شري-لانكادا سۋ تاسقىنى سالدارىنان قازا تاپقاندار سانى 334 كە جەتتى

استانا. KAZINFORM - جەرگىلىكتى ۋاقىت بويىنشا جەكسەنبى كۇنى ساعات 18:00 گە دەيىن شري-لانكادا قولايسىز اۋا رايى سالدارىنان قازا تاپقاندار سانى 334 ادامعا جەتكەنى حابارلاندى. بۇل تۋرالى لانكاداعى توتەنشە جاعدايلارمەن كۇرەس ورتالىعى مالىمدەدى، دەپ حابارلايدى شينحۋا.

ورتالىق مالىمەتىنشە، كەم دەگەندە 370 ادام حابار-وشارسىز كەتتى دەپ ەسەپتەلىپ وتىر. نوسەر جاڭبىر، سۋ تاسقىنى جانە سەل جالپى سانى 1118929 ادامعا، 309607 وتباسىعا زاردابىن تيگىزىپ وتىر.

توتەنشە جاعدايعا بايلانىستى شري-لانكا ءبىلىم مينيسترلىگى ءوز قاراماعىنداعى بارلىق ۋنيۆەرسيتەتتەر، جوعارى وقۋ ورىندارى جانە كاسىبي ءبىلىم بەرۋ ورتالىقتارىنىڭ وقۋ ۇدەرىسىن 8-جەلتوقسانعا دەيىن توقتاتاتىنىن جاريالادى.

بۇل شەشىم كەڭ كولەمدى كولىك توقتاۋلارى، زاقىمدانعان ينفراقۇرىلىم جانە قولايسىز اۋا رايىنىڭ تۋدىراتىن قاۋىپتەرى سالدارىنان قابىلدانعانى اتاپ ءوتىلدى.

ەسكە سالا كەتسەك، 26-قاراشادا شري-لانكاداعى كوشكىن مەن سۋ تاسقىنى 47 ادامنىڭ ءومىرىن قيعانىن جازعانبىز.

كوپ ۇزاماي اتالعان ەلدە تابيعي اپاتتارعا بايلانىستى توتەنشە جاعداي ەنگىزىلدى.

كەشە مەملەكەت باسشىسى قاسىم-جومارت توقايەۆ شري-لانكا پرەزيدەنتىنە كوڭىل ايتۋ جەدەلحاتىن جولدادى.