شەرزات سوتى: سۋديا بلوگەرلەر مەن الەۋمەتتىك جەلى قولدانۋشىلارىنا ەسكەرتۋ جاسادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

سوت وتىرىسىنىڭ باسىندا سۋديا ەرجان جانۇزاقوۆ بلوگەرلەرگە جانە الەۋمەتتىك جەلى قولدانۋشىلارىنا ەسكەرتۋ جاسادى.

- قۇرمەتتى سوت وتىرىسىنا قاتىسۋشىلار، الەۋمەتتىك جەلىلەردە ىسكە مۇلدەم قاتىسى جوق بلوگەرلەر مەن باسقا دا ازاماتتار تەرگەۋ ارەكەتتەرى مەن سوت تالقىلاۋىنا قاتىستى جەكە پىكىرىن ءبىلدىرىپ، سۋبەكتيۆتى باعا بەرىپ جاتىر. وسىعان بايلانىستى ق ر كونستيتۋتسياسىنىڭ 75-بابىنىڭ 1-تارماعىنا سايكەس، قازاقستان رەسپۋبليكاسىندا سوت تورەلىگىن تەك سوت جۇزەگە اسىراتىنىن، سونىمەن قاتار سوت قىزمەتىنە قانداي دا ءبىر ارالاسۋعا جول بەرىلمەيتىنىن جانە ول زاڭدا بەلگىلەنگەن تارتىپتە جاۋاپكەرشىلىككە اكەپ سوعاتىنىن ەستەرىڭىزگە سالامىز، - دەدى سۋديا.

سونىمەن قاتار ەرجان جانۇزاقوۆ ءىس قارالىپ ءبىتىپ، ۇكىم شىعىپ، ول زاڭدى كۇشىنە ەنگەنگە دەيىن سوت پروتسەسسىن تۇسىندىرۋگە، اسىرەسە وعان قۇقىقتىق باعا بەرۋگە جول بەرىلمەيتىنىن ەسكەرتتى.

- سوت شەشىمدى وبەكتيۆتى، داۋسىز دالەلدەر نەگىزىندە قابىلدايدى. ۇكىم شىققانعا دەيىن سوتقا قىسىم جاساۋعا، نەگىزسىز جانە دالەلسىز سىن ايتۋعا جول بەرىلمەيدى. ىسكە قاتىستى سۋبەكتيۆتى پىكىر تاراتۋعا بولمايدى. بۇل كەي جاعدايلاردا سوتقا قىسىم جاساۋ ارەكەتى رەتىندە باعالانۋى مۇمكىن. وسىعان بايلانىستى بلوگەرلەر مەن باسقا دا جەلى قولدانۋشىلارىنا ارانداتۋشىلىق سيپاتتاعى ارەكەتتەردەن اۋلاق بولۋعا شاقىرامىز. سوت وبەكتيۆتى ءارى نەگىزدەلگەن ۇكىم شىعاراتىنىنا كەپىلدىك بەرەدى، - دەدى سوت.

ەسكە سالايىق، وتكەن سوت وتىرىسىندا ايىپتالۋشى دارحان اسكەنتايدان جاۋاپ الىندى.

سوت بارىسىندا سوتتالۋشىلاردىڭ ادۆوكاتتارى پروكۋروردى اۋىستىرۋدى ءوتىندى. ءبىراق سۋديا پروكۋروردى اۋىستىرۋدان باس تارتتى.

سونىمەن قاتار سوتتا دۇكەن كامەراسىنا تۇسكەن وقيعانىڭ تولىق بەينەجازباسى كورسەتىلدى.

العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.