ۇشقىش ءبيبىحان

استانا. KAZINFORM - ادام جانىن اراشالاۋعا اتسالىسىپ جۇرگەن ءبيبىحان ماماندىقتى ەرلەرگە نەمەسە ايەلدەرگە ارنالعان دەپ بولۋگە بولمايدى دەپ سانايدى.

اۆياتسيا - ۇلكەن جاۋاپكەرشىلىكتى قاجەت ەتەتىن قيىن سالانىڭ ءبىرى. بۇرىن ەر-ازاماتتاردىڭ وقۋى سانالاتىن اۆياتسيالىق ماماندىقتارعا بۇگىندە قىزدار اراسىندا سۇرانىس جوعارى. ازاماتتىق اۆياتسيا اكادەمياسىنىڭ ارۋلارى اۆيامەحانيك، اۆياديسپەتچەر، لوگيست، اۆياتسيالىق قاۋىپسىزدىك، تىكۇشاق پەن ۇشاق باسقارۋشى ماماندار رەتىندە ۇلكەن جەتىستىكتەرگە جەتىپ وتىر.

ءبيبىحان تۇرىسبەكوۆا توتەنشە جاعدايلار مينيسترلىگىنە قاراستى «قازاۆياقۇتقارۋ» اۋە كومپانياسىندا ەكىنشى ۇشقىش شتۋرماننىڭ قىزمەتىن اتقارادى. بالا كەزىنەن ۇشقىش بولۋدى ارمانداعان ارۋ 2016-2021 -جىلدار ارالىعىندا ازاماتتىق اۆياتسيا اكادەمياسىندا ءبىلىم الادى. وقۋىن ويداعىداي اياقتاعان جاس مامان مەملەكەتتىك باعدارلاما بويىنشا «قازاۆياقۇتقارۋ» اۋە كومپانياسىنا ەكىنشى ۇشقىش بولىپ جۇمىسقا ورنالاسادى. اۋە قاتىناسى سالاسىندا جەمىستى ەڭبەك ەتىپ كەلە جاتقانىنا بيىل 3 جىل تولادى. 25 جاستاعى ۇشقىش قىز بۇگىندە مي-8 اۋىر تىكۇشاعىن باسقارادى.

- ءبىز مەديتسينالىق كومەككە، ءورت سوندىرۋگە، سۋ اپاتتارىنا، جوعالعان ادامداردى ىزدەۋگە، قۇتقارۋ جۇمىستارىنا بارامىز. كومەككە مۇقتاج جانداردىڭ كۇتىپ تۇرعانىن سەزىنۋ، ولارعا جاردەمشى بولىپ العاشقىلاردىڭ ءبىرى رەتىندە جەتۋ، كومەك كورسەتۋدەن ارتىق باقىت جوق، - دەيدى ءبيبىحان.

توتەنشە جاعداي سالاسىنداعى ماماندار نەشە ءتۇرلى قيىندىقتارمەن بەتپە-بەت كەلەتىندىكتەن پسيحولوگيالىق تۇراقتىلىق وتە ماڭىزدى.

- كەز كەلگەن ۇشقىش ەڭ الدىمەن بيىكتىكتەن قورىقپاۋى كەرەك. سونىمەن قاتار جاۋاپكەرشىلىك، سترەسكە توزىمدىلىك، ەموتسيونالدىق تۇراقتىلىق، قيىن جاعدايدا تەز شەشىم قابىلداۋ ماڭىزدى ءرول اتقارادى. ءوزىم تىكۇشاققا ءار وتىرعان سايىن ءبىرىنشى رەت وتىرعانداي اسەر الامىن. بار ۋايىمىمدى ۇمىتىپ، جاۋاپكەرشىلىكتى سەزىنەمىن. ويتكەنى بۇل جۇمىستا قوبالجۋعا جول جوق، - دەيدى جاس مامان.

قۇتقارۋ جۇمىستارىنا جۇمىلدىرىلاتىن تىكۇشاقتار ەلىمىزدىڭ 15 وڭىرىندە ورنالاسقان جانە ولار ازاماتتاردىڭ قاۋىپسىزدىگىن قامتاماسىز ەتۋ ءۇشىن كۇندەلىكتى كەزەكشىلىكتە تۇرادى. «قازاۆياقۇتقارۋ» تەحنيكالارى مەن ارنايى جاساقتارى بۇگىنگە دەيىن الماتى، باتىس جانە شىعىس قازاقستان، تۇركىستان وبلىستارىنداعى ءىرى سۋ تاسقىنى كەزىندە زارداپ شەككەن جانداردى سۋ باسقان جەرلەردەن ەۆاكۋاتسيالاپ، بىرنەشە مىڭ ادامنىڭ ءومىرىن قۇتقارىپ قالعان.

ادام جانىن اراشالاۋعا اتسالىسىپ جۇرگەن ءبيبىحان ماماندىقتى ەرلەرگە نەمەسە ايەلدەرگە ارنالعان دەپ بولۋگە بولمايدى دەپ سانايدى.

- دامىعان زاماندا ەر مەن ايەلدىڭ قوعامداعى ورنى بىردەي. سوندىقتان قاساڭ كوزقاراستاردان ارىلىپ، ءار ادام جانى قالاعان ىسپەن اينالىسسا، جەتىستىككە جەتەدى. ادامدى ارمانى الدامايدى. ارماندارىڭىزدان ەشقاشان باس تارتپاڭىزدار، - دەپ قورىتتى ويىن ءبيبىحان.

ەرجۇرەك قىزعا ارمانى الاسارماسىن دەيمىز.

 

turkystan.kz