شەكاراداعى وتكىزۋ پۋنكتتەرىن تولىققاندى جاڭعىرتۋ جالعاسىن تابادى - قارجى ءمينيسترى
استانا. KAZINFORM - ق ر قارجى ءمينيسترى ءمادي تاكيەۆ جەتىسۋ جانە الماتى وبلىستارىنا جاساعان جۇمىس ساپارىندا «نۇر جولى» جانە «قالجات» كەدەن بەكەتتەرىندە بولىپ، كولىك-لوگيستيكا سالاسىنىڭ دامۋىمەن تانىستى.
وسى ورايدا مينيسترلىك ەلىمىزدىڭ وتكىزۋ پۋنكتتەرىندە تسيفرلى سەرۆيستەردى جۇيەلى تۇردە ەنگىزىپ جاتقانىن ايتا كەتەيىك. بۇل تۋرالى ق ر قارجى مينيسترلىگىنىڭ باسپا ءسوز قىزمەتى حابارلادى.
مەملەكەت باسشىسى قاسىم-جومارت توقايەۆ بيىلعى قازاقستان حالقىنا ارناعان جولداۋىندا شەكارا ماڭىنداعى كەدەن بەكەتتەرىنىڭ ماسەلەسىنە نازار اۋدارىپ، ولاردى دامىتۋ جونىندەگى جۇمىستى قىسقا مەرزىمدە اياقتاۋدى تاپسىرعان- دى.
اتالعان كەدەن بەكەتتەرى قازاقستان-قىتاي شەكاراسىندا ورنالاسقان. ماسەلەن، «نۇر جولى» اۆتوموبيل وتكىزۋ پۋنكتى ارقىلى 266,5 مىڭ كولىك وتكەن. بىلتىرعى كەزەڭىمەن سالىستىرعاندا ءوسىم 2 ەسەگە ارتقان.
ال «قالجات» اۆتوموبيل وتكىزۋ پۋنكتى ارقىلى بيىلعى 8-ايدا 30 مىڭعا اۆتوكولىك ءوتىپتى. 2023-جىلمەن سالىستىرعاندا ءوسىم %24 دەيىن ۇلعايدى.
ەلىمىزدىڭ ترانزيتتىك الەۋەتىن دامىتۋ مەن شەكەرالاس مەملەكەتتەرمەن تاۋار اينالىمىن ۇلعايتۋ ماقساتىندا قازاقستان رەسپۋبليكاسىنىڭ ۇكىمەتى قىتاي حالىق رەسپۋبليكاسىمەن، وزبەكستان رەسپۋبليكاسىمەن جانە تۇرىكمەنستان رەسپۋبليكاسىمەن اراداعى شەكارالىق وتكىزۋ پۋنكتتەرىن تولىققاندى جاڭعىرتۋدى قولعا الدى.
جاڭعىرتۋ جۇمىستارىنا سايكەس ەسكى ينفراقۇرىلىمدى بۇزىپ، جاڭا وتكىزۋ پۋنكتتەرىن سالۋ قاراستىرىلعان. سونىمەن قاتار استانا قالاسىندا بولاتىن باس ديسپەتچەرلىك باسقارماعا كەدەن بەكەتتەرىن باقىلاۋدى سيفرلاندىرۋ جانە ورتالىقتاندىرۋ بويىنشا جۇمىستار اتقارىلىپ كەلەدى. مۇندا سالالىق باقىلاۋ قىزمەتتەرى، ونىڭ ىشىندە شەكارا قىزمەتى دە ورنالاستىرىلاتىن بولادى.
اتالعان وزگەرىستەر وتكىزۋ پۋنكتتەرىنىڭ ينفراقۇرىلىمىن جاقسارتىپ، دامىتا تۇسەدى. شەكارادان جايلى ءوتىپ، مەملەكەتتىك باقىلاۋ تۇرلەرىن ساپالى جۇرگىزۋ ءۇشىن بارلىق جاعداي جاسالادى. كولىكتەردى قابىلداۋ 6 ەسەگە ۇلعايتىلىپ، تاۋارلاردى وتكىزۋدىڭ بارلىق تسيكلىن اۆتوماتتاندىرۋ ارقىلى شەكارادان اسۋ ۋاقىتى 30 مينۋتقا دەيىن ازايادى.
بۇدان باسقا «كەدەن» اقپاراتتىق جۇيەسىن ازىرلەۋ جۇمىسى قارقىن الدى. بۇل وتاندىق كەدەن سالاسىنداعى سيفرلى شەشىم. اتالعان جۇيە «استانا-1»، «ەكسپورتتىق-يمپورتتىق وپەراتسيالار جونىندەگى ءبىرىڭعاي تەرەزە»، «تايس-2»، «ج ب و» جۇيەلەرىن الماستىرادى.
جاڭا جۇيە كەدەندىك وپەراتسيالاردىڭ بارلىق كەزەڭى مەن قاتىسۋشىلارىمەن ءوزارا ءىس-قيمىلدى قامتيدى، سونداي-اق رۇقسات بەرۋ قۇجاتتارىن اكەلۋ مەن الۋدان باستاپ، تاۋارلار شىعارىلعاننان كەيىنگى باقىلاۋدى قاراستىرادى.
