شاكىرتى 42 ەلدەن شاقىرتۋ العان ۇستازعا تۇركىستان وبلىسىنىڭ اكىمى كولىك سىيلادى
تۇركىستان. KAZINFORM - ۇستازدار مەرەكەسىنە وراي ۇيىمداستىرىلعان سالتاناتتى جيىنعا قاتىسقان تۇركىستان وبلىسىنىڭ اكىمى دارحان ساتىبالدى ءبىلىم سالاسىندا ايانباي ەڭبەك ەتكەن بارشا ۇستازدار قاۋىمىن كاسىبي مەرەكەمەن قۇتتىقتادى.
ءوڭىر باسشىسى رەسپۋبليكالىق، وبلىستىق وليمپيادا جانە سپورت جارىستارىنىڭ جەڭىمپازدارىن دايىنداعان 30 مۇعالىمگە ءوز اتىنان ماراپات ۇسىنىپ، ارنايى سىيلىقتار تابىستادى. ونىڭ ىشىندە 10 ۇستاز «التىنسارين» توسبەلگىسى مەن 20 پەداگوگ «قۇرمەت گراموتاسىن» الىپ، 200 مىڭ تەڭگە كولەمىندە اقشالاي سىياقىمەن ىنتالاندىرىلدى. سونداي-اق، كوپتى تاڭعالدىرعان كەشتىڭ كۋلميناتسيا توسىنسىيىمەن جالعاستى. دارحان امانگەلدى ۇلى شاكىرتى 42 ەلدەن شاقىرتۋ العان «تۇركىستان ءبىلىم- يننوۆاتسيا» ليتسەيىنىڭ گەوگرافيا ءپانىنىڭ مۇعالىمى باستامي ارعىن ەرجان ۇلىنا كولىك كىلتىن تابىستادى. بۇدان بولەك، وقۋشىلارى رەسپۋبليكالىق وليمپيادانىڭ جەڭىمپازى بولعان جانە وبلىستىق، رەسپۋبليكالىق بايقاۋلاردىڭ جۇلدەگەرى اتانعان تولەبي اۋدانى، قوسان مامىتوۆ اتىنداعى مەكتەبىنىڭ بيولوگيا ءپانىنىڭ مۇعالىمى، 6 بالانىڭ اناسى نۇريللا بايماحان قىزىنا نوۋتبۋك سىيلادى.
«قۇرمەتتى ۇستازدار! بارشاڭىزدىڭ وتباسىلارىڭىزعا - اماندىق، دەندەرىڭىزگە ساۋلىق، ەڭبەكتەرىڭىزگە تابىس تىلەيمىن. مەرەكە قۇتتى بولسىن! ۇستاز - جاي ءبىلىم بەرەتىن ماماندىق يەسى ەمەس. ول - ەكىنشى اتا-انا، تاربيەنىڭ دە قاينار كوزى. ءبارىمىز دە ۇستازدارعا قارىزدارمىز. سوندىقتان ۇلاعاتتى ۇستازداردىڭ الدىندا بارلىق ادام قۇرمەتپەن باس يەدى»، - دەگەن دارحان ساتىبالدى ءبىلىم سالاسىندا جەتكەن جەتىستىكتەرمەن دە ءبولىسىپ، ەلەۋلى ەڭبەكتىڭ ءبارى ۇستازداردىڭ قاجىرلى ەڭبەگىنىڭ جەمىسى ەكەنىن اتاپ ءوتتى.
ۇستازدار قاۋىمى كوتەرىڭكى كوڭىل كۇيمەن ارنايى جايىلعان داستارحاندا قوناق بولىپ، بالالاردىڭ ازىرلەگەن مەرەكەلىك كونسەرتىن تاماشالادى. ونەرلى ۇل-قىزدار ءان مەن بيدەن شاشۋ شاشتى.
ايتا كەتەرلىگى، تۇركىستان وبلىسىندا جالپى 85112 پەداگوگ سانالى ۇرپاققا ساپالى ءبىلىم بەرىپ كەلەدى.
اۆتور
الما مۇقانوۆا
