شەرزات ءىسى بويىنشا اپپەلياتسيالىق سوت قاشان وتەتىنى بەلگىلى بولدى

قونايەۆ. KAZINFORM - شەرزات پولاتتىڭ ولىمىنە قاتىستى ايىپتالعان 8 سوتتالۋشىعا قاتىستى اپپەلياتسيالىق سوت الماتى وبلىسىندا وتەدى.

Kazinform ساۋالىنا جاۋاپ بەرگەن الماتى وبلىسى سوتىنىڭ مالىمەتىنشە، قىلمىستىق ءىس 2025 -جىلدىڭ 18-تامىز كۇنى ساعات 11:00- دە وبلىستىق سوت عيماراتىندا قايتا قارالادى. اتالعان ءىس بويىنشا:

ا. شىناسىل - قازاقستان رەسپۋبليكاسى قىلمىستىق كودەكسىنىڭ 293-بابىنىڭ 3-بولىگى، 99-بابىنىڭ 2-بولىگىنىڭ 5، 9، 14-تارماقشالارى، 24-بابىنىڭ 3-بولىگى جانە 99-بابىنىڭ 2-بولىگىنىڭ 1، 7، 9-تارماقشالارى بويىنشا؛

ر. ساكيەۆ - 293-باپتىڭ 3-بولىگى، 24-باپتىڭ 3-بولىگى جانە 99-باپتىڭ 2-بولىگىنىڭ 7، 9-تارماقشالارى بويىنشا؛

ا. توقتاۋبايەۆ - 293-باپتىڭ 3-بولىگى جانە 188-باپتىڭ 1-بولىگى بويىنشا؛

ش. بەلعوجايەۆ، د. اسكەنتاي، ن. ءىلياسوۆ، ن. توقتاۋبايەۆا جانە د. قالياحمەت - 293-باپتىڭ 3-بولىگى بويىنشا؛

د. ىسقاق - 434-باپ بويىنشا سوتتالعان.

سونداي-اق الماتى وبلىسىنىڭ سوتى د. ىسقاققا تاعايىندالعان جازا مەرزىمىنىڭ تولىق وتەلۋىنە بايلانىستى بوساتىلعانىن راستادى.

بۇعان دەيىن جابىرلەنۋشى تاراپتىڭ ادۆوكاتى بولعان مەيىرمان شەكەيەۆ ايىپتالۋشىلاردىڭ ءبىرى جازاسىن وتەۋىنە بايلانىستى بوستاندىققا شىققانىن حابارلاعان ەدى.