شەرزات سوتى: پروكۋرور كۋاگەر قىزداردىڭ ءىس-ارەكەتىن قايتا تەكسەرۋدى سۇرادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 16 جاستاعى شەرزات پولاتتىڭ ولىمىنە بايلانىستى سوت وتىرىسىندا جارىس ءسوز ءوتىپ جاتىر.

مەملەكەتتىك ايىپتاۋشى دانا سارسەنباي جارىسسوزدە كۋاگەر رەتىندە تانىلعان ەلميرا نۇربەكوۆا مەن دانا جاقسىگەلدىگە قاتىستى قايتا تەرگەۋ جۇرگىزۋدى سۇرادى.

- ءىس بويىنشا سۇرالعان كۋالار ەلميرا نۇربەكوۆا مەن دانا جاقسىگەلدى ارەكەتتەرىن تەكسەرۋ جانە ولارعا قۇقىقتىق باعا بەرۋ ءۇشىن جەكە قاۋلى شىعارۋدى، ونى الماتى وبلىسى پوليتسيا دەپارتامەنتىنە جولداۋدى سۇرايمىن، - دەدى پروكۋرور.

سونداي-اق مەملەكەتتىك ايىپتاۋشى ارلان قازىكەنوۆ پەن يۋلداش روزىباكيەۆكە قاتىستى ءدال وسىنداي ءوتىنىش جاسادى.

- سوتتا سۇرالعان كۋا رەتىندە ارلان قازىكەنوۆ پەن يۋلداش روزىباكيەۆكە قاتىستى پروتسەسسۋالدى شارا قابىلداۋ ءۇشىن جەكە قاۋلى شىعارىپ، الماتى وبلىسى پوليتسيا دەپارتامەنتىنە جولداۋدى سۇرايمىن، - دەدى دانا سارسەنباي.

ەسكە سالايىق، بۇعان دەيىن پروكۋرور ايىپتالۋشىلارعا 7-23 جىل اراسىندا جازا سۇراعانىن جازعانبىز.

بۇدان بۇرىن سوتتا كۋاگەر ەلميرا نۇربەكوۆادان جاۋاپ الىنعان ەدى.

سونىمەن قاتار ەكىنشى كۋاگەر قىز دانا جاقسىگەلدى وقيعا تۋرالى بايانداعان بولاتىن.

اۆتور

دوسبول اتاجان