شاتىردىڭ توبەسى - راس-ءال-حايما قازاقستاندىق تۋريستەرگە نە ۇسىنادى
راس-ءال-حايما. KAZINFORM - بىرىككەن اراب امىرلىگىنىڭ راس-ءال-حايما قالاسى قازاقستاندىقتار اراسىندا تانىمال باعىتقا اينالىپ كەلەدى.
وتكەن جىلى وندا 65 مىڭ وتانداسىمىز بارىپ، قازاقستان تۋريستەرى ءجيى كەلگەن توپ-3 مەملەكەت قاتارىنا ەنگەن. راس-ءال-حايما امىرلىگى تۋريزمدى دامىتۋ باسقارماسىنىڭ باس ديرەكتورى راكي فيلليپس قازاقستاندىقتار قانداي كورىكتى ورىندارعا بارا الاتىنىن، قولايلى ساياحات ءۇشىن قانداي شارالار قولعا الىنعانىن ايتىپ بەردى.
راس-ءال-حايما - اراب تىلىنەن اۋدارعاندا «شاتىردىڭ توبەسى» دەگەن ماعىنانى بىلدىرەدى. ول بىرىككەن اراب امىرلىكتەرىنىڭ ەڭ سولتۇستىك بولىگىندە ورنالاسقان، سوندىقتان جازعى ۋاقىتتا سالىستىرمالى تۇردە اۋا رايى قولايلىراق. تۋريستەردى امىرلىكتىڭ تاۋى، تەڭىزى، ورمانى، وعان قوسا ساحارا ءشول دالاسى قاتتى قىزىقتىرادى.
قازاقستان رەسپۋبليكاسىنىڭ ازاماتتارى بىرىككەن اراب امىرلىكتەرىندە 30 كۇنگە دەيىن ۆيزاسىز جۇرە الادى. راس-ءال-حايماعا كولىكپەن دۋباي اۋەجايىنان 45 مينۋتتا، كورشىلەس شاردجا اۋەجايىنان 30 مينۋتتا جەتۋگە بولادى. وعان قوسا، بيىل استانادان راس-ءال-حايما اۋەجايلارىنا تىكەلەي رەيس اشۋ جوسپارلانىپ وتىر.
«ءبىز قازاقستانمەن جانە «ەير استانا» سەكىلدى اۋە كومپانيالارىمەن تىعىز ىنتىماقتاستىقتا جۇمىس ىستەپ جاتىرمىز. بيىل 15- ناۋرىزدان باستاپ، ناۋرىز مەرەكەسى قارساڭىندا استانادان راس-ءال-حايماعا تىكەلەي اۋە رەيستەرى قايتا اشىلاتىنىن قۋانىشپەن حابارلايمىن. ءبىزدىڭ اۋەجايدىڭ باعاسى دا ءتيىمدى، ساياحاتتاۋعا دا ىڭعايلى. ۇشاقتان تۇسكەن بويدا از ۋاقىتتا 64 شاقىرىمعا سوزىلعان اق قۇمدى جاعاجايىمىزعا جەتۋگە بولادى. اراب حالقىنىڭ بىرەگەي قوناقجايلىلىعى دا قازاقستاندىقتارعا ۇناۋى ءتيىس»، - دەدى ر. فيلليپس اگەنتتىك تىلشىسىنە بەرگەن سۇحباتىندا.
ەڭ ەجەلگى امىرلىك
زەرتتەۋشىلەر راس-ءال-حايمانىڭ 7 مىڭ جىلدان استام تاريحى بارىن انىقتادى. پارسى شىعاناعى جاعاسىندا ساۋدا پورتتارى سالىنىپ، ءىنجۋ-مارجان ساۋداسى قىزعان. مۇندا تۋريستەر ⅩⅨ عاسىردا تۇرعىزىلعان دايا بەكىنىسىن تاماشالاي الادى. بەكىنىس 70 مەترلىك توبەدە سالىنعان جانە 239 باسپالداقپەن كوتەرىلىپ، پارسى شىعاناعىن، قۇرما باقتارى مەن دجەبەل-دجەيس تاۋلارىن تاماشالاۋعا بولادى.
تاريح سۇيەتىن ساياحاتشىلاردى ءال-جازيرا-ءال-حامرا كونە قالاشىعى دا قىزىقتىرا الادى، بۇل - پارسى شىعاناعىنداعى بالىقشىلار مەن ءىنجۋ جيناۋشىلاردىڭ بۇگىنگى كۇنگە دەيىن ساقتالعان جالعىز اۋىلى. ءال-جازيرا ءال-حامرا بارلىق ءداستۇرلى ەلەمەنتتەردى قامتيدى، سونىڭ ىشىندە فورت پەن كۇزەت مۇنارالارى، مەشىت، بازار جانە ءارتۇرلى ديزاينداعى ۇيلەر بار. كەي جەردە كوراللدان سالىنعان ۇيلەر ساقتالعان. تۋريستىك ساپارلاردان بولەك، كەيدە سۋرەتشىلەر اشىق اسپان استىندا شاعىن كورمەلەرىن وتكىزىپ تۇرادى.
ودان بولەك، راس-ءال-حايما ۇلتتىق مۋزەيى امىرلىكتىڭ مادەني ءارى كورىكتى ورنى سانالادى. باستاپقىدا بيلەۋشى ءامىر رەزيدەنتسياسى، كەيىنىرەك پوليتسيا ءبولىمى بولعان بۇل بەكىنىس 1987-جىلى تۇپكىلىكتى مۋزەيگە اينالدى. كەلۋشىلەر تاريحي، ەتنوگرافيالىق جانە ارحەولوگيالىق ماتەريالداردى تاماشالاپ، ايماق تۇرعىندارىنىڭ ءومىرى مەن تىرشىلىگىنەن حاباردار بولادى. ينتەراكتيۆتى ەتنوگرافيالىق ديسپلەيدە امىرلىكتەگى ءومىر، ءىنجۋ-مارجان ىزدەۋشىلەر، قۇرما شارۋاشىلىعى، بالىق اۋلاۋ، ەگىنشىلىك تۋرالى اقپارات بەرىلەدى.
