەس، زاڭسىز الىنعان دالەلدەمەلەر زاڭدى كۇشى جوق دەپ تانىلادى. بۇل رەتتە، اكىمشىلىك قۇقىق بۇزۋشىلىق تۋرالى حاتتامادا ب. رەيموۆانىڭ كىناسىن ناقتى دالەلدەيتىن ايعاقتار ۇسىنىلماعان.
2. كىنانى مويىنداۋعا ماجبۇرلەۋ فاكتىسى.
سوت بارىسىندا ب. رەيموۆا قۇقىق بۇزۋشىلىقتى مويىنداماعانىمەن، بىرنەشە رەت قىسىم كورسەتۋ ناتيجەسىندە «كەلىسەمىن» دەپ جاۋاپ بەرۋگە ءماجبۇر بولعان. بۇل ونىڭ قورعانۋعا كونستيتۋتسيالىق قۇقىعىنىڭ بۇزىلعانىن كورسەتەدى.
3. جازانىڭ ادىلەتسىزدىگى.
ب. رەيموۆا جالعىزباستى انا، 17 جاستاعى كامەلەتكە تولماعان ۇلىنىڭ اسىراۋشىسى. سونىمەن قاتار، ول ەتنيكالىق قازاق، «قانداس» مارتەبەسىنە يە، تاريحي وتانى قازاقستاندا تۇراقتى تۇرىپ جاتقان تۇلعا. ەلدەن شىعارۋ جازاسى ونىڭ ءومىر ءسۇرۋ قۇقىعىن بۇزىپ قانا قويماي، قازاقستان رەسپۋبليكاسىنىڭ كوشى-قون ساياساتىنا قايشى كەلەدى.
4. بالانىڭ قۇقىقتارىنىڭ بۇزىلۋى.
ەگەر ب. رەيموۆا ەلدەن شىعارىلسا، ونىڭ كامەلەتكە تولماعان ۇلى اتا-انا قامقورلىعىنسىز قالادى. بۇل قازاقستان رەسپۋبليكاسىنىڭ «نەكە (ەرلى-زايىپتىلىق) جانە وتباسى تۋرالى» كودەكسىنىڭ نورمالارى مەن بالا قۇقىقتارى تۋرالى كونۆەنسيانىڭ (8، 9، 10 جانە 18-باپتارى) تالاپتارىن بۇزادى.
5. حالىقارالىق نورمالارعا قايشىلىق.
قازاقستان كونستيتۋتسياسىنا سايكەس، حالىقارالىق شارتتار ۇلتتىق زاڭداردان باسىمدىققا يە. بۇل رەتتە، سوت شەشىمى حالىقارالىق نورمالاردى ورەسكەل بۇزىپ، ب. رەيموۆانىڭ جانە ونىڭ وتباسىنىڭ نەگىزگى قۇقىقتارىن شەكتەيدى.
قۇرمەتتى باس پروكۋرور مىرزا! وسى ايتىلعان جايتتاردى نازارعا الا وتىرىپ، الماتى وبلىسى ەڭبەكشىقازاق اۋداندىق سوتىنىڭ 2024 -جىلعى 11-جەلتوقسانداعى ب. رەيموۆامەن بايلانىستى قاۋلىسىنا نارازىلىق ەنگىزىپ، اتالعان اكىمشىلىك ءىستى قايتا قاراۋ بويىنشا ءتيىستى شارالار قابىلداۋىڭىزدى سۇرايمىز. ءسىزدىڭ وسى ماسەلەنى ءادىل شەشۋ ءۇشىن بارلىق قاجەتتى شارالاردى قابىلدايتىنىڭىزعا سەنەمىن، - دەدى قازىبەك يسا.
