شەرنياز جارىلعاس ۇلى ولەڭدەرى
شەرنياز اقىننىڭ «ءاي، قازى ءبي، قازى ءبي»، «كول قىلىپ قۇيدىم تالاي سۋداي اعىن»، «توستاعاندى قولعا الىپ» سەكىلدى تۋىندىلارى بەرىلدى.
ءاي، قازى ءبي، قازى ءبي
ءاي، قازى ءبي، قازى ءبي،
ءۇش تاڭبالى مايلىباي،
جايىلسا جونعا سىيعىسىز
الىم دەگەن ەل ەدىك؛
ون ەكى اتا باي ۇلى،
ءبىز ەكەۋىنە تەڭ ەدىك؛
قونىسىم جاقىن بولعان سوڭ،
بىزبەن ون ءۇش دەپ ەدىك.
تاۋدا ءجۇرىپ تاس كەسكەن،
قۇلانداي تاۋدا جايلاعان،
تۋمىش اتىم بۇيىرعانعا بايلاعان،
سوناۋ جۇرگەن ادايدىڭ
تۇبىندە اتام ءبىر-دى، - دەپ
ايقايلاپ ارىن ارلاعان،
ءبىز تەڭدىكسىز نەسىن جەپ ەدىك؟
ءاي، قازى ءبي، قازى ءبي،
ءالى دە بوسا ويلانىڭىز.
ءبىز زيانسىز قورعامىز
بىلتىرعى وتكەن جاز كۇنى
ءبىز الىمگە بارعانبىز.
قيماعاننان قونىستى،
قايتىپ ساعان كەلگەنبىز.
كەلگەن كىسىم سەن بولساڭ،
كوزگە تۇرتە بەرمەڭىز
ەندى قورلىق كورسەك تە،
اناۋ جاتقان الىمگە
ءبىز ۋادە بەرگەنبىز.
ءاي، قازى ءبي، قازى ءبي،
كوزىڭدى سال پايدا،زيانعا-اي.
شىعا قالماس ءمۇيىزىڭ،
كەتەنى قۋىپ قيانعا-اي.
سۇڭقارىم قاشتى قولىمنان،
قارامايسىڭ سوزگە، ۇيالماي.
اسا ءبىر قورلىق كورمەسە،
قونىسىن كىسى قيارما-اي؟
سۇلتان سيىق دەپ كەلگەندە،
ەل ىشىندە ەل دەگەنىم
قارسى وزىمە جاۋ شىقتى،
جىلقىدان كەتە ساۋ شىقتى.
مالىكەنىڭ ايتقانى
وتىرىك جالا، داۋ شىقتى.
نازار العان جىلقىسىن
شەرنيازدان الام داپ،
مالىكە دەگەن جاۋ شىقتى.
ءاي، قازى ءبي، قازى ءبي،
جىلدا ءبىر كەلسەم جەرىڭە،
زاۋدە كەلگەن قوناقتاي
ءتاڭىر الدىنا بارعاندا
قوناقتى كۇتكەن جالاقتاي،
باي ۇلىنىڭ ىشىندە
يلانار كىم سەنى اقتاي؟
سەن ءبي دەگەنگە ماقتانبا،
تەڭدەسىپ سويلەر جەر بولسا،
ايبىنار كىم، كىم اقساي؟
ءاي، قازى ءبي، قازى ءبي،
جۇرتتان وزدى ارۋاعىڭ،
اتاڭىز باتىر بۇراندا-اي،
نيەتپەن كەلدىم، اعا دەپ،
تيمەس پە پايدا جەرىمە-اي؟
اتاڭنىڭ ءسوزى از بولار،
سابىر ەتسەڭ ازىراق
ولمەگەن قۇلعا جاز بولار،
مەن ايتىپ بولدىم سىرىمدى-اي.
مەن دە اتادان تۋعانمىن،
اداممىن دەپ جۇرگەنمىن،
مەن-داعى قاراپ تۇرا المان،
سەن سۇيكەنسەڭ ۇرىنباي.
الدىڭا ارىم جىبەرمەن
ءۇش تاڭبالى مايلىباي،
تۇقىمىم ءبىتىپ قىرىلماي.
كول قىلىپ قۇيدىم تالاي سۋداي اعىن
كول قىلىپ قۇيدىم تالاي سۋداي اعىن
سويلەي كور ولمەي تۇرىپ، ءتىل مەن جاعىم
دۇنيەنىڭ ماشاقاتىن شەكتىم تالاي،
الماسىن تىرلىكتە ەردىڭ باعىن.
قىزىل ءتىل ءسوز سويلەسەم بەزەرىلگەن،
زامانى جىلدان - جىلعا شەگەرىلگەن.
ار جەردە القا كورسەم، تۇرا المايمىن،
وسىنداي قىزىل تىلگە شەبەرىمنەن.
ءوزىم دە ءسوز ايتۋعا شەبەر - اقپىن،
سويلەۋگە ەرنىم ەپتى ەمەرىلگەن.
...مال قولدا، جان ۇيادا تۇرعان شاقتا،
تۇرادى ايتقان ءسوزىڭ جاراسىپ-اي.
نەمەنە ايتىپ - ايتپاي، ءتاڭىر دەگەن،
دۇنيە باستان ءوتىپ باراسىڭ-اي.
توستاعاندى قولعا الىپ
توستاعاندى قولعا الىپ،
ايقاي سالعان جيىرما بەس؛
شانشاتۇعىن نايزاداي
قىلتىڭ ەتكەن جيىرما بەس؛
شاباتۇعىن قىلىشتاي
جىلتىڭ ەتكەن جيىرما بەس.
جيىرما بەستەن وتكەن سوڭ،
وردا بۇزعان وتىز بەس.
وتىز بەستەن وتكەن سوڭ،
قىنسىز قىلىش قىرىق بەس.
قىرىق بەستەن وتكەن سوڭ،
ەمەن شوقپار ەلۋ بەس.
ەلۋ بەستەن وتكەن سوڭ،
ارمەن-بەرمەن الپىس بەس.
جەتپىس بەسكە كەلگەن سوڭ،
سەكسەن بەسكە جەتكەن سوڭ،
ۇلىڭ جۇرەر ۇيالماي،
قىزىڭ جۇرەر ءتىل الماي،
سول مەزگىلدە جۇرەرسىڭ
بەلگە سوققان جىلانداي.
سەكسەن بەستەن وتكەن سوڭ،
توقسان بەسكە كەتكەن سوڭ،
شوڭگە بولار تۇسىڭىز،
جىلاپ تۇرار ءىشىڭىز،
بويدان كەتەر كۇشىڭىز.
سول مەزگىلدە بولعاي - اۋ
سىيلايتۇعىن كىسىڭىز.
