شاحتينسك تۇرعىنى 40 جاسىندا العاش رەت جەكە كۋالىك الدى
استانا. KAZINFORM — جاڭا جىل قارساڭىندا شاحتينسك قالاسىنىڭ پوليتسيا ءبولىمىنىڭ كوشى-قون قىزمەتى قالا تۇرعىنىنا ەرەكشە سىي جاسادى. 40 جاستاعى ەر ادام ومىرىندە العاش رەت جەكە كۋالىك الدى.
بۇل وقيعا ونىڭ وتباسى ءۇشىن دە ماڭىزدى ءارى قۋانىشتى ساتكە اينالدى.
قاراعاندى وبلىسىندا كوشى-قون قىزمەتى قۇقىقتىق مارتەبەسى انىقتالماعان ازاماتتاردىڭ ماسەلەلەرىن شەشۋ باعىتىندا بەلسەندى جۇمىس ىستەپ كەلەدى. بۇل جۇمىس حالىقتى ەسەپكە الۋ، كوشى-قون باقىلاۋىن جاقسارتۋ جانە ازاماتتاردى الەۋمەتتىك ينتەگراتسيالاۋ تۇرعىسىنان ماڭىزدى ءرول اتقارادى.
2024-جىلى قىزمەت ايتارلىقتاي ناتيجەلەرگە قول جەتكىزدى: قاراۋعا ۇسىنىلعان 22 ءىستىڭ ىشىنەن 14 ادام قازاقستان رەسپۋبليكاسىنىڭ ازاماتتىعىن الىپ، قۇجاتتاندىرىلدى. بۇل كورسەتكىش قىزمەتكەرلەردىڭ جوعارى كاسىبيلىگىن جانە تاباندىلىعىن دالەلدەيدى. ولار اقپاراتتىڭ جەتىسپەۋشىلىگى، قارجىلىق قيىندىقتار مەن ءتۇرلى كەدەرگىلەردى جەڭۋگە كومەك بەرىپ، ازاماتتاردى قولداپ كەلەدى.
— اسىرەسە، شاحتينسك تۇرعىنىنىڭ ۇزاق جىلدار بويى قۇجاتسىز ءومىر سۇرگەن جاعدايى ەرەكشە نازار اۋدارادى. پوليتسيا قىزمەتكەرلەرى بارلىق قاجەتتى قۇجاتتى جيناپ، راسىمدەردى زاڭدى تۇردە اياقتاۋعا كومەكتەسكەن. ناتيجەسىندە ەر ادام العاش رەت جەكە كۋالىككە قول جەتكىزىپ، زاڭدى جۇمىسقا ورنالاسۋ، الەۋمەتتىك ومىرگە ارالاسۋ سياقتى جاڭا مۇمكىندىكتەرگە يە بولدى. شاحتينسك تۇرعىنىنىڭ وقيعاسى ىشكى ىستەر ورگاندارى قىزمەتكەرلەرىنىڭ كاسىبيلىگى مەن ادامگەرشىلىگىنىڭ ايقىن دالەلى سانالادى، — دەلىنگەن كوشى-قون قىزمەتىنىڭ حابارلاماسىندا.
بۇعان دەيىن اقتوبەدە كوشى-قون زاڭناماسىن بۇزعان 400 دەن استام شەتەلدىك ەلدەن شىعارىلعانىن حابارلاعان ەدىك.
