ۇشاقتىڭ اپاتتى ەسىگىن اشقان جولاۋشى الماتى پوليتسياسىنا تاپسىرىلدى
ۇشاقتىڭ اپاتتى جاعدايعا ارنالعان قوسالقى ەسىگىن نەگىزسىز اشقان جولاۋشى الماتى پوليتسياسىنا تاپسىرىلدى، دەپ حابارلايدى kazinform.
«قازىرگى ۋاقىتتا الەۋمەتتىك جەلىلەردە جولاۋشى ۇشاقتىڭ اپاتتىق ەسىگىن وزدىگىنەن اشىپ جاتقان ۆيدەو تارالىپ جاتىر. وسىعان بايلانىستى ازاماتتىق اۆياتسيا كوميتەتى كەلەسىنى حابارلايدى: 2023-جىلعى 23- جەلتوقساندا «شىمكەنت - الماتى» باعىتى بويىنشا FlyArystan اۋە كومپانياسىنىڭ ك س7106 رەيسى جەرگىلىكتى ۋاقىت بويىنشا ساعات 01:19 دا قونعاننان كەيىن جولاۋشى اپاتتىق ەسىكتى اشتى. بورت تەكسەرىلىپ، ۇشۋلاردى ورىنداۋعا رۇقسات ەتىلدى. جولاۋشى شارا قولدانۋ ءۇشىن ىشكى ىستەر مينيسترلىگى قىزمەتكەرلەرىنە تاپسىرىلدى»، - دەلىنگەن ازاماتتىق اۆياتسيا كوميتەتىندە.
ءمالىم ەتىلگەندەي، جاعدايدىڭ ءمان-جايىن انىقتاۋ ءۇشىن قازاقستاننىڭ اۆياتسيا اكىمشىلىگى ءتيىستى تەكسەرۋ جۇرگىزەدى.
«تەكسەرۋ ەسىكتى ءوز بەتىمەن اشقان جولاۋشىعا دا، اۆتوتراپ بەرۋگە جاۋاپتى اۋەجاي قىزمەتتەرىنە دە قاتىستى جۇرگىزىلەتىن بولادى»، - دەلىنگەن ۇسىنىلعان حابارلامادا.
