«شاڭىراق كۇنى» قاستەيەۆ مۇراجايىندا ەكسكۋرسيا ءوتتى
الماتى. قازاقپارات - 17-ناۋرىزدا قازاقستاندا ناۋرىز مەرەكەسىنىڭ ءتورتىنشى كۇنى تويلانىپ جاتىر. شاڭىراق كۇنى - قازاقستاندىقتار ءۇشىن ماڭىزدى سانالاتىن وتباسى قۇندىلىقتارىنا ارنالعان. مەرەكە قۇرمەتىنە وراي الماتىداعى ءا. قاستەيەۆ اتىنداعى مۇراجايدا ەكسكۋرسيا ءوتتى. ءىس-شاراعا «ارىستان» مامانداندىرىلعان ليتسەيىنىڭ وقۋشىلارى قاتىستى. ولار مۇراجاي قىزمەتكەرلەرىن مۇقيات تىڭدادى.
ەكسپوزيتسيادا شاڭىراقتىڭ ءوزى، XIX جانە ⅩⅩ عاسىرلارداعى ونەر تۋىندىلارى، سونداي- اق قازىرگى زامانعى سۋرەتشىلەردىڭ، قولونەرشىلەردىڭ ەڭبەكتەرى ۇسىنىلدى.
«ناۋرىزنامانىڭ ونكۇندىگى اياسىندا كەشە ەكسكۋرسيا وتباسىلىق قۇندىلىقتار كۇنىنە ارنالعان. قولدانبالى ونەر قازاقستان حالقىنىڭ داستۇرلەرى مەن مادەني مۇراسىن بەينەلەيدى. ءبىزدىڭ جاستار مەن بولاشاق ۇرپاق شاڭىراقتىڭ نە ەكەنىن ءبىلۋى كەرەك. كورمە اياسىندا وننان استام گوبەلەن، ۇلتتىق ستيلدەگى زەرگەرلىك بۇيىمدار، كيىز، بىلعارى بۇيىمدار، كەستە تىگۋ، توقۋ، اعاشتان جاسالعان بۇيىمدار ۇسىنىلعان»، - دەدى مۇراجاي پەداگوگيكاسى جانە ەكسكۋرسيا بيۋروسىنىڭ جەتەكشىسى گۇلنار جۋۆانيازوۆا.
ءىس-شارا بارىسىندا مۇراجاي قىزمەتكەرلەرى كيىز ءۇيدىڭ نەگىزگى بولىكتەرىنىڭ ءبىرى - شاڭىراق تۋرالى قىزىقتى اقپاراتتارمەن ءبولىستى، سونداي-اق ۇلتتىق ونەر بۇيىمدارىن جاساۋ داستۇرلەرى مەن تەحنولوگيالارى تۋرالى ەگجەي-تەگجەيلى ايتىپ بەردى.
«شاڭىراق - ءبىزدىڭ تىرەگىمىز. جالپى كيىز ءۇي - بۇل ەجەلگى داۋىردەن كەلە جاتقان كوشپەندىلەردىڭ دۇنيەتانىمى. شاڭىراق كيەلى ماعىناعا يە، شەكسىزدىكتى، ماڭگىلىكتى بەينەلەيدى، ول تۇركى حالىقتارى ءۇشىن كيىز ءۇيدىڭ سىندارلى ەلەمەنتى عانا ەمەس، سونىمەن قاتار كوپتەگەن نانىم مەن عۇرىپپەن ۇشتاسقان قاسيەتتى نىسان. بۇل قاسيەتتى ماعىنا ونى قازاقتار ءۇشىن ەرەكشە ەتەدى. شاڭىراق ءۇيدى، ءۇي وشاعىن جانە رۋدىڭ جالعاسىن بەينەلەيدى، بۇل ونىڭ قازىرگى قازاقستاننىڭ ەلتاڭباسىندا بولۋىن تۇسىندىرەدى. شاڭىراق ۇرپاقتان- ۇرپاققا جالعاسىپ كەلە جاتقان وتباسىلىق جادىگەر بولدى جانە ونىڭ ماڭىزى اسىرەسە اكەسىنە تيەسىلى قارا شاڭىراققا- شاڭىراققا قۇرمەتپەن قارايتىن ۇلدارى ءۇشىن وتە ماڭىزدى بولدى. قازاقتار شاڭىراققا قاراپ ماڭىزدى انت بەردى»، - دەدى ەكسكۋرسيا وتكىزۋشى شولپان نۇعىمانوۆا.
ايتا كەتەيىك، مۇمكىندىگى شەكتەۋلى ادامدار ءۇشىن ونەرمەن تانىسۋدىڭ تاكتيلدى ءادىسى قاراستىرىلعان، «جاناسۋ» شاعىن ەكسپوزيتسياسى جاسالعان، ەكسپوناتتاردى قولمەن ۇستاۋعا بولادى.
اۆتور
دۋمان ارعىنگەلدى
