ۇشاقتىڭ توبەسىندە ويناپ ءجۇر: اقتوبەلىكتەر ءالى اشىلماعان سكۆەردى قيراتىپ جاتىر
اقتوبە. KAZINFORM - ت. بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتى جانىندا سالىنىپ جاتقان سكۆەر بىلتىر قولدانىسقا بەرىلۋى ءتيىس ەدى. مەردىگەر مەن اكىمدىك اراسىندا سوت بولىپ، قۇرىلىس ءالى اياقتالماي تۇر. ال اقتوبەلىكتەر بولسا مۇلىكتى قيراتۋعا كوشكەن.
اقتوبە قالاسىنداعى ايگىلى اسكەري ينستيتۋت جانىندا تۇرعان جاڭا سكۆەر كوپتى وزىنە تارتادى. مۇندا ۇشاقتار مەن تىكۇشاقتار تۇر. ءبارى دە ءبىر كەزدەرى اسكەري ماقساتتا قولدانىلعان. بۇل ورىن بۇرىن وتان قورعاۋشىلار كۇنى اشىلىپ، تانىمدىق شارا وتكىزەتىن جەر بولسا، اكىمدىك سوڭعى جىلدارى جەردى الىپ، دەمالىس ورنىن اشۋدى جوسپارلادى. بۇل جەردەگى قۇرىلىس بىلتىر اياقتالۋى ءتيىس بولاتىن.
- «ۇشقىشتار ۋچيليشەسى سكۆەرىن» اباتتاندىرۋى ءتيىس مەردىگەر ۇيىم - «مەگاسترويسپەكتر» ج ش س. كەلىسىمشارتقا سايكەس جۇمىستار 2023 -جىلدىڭ جەلتوقسانىندا اياقتالۋى كەرەك ەدى. «مەگاسترويسپەكتر» ج ش س جۇمىستى مەرزىمىندە اياقتاماي، اقتوبە قالالىق تۇرعىن ءۇي-كوممۋنالدىق شارۋاشىلىق ءبولىمى مەملەكەتتىك ساتىپ الۋعا قاتىسۋعا لايىقسىز دەپ تانۋ جانە تۇراقسىزدىق ايىبىن ءوندىرىپ الۋ ءۇشىن سوتقا تالاپ ارىز بەردى. بۇدان سوڭ مەردىگەر جۇمىستاردى بيىل اياقتاۋ تۋرالى مىندەتتەمە الدى. قازىرگى ۋاقىتتا جۇمىستى جالعاستىرۋعا دايىندىق جۇرگىزىلىپ جاتىر. قالا تۇرعىندارىنان جۇمىستار اياقتالعانعا دەيىن الاڭعا بارماۋىن، سونداي- اق ول جەردە تۇرعان مۇلىكتىڭ بۇلىنۋىنە جول بەرمەۋدى سۇرايمىز. ەگەر سىزدەر ۆاندالدىق ارەكەتتەردىڭ كۋاسى بولساڭىز، بۇل تۋرالى دەرەۋ پوليتسياعا حابارلاۋىڭىزدى سۇرايمىز»، - دەپ حابارلادى اقتوبە قالاسى اكىمىنىڭ باسپا ءسوز قىزمەتى.
ايتا كەتەيىك، بۇل جەرگە بالالاردىڭ ويىن الاڭى سالىنىپ، ادامدار جۇرۋگە ارنالعان جولعا ءىشىنارا تاس توسەلگەن. قوقىس جاشىكتەرى دە قويىلعان. جوبا قۇنى - 130 ميلليون تەڭگە.
اقتوبە قالاسىنداعى سكۆەرگە كىرۋ ەسىگى جابىق تۇرعانىمەن، قورشاۋدىڭ كەتىك جەرىنەن وڭاي وتۋگە بولادى. مۇندا كەلگەن وتباسىلار بالالارىن ۇشاق، تىكۇشاق ىشىنە كىرگىزىپ، ءتىپتى توبەسىنە مىنۋگە، قاناتىندا جۇرۋگە رۇقسات بەرىپ قويعان. مۇندا پوليتسيا، كۇزەت تە كورىنبەيدى.
اۆتور
التىناي ساعىندىقوۆا
