شاۆكات نەگە يرلانديالىق قارسىلاسىن ارەڭ جەڭدى
جەلتوقساننىڭ باسىندا وتانداسىمىز شاۆكات راحمونوۆ UFC 310 جارىسىندا يرلانديالىق يەن ماچادو گارريمەن جەكپە- جەككە شىعىپ، جەڭىسكە جەتتى.
الايدا كەزدەسۋدىڭ سوڭىنا قاراي يرلانديالىق سپورتشى شاۆكاتقا قىلقىندىرۋ ءادىسىن جاساپ، جانكۇيەرلەردى ءبىر ءدۇر سىلكىندىرگەن ەدى. ياعني، وتانداسىمىز ءسال شىدامدىلىق كورسەتپەگەندە جەڭىلىسكە ۇشىراۋى مۇمكىن ەدى.
جەكپە-جەكتىڭ نەلىكتەن بۇلاي اۋىر وتكەنىن، وتانداسىمىز نەگە كەزدەسۋدى ۋاقىتىنان بۇرىن اياقتاي الماعانىن Kazinform تىلشىسىنە شاۆكات راحمونوۆتىڭ وكىلى باۋىرجان وتاليەۆ ايتىپ بەردى.
ونىڭ سوزىنشە، شاۆكاتتىڭ جەكپە-جەكتى اۋىر وتكىزۋىنىڭ كوپتەگەن سەبەبى بار.
- امەريكاعا ۇشارعا دەيىن شاۆكات اياعىنان جاراقات الدى، مەديالدى كوللاتەرالدى بايلامى جىرتىلعان ەكەن. ءبىراز ۋاقىت گيپس تاعىپ، سەكىرە دە الماي قالعان بولاتىن.
امەريكاعا كەلگەننەن كەيىن قارسىلاس بولادى دەپ كۇتىلگەن بەلال مۇحامەدتىڭ جاراقات الىپ، جەكپە-جەكتەن باس تارتىپ جاتقانىن ەستىدىك. وسىنىڭ ءبارى شاۆكاتتىڭ كوڭىل-كۇيىنە كەرى اسەر ەتتى. اياقتان جاراقات العانى ازداي، جوسپار بۇزىلدى، - دەيدى Dar Pro Team كومانداسىنىڭ جەتەكشىسى.
وتاليەۆتىڭ ايتۋىنشا، بەلال مۇحامەد جەكپە- جەكتەن باس تارتقان سوڭ 20 كۇن بويى قازاقستاندىق فايتەر كىمنىڭ قارسىلاس بولاتىنىن بىلە الماعان.
- ءبىز جاتتىعىپ جاتقان زال تىم ۇلكەن بولدى، وندا ءارتۇرلى ۇلت وكىلدەرى توپتاسقان. زالدىڭ ءىشى وتە ىستىق، ينفەكتسيالىق تۇرعىدان قاۋىپ بار ەدى. قارسىلاستىڭ كىم بولارىن بىلمەي جۇرگەنىمىزدە شاۆكاتتىڭ دەنەسى جاتتىعۋلاردان كەيىن تىتىركەنىپ، ينفەكتسيانىڭ العاشقى بەلگىلەرى بايقالعانداي بولدى. دارىگەرلەر بىزگە وسى كەزەڭنەن ءوتۋ ءۇشىن انتيبيوتيكتەر ءىشۋدى ۇسىندى. دەنەسىندە ءسال السىزدىك بايقالسا، ادام قانشا تىرىسسا دا 100 پايىزدىق قالىپتا جاتتىعۋ جاساي المايدى. فيزيكالىق دايىندىقتى ۇستاپ تۇرىپ، توزىمدىلىكتى ارتتىرۋ ءۇشىن شاۆكات امالسىز انتيبيوتيكتەر قابىلدادى، - دەيدى ول.
سونداي- اق باۋىرجان وتاليەۆ شاۆكات يرلانديالىقپەن كەزدەسۋگە اياعىنان العان جاراقاتى ءالى تولىق ايىقپاعان كۇيدە شىققانىن العا تارتتى.
- العا قاراي تىكە جۇرسە سەزىلمەيدى، ءبىراق جانىمەن قيمىلداي باستاسا اياعى اۋىراتىن. جەكپە- جەك اياقتالعاننان كەيىن ساراپتاپ قاراساق، شاۆكات فيزيكالىق دايىندىعىنىڭ 60-70 پايىز دەڭگەيىمەن عانا شىققان ەكەن. ونىڭ جاراقاتىنان قارسىلاس تا حابارسىز بولماعانى انىق. وسىعان قاراماستان، قيىنعا سوققان جەكپە- جەكتە شاۆكات ءۇمىتتى اقتادى، - دەپ تۇيىندەدى ول.
