«ەشقانداي ەرەۋىل بولمايدى»: تالعاردا قازا تاپقان 16 جاستاعى جاس ءوسپىرىمنىڭ اكەسى مەن ايتبەك امانگەلدى ۇندەۋ جاسادى

الماتى. KAZINFORM - تالعاردا كىسى قولىنان قازا تاپقان 16 جاستاعى جاس ءوسپىرىم شەرزات بولاتتىڭ اكەسى مەن قورعاۋشىسى ايتبەك امانگەلدى مالىمدەمە جاسادى.

«ءبىز شەرزاتتىڭ اكەسى قارجاۋباي ەكەۋىمىز 14-قازان كۇىنى ەشقانداي ميتينگىگە شىعۋدىڭ قاجەتى جوقتىعىن ايتقىمىز كەلەدى. ميتينگ بولمايدى. قازىر تەرگەۋ ءجۇرىپ جاتىر. ەكسپەرتيزالار جاسالادى. بۇل ەرەۋىل تەرگەۋ امالدارىنا كەرى اسەر ەتۋى مۇمكىن. بۇل پايداسىز ارەكەت»، - دەدى ايتبەك امانگەلدى.

شەرزاتتىڭ اكەسى تەك قانا ءادىل سوت تالاپ ەتەتىن العا تارتتى.

«14-قازان كۇنى ەشقانداي ميتينگ، قان توگىس بولمايدى. مەنىڭ ماقساتىم بالامنىڭ ولىمىنە قاتىستى ادىلەتتى سوت شەشىمىنە قول جەتكىزۋ. ادامدار كەلىپ، تەرگەۋ ءجۇرىپ جاتىر. قورعاۋشىلار، مارقۇم سالتاناتتىڭ باۋىرى دا بار. ءبىر-بىرمىزگە قولداۋ كورسەتىپ جاتىرمىز. حالىقتىڭ قولداۋىنا العىس ايتامىن. ءبىراق قان توگۋدىڭ قاجەتى جوق. قان توگىسپەن ەش نارسە شەشىلمەيدى. مەن بالام ءۇشىن ءادىل سوت تالاپ ەتەمىن. سوڭىنا دەيىن بارامىن»، - دەدى شەرزاتتىڭ اكەسى.

ەسكە سالايىق، ساعات 00:50- دە ءۇيدى جالىن شارپىعان. ءورت ساعات 01:43- دە تولىعىمەن جويىلدى.

بۇعان دەيىن 4-قازان كۇنى تالعار قالاسىنداعى توبەلەستەن جاس ءوسپىرىم قايتىس بولعانىن جازعانبىز.

ودان كەيىن شەرزاتتىڭ تۋعان-تۋىستارى مەن تالعار تۇرعىندارى اشىق تەرگەۋ بولۋىن تالاپ ەتىپ، نارازىلىققا شىققان بولاتىن.

بۇگىن باس پروكۋراتۋرانىڭ باسشىلىعىمەن قىلمىستى اشۋ ءۇشىن ۆەدومستۆوارالىق جەدەل-تەرگەۋ توبى قۇرىلعانى بەلگىلى بولدى.

بۇگىن ىشكى ىستەر ءمينيسترىنىڭ ءبىرىنشى ورىنباسارى باۋرجان الەنوۆ مارقۇم شەرزات بولاتتىڭ ءۇيىن ورتەۋ وقيعاسىن تەرگەۋ توبىمەن تالعارعا باردى.