شەكارادا «دوستىق-اۆتوموبيل» جاڭا وتكىزۋ پۋنكتى جۇمىس ىستەي باستادى
استانا. KAZINFORM - مەملەكەتتىك كىرىستەر كوميتەتى ەۋرازيالىق ەكونوميكالىق وداقتىڭ كەدەندىك شەكاراسىنىڭ قازاقستاندىق ۋچاسكەسىندە كەدەن «الاكول» بەكەتى قۇرىلىسىنىڭ اياقتالعانى تۋرالى حابارلايدى.
كوميتەت مالىمەتىنە سايكەس وتكىزۋ پۋنكتى تولىق كولەمدە 2025 -جىلعى 12 -مامىردان باستاپ جۇمىس ىستەپ جاتىر.
جاڭا نىسان «ەۋرازيالىق ەكونوميكالىق وداقتىڭ كەدەندىك شەكاراسىنىڭ قازاقستاندىق ۋچاسكەسىندە ورنالاسقان وتكىزۋ پۋنكتتەرىن جاڭعىرتۋ جانە تەحنيكالىق جەتە جاراقتاندىرۋ» جوباسى شەڭبەرىندە سالىندى. بۇل جوبانى ىسكە اسىرۋ سىرتقى ەكونوميكالىق قىزمەتتىڭ تيىمدىلىگىن ارتتىرۋعا، شەكارادان ءوتۋ ۋاقىتىن قىسقارتۋعا جانە سىرتقى ەكونوميكالىق قىزمەتكە قاتىسۋشىلار مەن ازاماتتار ءۇشىن جاعدايلاردى جاقسارتۋعا باعىتتالعان.
- قازىرگى زامانعى «دوستىق- اۆتوموبيل» وتكىزۋ پۋنكتى اۆتوماتتاندىرىلعان كەدەندىك جانە مەملەكەتتىك باقىلاۋدىڭ وزگە دە تۇرلەرىنە ارنالعان بارلىق قاجەتتى تەحنولوگيالىق جابدىقتارمەن جابدىقتالعان. جاڭعىرتۋدىڭ نەگىزگى ناتيجەلەرىنىڭ ءبىرى جولاقتاردىڭ سانىن ەكىدەن التىعا دەيىن ارتتىرۋ بولدى. بۇل وتكىزۋ قابىلەتتىلىگىن تاۋلىگىنە 800 اۆتوموبيلگە دەيىن ارتتىرۋعا مۇمكىندىك بەردى. وسىلايشا، شەكارادان ءوتۋ ۋاقىتى ەداۋىر قىسقارادى جانە حالىقارالىق تاسىمالداردىڭ لوگيستيكاسى جەڭىلدەتىلەدى، - دەلىنگەن تاراتىلعان اقپاراتتا.
جاڭا كەدەن بەكەتىنىڭ اشىلۋى شەكارا ماڭىنداعى ينفراقۇرىلىمدى نىعايتۋ، ەل جانە ە ا ە و- نىڭ ترانزيتتىك الەۋەتىنىڭ وتكىزۋ قابىلەتىن ارتتىرۋ باعىتىنداعى ماڭىزدى قادام بولدى.
