شەرزات سوتى: جارىسسوزدە سوتتالۋشىلار سوڭعى ءسوزىن ايتىپ جاتىر

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسىندا جارىس ءسوز ءوتىپ جاتىر.

بۇگىن جارىسسوزدە ايىپتالۋشىلار سوڭعى ءسوزىن ايتىپ جاتىر. ولاردىڭ اراسىندا ءبىرىنشى بولىپ دارحان اسكەنتاي ءسوز الدى.

- قۇرمەتتى سوت، مەنىڭ سول جەردە بولعانىم جانە دوسىما حابارلاسقانىم راس. مەن نۇربولدى كەك الۋ ماقساتىندا شاقىرمادىم. ىستەگەن ءىس-ارەكەتىم جانە بەينەماتەريالدى قاراساڭىز، مەن ەشكىمگە قول كوتەرمەدىم، ەشكىمدى تەپپەدىم جانە قولىمدا پىشاق بولمادى. مەن نۇربولدى شاقىرعانىما وكىنەمىن. جازىم جاعداي بولىپ، توبەلەس بولىپ كەتەتىنىن كىم بىلگەن. وسى وقيعاعا سەبەپشى بولعان جابىرلەنۋشى قارجاۋباي ءبىرىنشى شەرزاتقا مەن تۋرالى جالعان اقپارات بەرىپ جانە ەكىنشى بالالار كەلگەندە اگرەسسيا تانىتپاعاندا مۇنداي توبەلەس بولماس ەدى. بۇل جەردە توبەلەس باستاعان، ادامدار توبىن قۇرعان جانە پىشاق پەن قارۋ دايىنداعان قارجاۋبايعا ق ر زاڭىمەن ماعان تاعايىندالعان 293-باپتىڭ 3-تارماعىن تاعايىنداۋىڭىزدى سۇرايمىن، - دەدى دارحان اسكەنتاي.

ايىپتالۋشىلار اراسىندا ەكىنشى بولىپ سوتتاعى سوڭعى ءسوزىن راۆيل ساكييەۆ ايتتى.

- مەن سوتقا دەيىنگى تەرگەۋ بارىسىندا دا، سوت بارىسىندا دا نۇرقاناتقا 2-3-مارتە اياقپەن سوققى جاساعانىمدى مويىنداعانمىن. سول ءۇشىن كاديروۆا جۇمابيكە اپادان كەشىرىم سۇرايمىن. قۇرمەتتى سوت، مەن ايىپتاۋ اكتىسى بويىنشا ق ر قىلمىستىق كودەكسىنىڭ 293-بابى 3-بولىگى، 24-باپ 3-بولىگى، 99-باپ 2-بولىگى 7، 9-تارماقتارى بويىنشا ايىپتالىپ وتىرمىن. مەن نۇرقانات عايىپبايەۆقا سوققى جاساعانىمدى مويىندايمىن جانە ول ءۇشىن شىن جۇرەكتەن وكىنەمىن. ول ايىپتى (99-باپ) ماعان قانداي دالەلدەرمەن تاعىپ وتىرعانىن بىلمەيمىن. نۇرقانات ءبىرىنشى بەرگەن جاۋابىندا ماعان پىشاقتى ازامات سالدى دەگەن. ەكىنشىسىندە نۇرقياس سالدى دەگەن. ول مەنىمەن بەتتەستىرۋ كەزىندە مەنى 2017 -جىلدان بەرى تانيمىن دەپ ايتقان. ول مەنى بىرەۋمەن شاتاستىرىپ الۋى مۇمكىن ەمەس. مەن بەتتەستىرۋدە نۇرقانات عايىپبايەۆقا مىلتىق جايلى ايتقان كەزدە، ول «پىشاقتى سەن سالدى» دەپ ايتام دەدى. قۇرمەتتى سوت، مەن پىشاق سالسام، ونداي اۋىر قىلمىس ىستەسەم، «ءجۇر پوليتسياعا بارايىق» دەپ ايتپاس ەدىم. مەنىڭ قولىمدا پىشاق بولعان جوق. بەينەباقىلاۋدا كورگەندەرىڭىزدەي مەن ونىمەن (ن. عايىپبايەۆ) سويلەسىپ تۇرمىن. سول كەزدە ارت جاعىندا توبەلەس باستالدى. مەن مىلتىق اتىلعان كەزدە اشۋلانىپ، ونى 2-3 مارتە تەپتىم. ول ءۇشىن كەشىرىم سۇرايمىن جانە شىن جۇرەكتەن وكىنەمىن. سول بەتتەستىرۋگە دەيىن ماعان ەشقانداي ايىپ تاقپاي، سودان كەيىن مەنى ايتىپ كەتتى. قارجاۋباي مىرزا سوتقا كەلىپ شىندىعىن ايتتى، «مەن كورگەن جوقپىن» دەدى. مەن ول ايىپپەن كەلىسپەيمىن، تەك ءوزىم ىستەگەن ءىستى مويىندايمىن. مەنىڭ ءىس-ارەكەتىمدى ق ر قىلمىستىق كودەكسىنىڭ 293-بابى 3-بولىگىمەن قاراۋدى سۇرايمىن، - دەدى راۆيل ساكيەۆ.

ەسكە سالايىق، كەشە پروكۋرور 7-23 جىل اراسىندا جازا سۇرادى.

سونىمەن قاتار پروكۋرور كۋاگەر قىزداردىڭ ءىس-ارەكەتىن قايتا تەكسەرۋدى العا تارتتى.

ال سوتتالۋشىنىڭ ادۆوكاتى شەرزاتتىڭ اكەسىنە قاتىستى ءىس قوزعاۋدى ءوتىندى.

اۆتور

دوسبول اتاجان