شەرزات سوتى: ەكىنشى كۋاگەر قىز دانا جاقسىگەلدى وقيعا تۋرالى باياندادى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

سوت وتىرىسىندا بىلتىر 3-ىنەن 4- قازانعا قاراعان ءتۇنى وقيعا ورنىندا بولعان كۋاگەر دانا جاقسىگەلدى ءسوز سويلەدى. ول وقيعا قالاي بولعانىن باياندادى.

ونىڭ ايتۋىنشا، راۆيل ساكيەۆتىڭ شاقىرۋىمەن كۋاگەر ەلميرا نۇربەكوۆامەن بىرگە مەيرامحاناعا بارعان. وندا ايىپتالۋشىلاردىڭ بىرنەشەۋى بولعان.

- ۇيگە قايتامىز دەگەندە «اپارىپ تاستايمىز، ءبىراق جولدا دۇكەنگە كىرەيىك» دەدى. بىزدە دە تەمەكى ءبىتىپ قالعان ەدى. ءسويتىپ دۇكەن الدىندا ءبىر توپ ادام تۇردى. كەيىن ءبىز دۇكەنگە تەمەكى الۋعا كىردىك. ءبىراق بىزگە «ساتپايمىز» دەدى. سوسىن ءبىز شىقتىق، سول كەزدە ەرەگەس باستالىپ كەتتى. مەن كولىكتىڭ ارتىنا كەتتىم. سول كەزدە اتىس باستالدى. سۇر كيىم كيگەن ساقالدى جىگىت ءبىرىنشى اسپانعا، سوسىن ەكى رەت بىزگە قاراي وق اتتى. كەيىن توبەلەس كوشەنىڭ ارعى بەتىنە كەتىپ قالدى. مەن كولىكتىڭ ىشىندە وتىرىپ، 5 مينۋتتان كەيىن شىعىپ ۇلدارعا «قايتايىق» دەپ ايقايلادىم. ول كەزدە ەشكىم ەستىگەن جوق. قايتىپ كولىككە وتىردىم. توبەلەس نە ۇشىن باستالعانىن بىلمەدىم، - دەدى دانا جاقسىگەلدى.

پروكۋرور كۋاگەردەن «102»، «103» - كە نەلىكتەن حابارلاسپاعانىن سۇرادى.

- ونداي ويىمدا بولعان جوق. ءبىر جاعىنان مىلتىقتى ومىرىمدە ءبىرىنشى رەت كوردىم. سودان كەيىن قورقىپ، كولىكتە وتىرىپ قالدىم. ءوز ءومىرىم ءۇشىن قورىقتىم، - دەدى ول.

بۇعان دەيىن سوتتا كۋاگەر ەلميرا نۇربەكوۆا جاۋاپ بەردى.

بىلتىر 4 -قازان كۇنى توبەلەستەن 16 جاستاعى ءجاسوپىرىم قايتىس بولعانىن جازعان ەدىك.

اۆتور

دوسبول اتاجان