ۇشاق اپاتى. تۇركى مەملەكەتتەرى ۇيىمى مالىمدەمە جاسادى
استانا. KAZINFORM - تۇركى مەملەكەتتەرى ۇيىمى اقتاۋ ماڭىنداعى ۇشاق اپاتىندا قازا تاپقانداردىڭ وتباسىلارىنا كوڭىل ايتتى. بۇل تۋرالى ازەرتادج حابارلادى.
- قازاقستاننىڭ اقتاۋ قالاسىنىڭ ماڭىندا «ازەربايجان حاۆا يوللارى» كومپانياسىنا تيەسىلى ۇشاق «باكۋ-گروزنىي» باعىتىنداعى رەيستى ورىنداۋ بارىسىندا اپاتقا ۇشىراعانى تۋرالى حاباردى اۋىر قابىلدادىق. قازا تاپقانداردىڭ وتباسىلارىنا كوڭىل ايتامىز، جارالانعانداردىڭ تەزىرەك ساۋىعىپ كەتۋىن تىلەيمىز. ءبىزدىڭ بارلىق وي مەن دۇعامىز وسى قايعىلى وقيعادان زارداپ شەككەن باۋىرلارىمىزبەن بىرگە. وسى قايعىلى كەزەڭدە ءبىز زارداپ شەككەن بارلىق مەملەكەتتەردىڭ حالىقتارىنا شىدامدىلىق تىلەيمىز جانە كوڭىل ايتامىز، - دەلىنگەن تۇركى مەملەكەتتەرى ۇيىمىنىڭ «ازەربايجان حاۆا يوللارى» اۋەكومپانياسىنا تيەسىلى ۇشاقتىڭ اپاتقا ۇشىراۋىنا قاتىستى مالىمدەمەسىندە.
ەسكە سالساق، ازەربايجان ەلورداسى باكۋدەن رەسەيدىڭ گروزنىي قالاسىنا باعىت العان اۋە كەمەسى قازاقستان اۋماعىندا اپاتقا ۇشىرادى.
بۇعان دەيىن ەلىمىزدىڭ توتەنشە جاعدايلار مينيسترلىگى اقتاۋ قالاسى ماڭىنداعى اۋە اپاتىنان مەرت بولعان وتانداستارىمىزدىڭ اتى-ءجونىن جاريالادى.
سونداي-اق، ۇشاق اپاتىنان قازا تاپقان ازەربايجاندىقتاردىڭ ءمايىتى جاقىن ارادا ەلدەرىنە جىبەرىلەتىنى ايتىلدى.
اۆتور
اينۇر تۋماكبايەۆا
