شەرزات ءىسى: سوت پروتسەسى كەزىندە ءتارتىپ بۇزعان قىزمەتكەرلەرگە شارا قولدانىلدى

تالدىقورعان. KAZINFORM - شەرزات پولاتتىڭ ولىمىنە قاتىستى قىلمىستىق ءىس بويىنشا ءوتىپ جاتقان سوت وتىرىسىندا 2025-جىلعى 29-ساۋىردە تىكەلەي ەفيردە تاراعان كۇدىكتىلەردىڭ بەينەجازباسىنا قاتىستى قىزمەتتىك تەكسەرىستىڭ قورىتىندىسى جاريالاندى.

سۋديانىڭ ايتۋىنشا، قىزمەتتىك تەكسەرىس بارىسىندا سوت پروتسەسىن ونلاين ترانسلياتسيالاۋ كەزىندە تەحنيكالىق قىزمەتكەرلەر تاراپىنان ەفيردى ۋاقىتىلى توقتاتپاۋ دەرەگى انىقتالعان. سونىڭ سالدارىنان كۇدىكتىلەردىڭ بەينەسى كوپشىلىككە جاريا بولعان.

اتالعان جاعداي بويىنشا تەحنيكالىق قىزمەتكەرلەر - رۇستەم مۋكسينوۆ، نازيرا ورازاليەۆا جانە ساۋلە قايداعۇلوۆا تارتىپتىك جازاعا تارتىلدى.

ەسكە سالا كەتەيىك، سۋديا بلوگەرلەر مەن الەۋمەتتىك جەلى قولدانۋشىلارىنا ەسكەرتۋ جاساعان بولاتىن.

بۇعان دەيىن مەملەكەتتك ايىپتاۋشى سوتتالۋشىلاردىڭ ءارقايسىسىنا قىلمىستىق كودەكستىڭ قاي باپتارى بويىنشا ايىپ تاعىلعانىن ايتقان ەدى.

- ابزال شىناسىل قىلمىستىق كودەكستىڭ 293-بابى 3-بولىگى (بۇزاقىلىق)، 99-باپ 2-بولىگى 1،4،7، 9،14-تارماقتارى (ادام ءولتىرۋ)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)؛

- راۆيل ساكيەۆ قىلمىستىق كودەكستىڭ 293-بابى 3-بولىگى (بۇزاقىلىق)، 24-باپ 3-بولىگى (قىلمىسقا دايىندالۋ جانە قىلمىسقا وقتالۋ)، 99-باپ 2-بولىگى 7,9-تارماقتارى (ادام ءولتىرۋ)؛

- شىڭعىس بەلعوجايەۆ، نۇرقياس ءىلياسوۆ، دارحان اسكەنتاي، نۇربول توقتاۋبايەۆ، ديدار قالياحمەت، ازامات توقتاۋبايەۆ قىلمىستىق كودەكستىڭ 293-بابى 3-بولىگى (بۇزاقىلىق).

- كامەلەتكە تولماعان ديدار ىسقاق قىلمىستىق كودەكستىڭ 434-بابى (قىلمىس تۋرالى حابارلاماۋ) بويىنشا ايىپ تاعىلىپ وتىر.