اراب امىرلىكتەرىنىڭ ەڭ بيىك شىڭى
بىرىككەن اراب امىرلىكتەرىنىڭ ەڭ بيىك نۇكتەسى راس-ءال-حايمادا ورنالاسقان. بۇل - تەڭىز دەڭگەيىنەن 1934 مەتر بيىكتىكتەگى دجەبەل دجەيس شىڭى. بۇگىندە دجەبەل دجەيس ءتۇرلى ەكستريم سپورت تۇرلەرىن ۇسىنىپ وتىر. مۇندا الەمدەگى ەڭ ۇزىن زيپلايندا تۋريستەر 1680 مەتر بيىكتىكتە تەرەڭ سايلار، كانوندار مەن جارتاستى شىڭدار ارقىلى 120-150 ك م/ساعات جىلدامدىقپەن ۇشادى.
ال Jais Slider اتتراكتسيونى 40 ك م/ساعات جىلدامدىقتا تاۋ ىشىندە 2 شاقىرىمعا جۋىق جول جۇرۋگە مۇمكىندىك بەرەدى. رەلس ۇستىندەگى شانا بۇكىل وتباسى مۇشەلەرى ءۇشىن قولايلى بولماق.
سونىمەن بىرگە، اراب امىرلىكتەرىنىڭ ەڭ بيىك مەيرامحاناسى - 1484 مەتر بيىكتىكتە ورنالاسقان «1484 by Puro» كەلۋشىلەرگە ۇمىتىلماس اسەر سىيلايدى. پانورامالىق تەرەزەدەن نەمەسە مەيرامحانا تەرراسساسىنان تاۋلارعا عاجاپ كورىنىس اشىلادى. مۇندا ءتۇرلى ەلدەن جينالعان اسپازدار الەمىنىڭ ءتۇرلى اسحاناسىنان ءدامدى تاعامدار ۇسىنادى.
ەلدەگى جالعىز ءىنجۋ-مارجان فەرماسى
راس-ءال-حايما عاسىرلار بويى ءىنجۋ-مارجان وندىرۋىمەن تانىلدى، وسىنىڭ ارقاسىندا ايماقتاعى ەڭ ءىرى ساۋدا پورتتارىنىڭ بىرىنە اينالدى. ەجەلگى زاماندا سۇڭگۋىرلەر ءومىرىن قاتەرگە تىگىپ، مۇرنىن قىسقىشپەن، قۇلاعىن بالاۋىزبەن جاۋىپ، سۋ استىنان قابىرشاقتار جينايتىن. ونىڭ قايسىسىنان ءىنجۋ تابىلارى دا بەلگىسىز. سەبەبى قابىرشاق ىشىنە تۇسكەن بوگدە زات، توپىراق، تاس قيىرشىعىنان قورعانۋ ءۇشىن ميديا ءىنجۋ قاباتىن بولە باستايدى. وسىلايشا، قابىرشاقتان تابىلعان ءاربىر مارجان كولەمىنە، فورماسىنا، تۇسىنە، جىلتىرىنا قاراي ءار ءتۇرلى باعالانادى.
كەيىنىرەك قولدان مارجان ءوندىرۋ تەحنولوگياسى پايدا بولدى، مۇنايدىڭ تابىلۋى دا ءداستۇرلى مارجان جيناۋ جۇمىسىن باسەڭدەتتى. ال 2005-جىلى كاسىپكەر ابدۋللا ءال سۋايدي ەسكى ءداستۇرلى جانداندىرىپ، اراب امىرلىكتەرىندەگى جالعىز مارجان فەرماسىن اشتى. وندا ميديالارعا قولدان يمپلانت سالىنىپ، مارجان ءوندىرۋ ءىسى تۇراقتى جولعا قويىلعان. ءوز كەزەگىندە تۋريستەر «Suwaidi Pearls» فەرماسىنا ەكسكۋرسياعا بارىپ، مارجان ءوندىرۋ تاريحىمەن تانىسا الادى. باعىن سىناپ، قابىرشاق اراسىنان مارجان ىزدەپ، دايىن اشەكەي بۇيىمدار ساتىپ الادى.
ءشول دالادا دەمالۋدى قالايتىندار ءال-ۆادي تابيعي قورىعىنا بارا الادى. بۇل ءشول دالا اقبوكەنى - وريكس پەن قاراقۇيرىقتاردىڭ تابيعي مەكەنى. اق وريكس - بىرىككەن اراب امىرلىكتەرىنىڭ ۇلتتىق جانۋارى جانە 1970-جىلدارى جويىلۋ الدىندا تۇرعان جانۋاردىڭ سانى كوبەيدى. ودان بولەك، تۋريستەر دجيپ نەمەسە ات، تۇيە ۇستىندە سەرۋەن قۇرىپ، قۇمدا سىرعاناپ، ءشول ورتاسىندا تۇسكى اس ىشە الادى. كەشكى ۋاقىتتا شوۋ باعدارلامالار مەن اراب حالقىنىڭ ءداستۇرلى ءان-كۇيلەرى كورسەتىلەدى.
اۆتور ايجان سەرىكجان قىزى
