ەشكىولمەس پەتروگليفتەرىنە قاۋىپ ءتونىپ تۇرعانى راس پا

تالدىقورعان. KAZINFORM - جەتىسۋ وبلىسى اكىمدىگى «گيپەربورەي» Youtube-ارناسىندا جاريالانعان بەينەماتەريالدا ايتىلعان كەيبىر اقپاراتتاردىڭ شىندىققا سايكەس كەلمەيتىنىن مالىمدەدى.

اكىمدىكتىڭ مالىمەتىنشە، جوعارعى تالاپتى شاعىن سۋ ەلەكتر ستانسياسىنىڭ قۇرىلىسى بارىسىندا بوگەت سالۋ قاراستىرىلماعان. قۇرىلىس جۇمىستارى تەك وزەن ارناسى شەگىندە جۇرگىزىلىپ وتىر.

«ەكولوگيالىق كودەكستىڭ 2-قوسىمشاسى، 3-ءبولىمى، 2-تارماعىنا سايكەس، نىسان Ⅲ ساناتقا جاتادى. بۇل دەگەنىمىز - قورشاعان ورتاعا اسەرى ەلەۋسىز. اتالعان جايت الماتى وبلىسى اكىمدىگى تاراپىنان 2022 -جىلعى 19-قاڭتاردا بەرىلگەن ەكولوگيالىق رۇقسات قۇجاتىمەن راستالعان»، - دەلىنگەن اكىمدىك تاراتقان اقپاراتتا.

سونىمەن قاتار، جەتىسۋ وبلىسى اكىمدىگىنىڭ حابارلاۋىنشا، ۋاكىلەتتى ورگانداردى تارتا وتىرىپ، ەشكىولمەس جوتاسىنداعى پەتروگليفتەردىڭ اينالاسىنداعى جاعدايدى جان- جاقتى زەردەلەۋ ماقساتىندا ارنايى كوميسسيا قۇرىلعان.

كوميسسيا جۇمىسىنىڭ ناتيجەسى بويىنشا قوسىمشا اقپارات بەرىلەتىن بولادى.

ەسكە سالايىق، ستراتەگيالىق ماڭىزى بار سۋ شارۋاشىلىعى قۇرىلىستارىنىڭ ءتىزىمى تاعى ءبىر نىسانمەن تولىققانى جايلى ايتقان بولاتىنبىز.

 

اۆتور

تاستان تويانوۆ