شەرزات پولاتتىڭ ءىسى: پروكۋرور كۋاگەردىڭ جاۋابىنا كۇمان كەلتىردى
تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى كەزەكتى سوت وتىرىسى ءوتىپ جاتىر. پروكۋرور دانا سارسەنباي وقيعا ورنىندا بولعان كۋاگەر ەلميرا نۇربەكوۆانىڭ جاۋاپتارىندا قايشىلىقتار بار ەكەنىن ايتتى.
مەملەكەتتىك ايىپتاۋشى، كۋاگەر ەلميرا نۇربەكوۆانىڭ تەرگەۋ بارىسىندا بەرگەن جاۋاپتارى مەن سوتتا ايتقان سوزدەرى ءبىر-بىرىنە سايكەس كەلمەيتىنىن جەتكىزدى.
- الدىن الا تەرگەۋ بارىسىندا جانە وتكەن سوت وتىرىسىندا ءسىز شوك كۇيىندە بولعاندىقتان قاتەلەسۋىڭىز مۇمكىن ەكەنىن ايتتىڭىز. الايدا بەينەجازبادا سىزدە شوك كۇيى بايقالمايدى.
سونداي- اق 5- قازان كۇنى بەرگەن جاۋابىڭىزدا بالانىڭ جەردە ىشپەن، قان بولىپ جاتقانىن جانە ابزالدىڭ وعان پىشاقپەن سوققى جاساعانىن ايتتىڭىز. ال قازىر سوتتا پىشاقتى كورمەگەنىڭىزدى ايتىپ وتىرسىز، - دەپ سۇرادى پروكۋرور.
ءوز كەزەگىندە ەلميرا نۇربەكوۆا تەرگەۋ كەزىندە جاۋاپتى ەكى تىلدە، ورىسشا جانە قازاقشا ارالاستىرىپ بەرگەنىن جانە كوپ نارسە ەسىندە جوق ەكەنىن ايتتى.
- شىنىمدى ايتسام، نە دەگەنىمدى بىلمەيمىن. مەن ونىڭ قالاي ۇرعانىن كوردىم، ءبىراق پىشاقتىڭ بار-جوعىن كورمەدىم. ەگەر مەن پىشاق كورگەن بولسام، وندا بار دەپ ايتار ەدىم، - دەيدى ول.
پروكۋروردىڭ ءوتىنىشى بويىنشا نۇربەكوۆا سوت زالىندا ايىپتالۋشىنىڭ سوققىنى قالاي جاساعانىن كورسەتتى - «جوعارىدان تومەن» قاراي.
جابىرلەنۋشى تاراپتىڭ ادۆوكاتى ە. نۇربەكوۆادان وقيعادان كەيىن نەلىكتەن قىلمىس تۋرالى حابارلاماعانىن سۇرادى.
- مەن بىلمەدىم عوي. ەشتەڭە ىستەي المادىم. سول ساتتە مەن ءوزىم قورقىپ تۇردىم، - دەدى كۋاگەر.
سوت وتىرىسى بارىسىندا پروكۋرور وقيعادان كەيىن «777» دۇكەنىنە كىرگەن كەزدە نەلىكتەن زاڭ وكىلدەرىنە حابارلاسپاعانىن كۋاگەردەن تاعى سۇرادى.
- سول ساتتە مەن قورىقتىم. دانامەن تالعارعا جەتكەننەن كەيىن بىردەن پوليتسياعا بارىپ، ايتامىز دەپ ويلادىم، - دەدى ەلميرا نۇربەكوۆا.
ايتا كەتەيىك، بۇگىن سوت وتىرىسىندا شەرزات پولاتتىڭ ىسىندە كۋاگەر رەتىندە تانىلعان ەلميرا نۇربەكوۆادان جاۋاپ الىنىپ جاتىر.
ەسكە سالايىق، ول شەرزات قازا تاپقان ءتۇنى سوتتالۋشىلارمەن بىرگە كولىكپەن «قاماجاي» دۇكەنىنىڭ الدىنا كەلگەن ەكى ايەلدىڭ ءبىرى.
بىلتىر 4 قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.
2024 -جىلدىڭ 12 -قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.
بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.
اۆتور
الما مۇقانوۆا