سونىمەن بىرگە ءمادي توكەش ۇلى Nur Zholy Customs Service حالىقارالىق كولىكتىك-لوگيستيكالىق ورتالىعىنىڭ قىزمەتىمەن تانىستى. مۇندا ۆەدومستۆو باسشىسى شاعىن كولىك قۇرالدارىنا ارنالعان جاڭا ۋاقىتشا ساقتاۋ قويمالارىن قاراپ شىقتى.
Nur Zholy Customs Service ج ش س- ءنىڭ كەدەن جانە شەكارا قىزمەتتەرىمەن بىرلەسىپ اتقارعان جۇمىسىنىڭ ارقاسىندا حالىقارالىق كولىك-لوگيستيكالىق ورتالىعىنىڭ الاڭى ۇلعايتىلىپ، كولىكتەردىڭ كەلۋىنىڭ تەحنولوگيالىق سحەماسى وزگەرتىلدى، سول سەكىلدى تاۋلىكتىك جۇمىس رەجىمى ەنگىزىلدى. وسى ارقىلى تاۋلىگىنە 200 دەن 1500 جۇك كولىككە دەيىن وتەتىن بولدى.
ينۆەستورلاردى تارتۋ ارقىلى وتكىزۋ پۋنكتىنەن 5 ك م قاشىقتىقتا شاعىن كولىكتەرگە ارنالعان ۋاقىتشا ساقتاۋ قويماسىنىڭ قۇرىلىسى اياقتالدى. ونىڭ جۇمىسى لوگيستيكالىق پروتسەستەردى جاقسارتۋعا ءتيىس.
ترانزيتتى وڭتايلاندىرۋ مەن سىرتقى ەكونوميكالىق قىزمەت قاتىسۋشىلارى ءۇشىن، ونىڭ ىشىندە قىتاي حالىق رەسپۋبليكاسىمەن كەدەندىك دەرەكتەرمەن الىسۋ بويىنشا جاعدايلاردى جاقسارتۋعا باعىتتالعان قىتايلىق ءىرى كومپانيالارمەن ەكى مەموراندۋمعا قول قويىلدى.
ءوڭىردىڭ دامۋى مەن شەكارا ماڭىنداعى اۋداندارداعى ءومىردىڭ جاقسارۋىنا اسەر ەتەتىن جۇمىس ورىندارى اشىلىپ، الەۋمەتتىك كەپىلدىكتەر بەرىلە باستادى. ماسەلەن، جۇمىس ورىندارى 35 تەن 110 عا دەيىن ۇلعايتىلدى.
ينۆەستورلاردىڭ ەسەبىنەن «قالجات» وتكىزۋ پۋنكتىندە شاعىن كولىك قۇرالدارى ءۇشىن ۋاقىتشا اينالما جول سالىندى، بۇل شامامەن 328 شاعىن كولىكتىڭ قوزعالىسىن رەتتەۋگە سەپتەستى.
وسى ءىس ساپاردا م. تاكيەۆ ءوڭىر اكىمى م. سۇلتانعازيەۆپەن بىرگە شونجى اۋىلىنىڭ تۇرعىندارىمەن كەزدەستى. ونىڭ بارىسىندا مينيستر تاياۋدا عانا جاريالانعان مەملەكەت باسشىسىنىڭ قازاقستان حالقىنا جولداۋىنداعى الەۋمەتتىك-ەكونوميكالىق ماسەلەلەرگە ەرەكشە نازار اۋداردى. ۆەدومستۆو باسشىسىنىڭ ايتۋىنشا، مينيسترلىك پەن تۇتاستاي ۇكىمەتتىڭ قىزمەتىندەگى ماڭىزدى باعىتتاردىڭ ءبىرى - الەۋمەتتىك سالاعا قولداۋ كورسەتۋ. بۇعان 2025-جىلى 9,8 تريلليون تەڭگە باعىتتالادى. شىعىس كولەمى 2024-جىلعا قاراعاندا 794 ميلليارد تەڭگەگە ۇلعايادى.
2025-جىلى رەسپۋبليكالىق بيۋجەت قاراجاتى ەسەبىنەن وڭىرلەرگە بولىنەتىن اقشا 348 ميلليارد تەڭگەگە ۇلعايىپ، 7,4 تريلليون تەڭگە كولەمىندە بولادى. اتاپ ايتقاندا، الماتى وبلىسىنىڭ سۋبۆەنتسيالارى 203,6 ميلليارد تەڭگەگە جەتتى. قاراجات ءبىلىم بەرۋ گرانتتارىنا، حالىقتى سۋمەن قامتاماسىز ەتۋگە، جىلۋ جەلىلەرىن جوندەۋگە، ەلدى مەكەندەردى گازداندىرۋعا، اۆتوجولداردى جوندەۋگە، بيزنەستى قولداۋعا جۇمسالادى.
