شاكەن ايمانوۆ تاڭداپ العان: قازاقتىڭ تۇڭعىش ديكتورىن بىلەسىز بە؟

استانا. قازاقپارات – 20- اقپان - قازاق تەلەۆيزياسىنىڭ تۇڭعىش ديكتورى زۇلقيا جۇماتوۆانىڭ تۋعان كۇنى. وسى ورايدا 103 جاسقا اياق باسقان جۋرناليست جايلى دەرەكتەر ۇسىنامىز.

«قازاق ديكتورلارىنىڭ اناسى» اتانعان زۇلقيا مۇقان قىزى 1920 -جىلى 20-اقپاندا پاۆلودار وبلىسىنىڭ باياناۋىل اۋدانىندا دۇنيەگە كەلگەن. 1958 -جىلى تۇڭعىش رەت قازاق تىلىندە حابار تاراتتى. جۇماتوۆا الدىمەن بالالار باعدارلاماسىنا رەداكتور بولۋعا بارادى. سول جەردە رەجيسسەر شاكەن ايمانوۆ ونىڭ سويلەۋ مانەرى مەن داۋسىنىڭ ەرەكشەلىگىن بايقاپ، كونكۋرسقا قاتىسىپ جاتقان 750 ۇمىتكەردىڭ ىشىنەن تاڭداپ العان. وسىلايشا ويلاماعان جەردەن 37 جاسىندا ديكتور قىزمەتىنە كىرىسەدى.

1958 -جىلدىڭ 8-ناۋرىزىنان باستاپ قازاق تىلىندە زۇلقيا جۇماتوۆا، ورىس تىلىندە نەللي وماروۆا ەفيرگە شىعىپ، ءتۇرلى باعدارلامالار جۇرگىزدى. تەلەديدارعا تەلمىرگەن قازاق اۋديتورياسى ديكتورلاردى ۇيىپ تىڭدادى.

زۇلقيا جۇماتوۆا يۋري ليەۆيتان، نينا كوندراتوۆا سياقتى وداققا ايگىلى ديكتورلارمەن تاجىريبە الماستى. جۇماتوۆا سول قارا شاڭىراقتا 1970 -جىلعا دەيىن قىزمەت ەتتى.

زۇلقيا مۇقان قىزى جاستايىنان تاعدىر تەپەرىشىن كوردى. اتا-اناسىنان ەرتە ايىرىلىپ، باۋىرلارىنىڭ ءومىرى ءۇشىن جاۋاپكەرشىلىك الدى. سوعىس جىلدارىندا تىلدا ەڭبەك ەتتى. زاۋىتتا دا جۇمىس ىستەدى. زۇلقيا ديكتور بولماستان بۇرىن ولەڭ جازىپ، اۋدارمامەن اينالىسقان.

2023 -جىلى زۇلقيا جۇماتوۆانىڭ ءومىرى مەن شىعارماشىلىعى جايلى «ءومىر ءوتىپ بارادى كورگەن تۇستەي…» اتتى كىتاپ جارىققا شىقتى.

دارا تۇلعانىڭ ءومىرى مەن ەڭبەگى ءبۇتىن ۇرپاققا ۇلگى-ونەگە. «قازاق ديكتورلارىنىڭ اناسى» ادامدىقتان اسقان اتاق جوق دەيدى.

ماتەريالدى دايىنداعان: عاينيجامال ارىستانبەك