شارم-ەش-شەيح اۋەجايىندا ءۇش قازاقستاندىققا جارناما تاقتاسى قۇلادى
استانا. KAZINFORM - مىسىردىڭ ازاماتتىق اۆياتسيا مينيسترلىگى Kazinform اگەنتتىگىنىڭ رەسمي ساۋالىنا جولداعان جاۋابىندا شارم-ەش-شەيح حالىقارالىق اۋەجايىندا بولعان وقيعاعا رەسمي تۇسىنىك بەردى.
ق ر سىرتقى ىستەر مينيسترلىگى باسپا ءسوز قىزمەتىنىڭ حابارلاۋىنشا، كەشە شارم-ەش-شەيح اۋەجايىندا رەيستى كۇتىپ تۇرعان جولاۋشىلار تۇرعان اۋماقتا جارناما تاقتاسى قۇلادى. وقيعانىڭ سالدارىنان قازاقستاندىق ايەل مەرت بولدى، تاعى ەكى وتانداسىمىز جاراقات الدى.
وقيعا بىلاي بولعان: شارم-ەش-شەيح حالىقارالىق اۋەجايىنىڭ №2 ۇشۋ زالىندا Al-Ahram Advertising Agency جارناما اگەنتتىگىنە تيەسىلى جارنامالىق تاقتايشا كەنەت قۇلاپ تۇسكەن. وقيعا سالدارىنان استاناعا ۇشاتىن SCAT Airlines اۋە كومپانياسىنىڭ DV 2570 رەيسىن كۇتىپ وتىرعان ءۇش جولاۋشى - قازاقستان رەسپۋبليكاسىنىڭ ازاماتتارى (ۇشەۋى دە ايەل ادام - رەد.) جاراقات الدى. وقيعا ورنىنا شۇعىل تۇردە قۇتقارۋشىلار كەلىپ، زارداپ شەككەندەرگە العاشقى مەديتسينالىق كومەك كورسەتتى.
زارداپ شەككەندەر مەن مارقۇمنىڭ وتباسىنا قانداي كومەك كورسەتىلدى؟
بارلىق زارداپ شەككەن ادامدارعا جەدەل تۇردە مەديتسينالىق كومەك كورسەتىلدى. وكىنىشكە قاراي، ايەلدەردىڭ ءبىرى العان جاراقاتىنان شارم-ەش-شەيح حالىقارالىق اۋرۋحاناسىندا قايتىس بولدى. قالعان ەكى جولاۋشى اۋرۋحاناعا جاتقىزىلدى، ولاردىڭ جاعدايى تۇراقتى قالىپتى.
زارداپ شەككەن ايەلدىڭ ءبىرى مەن ونىڭ قىزىنا قوناقۇيدەن بولمە بەرىلدى، تولىق لوگيستيكالىق قولداۋ كورسەتىلدى. قازا تاپقان ايەلدىڭ ۇلى دا جاتىن ورىنمەن قامتاماسىز ەتىلدى. قازاقستان ەلشىلىگىمەن بارلىق قاجەتتى كونسۋلدىق، قۇقىقتىق جانە گۋمانيتارلىق كومەكتەر كورسەتۋ بويىنشا جۇمىس جۇرگىزىلىپ جاتىر.
تەرگەۋ جۇرگىزىلىپ جاتىر ما؟
وقيعا تۋرالى اقپارات بىردەن پروكۋراتۋرا ورگاندارىنا جولداندى. رەسمي تۇردە قىلمىستىق تەرگەۋ باستالدى. اۋەجاي اكىمشىلىگى مەن جارناما اگەنتتىگىنىڭ وكىلدەرى جان-جاقتى جانە اشىق تەرگەۋ ءجۇرۋى ءۇشىن قۇقىق قورعاۋ ورگاندارىمەن ىنتىماقتاسا ىسكە اتسالىسىپ جاتىر.
جاۋاپتى تۇلعالار انىقتالىپ، قولدانىستاعى زاڭناماعا سايكەس جاۋاپقا تارتىلادى.
مينيسترلىك سونداي-اق، تەرگەۋ امالدارى جالعاسىپ جاتقاندىقتان، بەينەباقىلاۋ كامەرالارىنداعى جازبالار نەمەسە رەسمي ۆيزۋالدى قۇجاتتار تەك تەرگەۋ ورگاندارىنىڭ شەشىمىمەن عانا جاريا ەتىلۋى مۇمكىن ەكەنىن اتاپ ءوتتى. رۇقسات الىنعان جاعدايدا، ماتەريالدار زاڭدا بەلگىلەنگەن راسىمدەرگە جانە مۇددەلى تاراپتارمەن كەلىسىم بويىنشا ب ا ق- قا بەرىلەدى.
ەستەرىڭىزگە سالا كەتەيىك، بۇعان دەيىن شارم- ەش- شەيح اۋەجايىندا ءۇش قازاقستاندىق ازاماتتىڭ ۇستىنە جارناما تاقتاسى قۇلاعانىن جازعان ەدىك.
