شەرزات سوتى: سوتتالۋشى وتىرىك ايعاق بەرگەنىن مويىندادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە قاتىستى سوت وتىرىسى ءوتىپ جاتىر.

بۇگىنگى سوت وتىرىسىندا كۇدىكتى ازامات توقتاۋبايەۆتان جاۋاپ الىنىپ جاتىر.

مەملەكەتتىك ايىپتاۋشى «قاماجاي» دۇكەنىنىڭ الدىندا تۇسىرىلگەن بەينەجازبانى قوسۋدى سۇرادى. وندا مەملەكەتتىك ايىپتاۋشى ازامات توقتاۋبايەۆتىڭ ءىس- قيمىلىنا ءمان بەردى.

سوتتالۋشى ءوز كەزەگىندە دۇكەننىڭ الدىندا نۇرقاناتپەن امانداسقانىن، جاعدايدىڭ ءمان-جايىن بىلۋگە تىرىسقانىن العا تارتىپ، توبەلەسكە بارماعانىن اتاپ ءوتتى.

ايىپتالۋشىنىڭ سوزىنشە، كيكىلجىڭ بارىسىندا دارحان اسكەنتايعا اشۋلى بولعان. سوندىقتان وسى جاعداي بويىنشا وتىرىك ايعاق بەرگەن.

- دارحان جايلى قاراما-قايشى جالعان ايعاق بەردىم. سەبەبى ول كەزدە دارحانعا اشۋلى ەدىم. بىزبەن بىرگە جازاعا تارتىلسىن دەپ وزىممەن بىرگە الا كەتكىم كەلدى. دارحاننىڭ قاتىسى جوق، ول ەشكىمدى ۇرمادى، قولىندا ەشقانداي پىشاق بولعان جوق. مەن وتىرىك ايعاق بەردىم، سول ءۇشىن قازىر وكىنەمىن، - دەدى ازامات توقتاۋبايەۆ.

ەسكە سالا كەتەيىك، شەرزات پولاتتىڭ ءولىمى بويىنشا العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.

بىلتىر 4-قازان كۇنى توبەلەستەن 16 جاستاعى جاس ءوسپىرىم قازا بولعانىن جازعان ەدىك.

2024 -جىلدىڭ 12- قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزات اعاسىنىڭ دەنەسى تابىلدى.