شاڭحايدا وتەتىن قىتاي يمپورتى كورمەسىندە قازاقستان ءوز الەۋەتىن كورسەتەدى

قىتايدىڭ التىنشى حالىقارالىق يمپورتتىق ەكسپو كورمەسى (China International Import Expo) 5-10-قاراشا ارالىعىندا شاڭحاي قالاسىندا وتەدى. قازاقستان بۇل كورمەگە 2018 -جىلدان بەرى قاتىسىپ كەلەدى، دەپ حابارلايدى Kazinform.

«QazTrade ساۋدا ساياساتىن دامىتۋ ورتالىعى» ا ق باس ديرەكتورىنىڭ ورىنباسارى اسەل ەگەمبەرديەۆانىڭ ايتۋىنشا، بيىل شاڭحايعا قازاقستاننان وكىلەتتى دەلەگاتسيا كەلەدى، ونىڭ قۇرامىنا 40 تان استام مەملەكەتتىك، كۆازيمەملەكەتتىك جانە جەكە كومپانيالار كىرەدى.

«بيىل قازاقستان ەكى ستەند ارقىلى تانىستىرىلادى. ءبىرىنشىسى - ەلدىك ستەند. وندا Kazakh Invest, Kazakh Tourism, ق ت ج، ەير استانا، قازپوشتا، ۇ ا ت سياقتى ءىرى ۇلتتىق كومپانيالار ەلىمىزدىڭ ەكسپورتتىق، ينۆەستيتسيالىق، لوگيستيكالىق، يننوۆاتسيالىق جانە تۋريستىك الەۋەتىن تانىستىرادى. اگروونەركاسىپ سالاسىن ەت وداعى، قازاقستاننىڭ مايلى داقىلداردى قايتا وڭدەۋشىلەر ۇلتتىق قاۋىمداستىعى، استىق وداعى جانە ازىق-تۇلىك كورپوراتسياسى كورسەتەدى. ەكىنشى ستەند - كوممەرتسيالىق ستەند، وندا وتاندىق وندىرۋشىلەر قىتاي نارىعىندا جوعارى سۇرانىسقا يە اۋىل شارۋاشىلىعى ونىمدەرىن ۇسىنادى. قازاقستاندىق كاسىپورىنداردىڭ يمپورت كورمەسىنە قاتىسۋى – ق ر ساۋدا جانە ينتەگراتسيا مينيسترلىگى ارقىلى ەكسپورتتى ىنتالاندىرۋ جانە ىلگەرىلەتۋ جونىندەگى مەملەكەتتىك شارالاردىڭ ءبىرى»، - دەدى اسەل ەگەمبەرديەۆا.

حالىقارالىق كورمەگە قاتىسۋ ءۇشىن كومپانيالاردى ىرىكتەۋ كەزىندە ق ح ر مەملەكەتتىك كەدەن باسقارماسى يمپورتتاۋشىلارىنىڭ تىزىلىمىندە تۇرعان، قىتاي نارىعىنا ەكسپورتتاۋعا رۇقسات قۇجاتتارى مەن تاجىريبەسى بار كومپانيالارعا، سونداي-اق ونىمدەرى ماركەتينگ تۇرعىسىنان تارتىمدى كاسىپورىندارعا باسىمدىق بەرىلەدى.

ساراپشىلاردىڭ باعالاۋىنشا، قازاقستاندىق كاسىپورىنداردىڭ قىتايعا 1 ميلليارد دوللاردان استام سوماعا تاۋار جەتكىزۋگە ەكسپورتتىق الەۋەتى بار.

اسەل ەگەمبەرديەۆانىڭ ايتۋىنشا، قىتايلىق تۇتىنۋشىلاردىڭ سۇرانىسىنا يە تاۋارلار قاتارىندا ءداندى داقىلدار، ماي ونىمدەرى، سونداي-اق ونەركاسىپتىك تاۋارلار بار. مال شارۋاشىلىعى ونىمدەرى مەن اۋىل شارۋاشىلىعى جانۋارلارىنا ارنالعان قۇراما جەمگە سۇرانىس جوعارى.

«جىل باسىنان بەرى قىتايلىق سەرىكتەستەرمەن ءبىرقاتار كەزدەسۋلەر وتكىزىلدى، QazTrade ق ر ساۋدا جانە ينتەگراتسيا مينيسترلىگىنىڭ قولداۋىمەن حۋبەي پروۆينتسياسى، ۋحان جانە سيان قالالارىندا بىرنەشە ساۋدا ميسسيالارىن وتكىزدى. كەزدەسۋلەر ناتيجەسىندە استىق، جارما ونىمدەرىن جانە قوسىلعان قۇنى جوعارى تاۋارلاردى وڭدەۋگە ينۆەستيتسيا تارتۋ تۋرالى كەلىسىمدەرگە قول جەتكىزىلدى. ءبىز ءقازىر قىتايلىق كومپانيالار ءۇشىن ساراپتاما دايىنداپ جاتىرمىز. ىنتىماقتاستىقتىڭ بولاشاعى زور»، - دەيدى اسەل ەگەمبەرديەۆا.

QazTrade مالىمەتىنشە، 2022 -جىلى قىتايمەن ءوزارا تاۋار اينالىمى 24 ميلليارد دوللاردى قۇرادى. ونىڭ ىشىندە ەكسپورت 13 ميلليارد دوللاردان استى. اسىرەسە قىتايعا مۇناي جانە ماي ونىمدەرىن جەتكىزۋ 13,5 ەسە ءوستى. قازاقستاننىڭ مايلى داقىلداردى وڭدەۋشىلەر ۇلتتىق قاۋىمداستىعىنىڭ بولجامى بويىنشا، الداعى بىرنەشە جىلدا قازاقستاندىق كاسىپورىندار ەكسپورتتىق الەۋەتىن 300 ميلليون دوللارعا دەيىن ارتتىرا الادى.

بيىل قىتاي يمپورتى كورمەسىنە 137 ەلدىڭ كاسىپورىندارى ءوز تاۋارلارىن ۇسىنادى. ولاردىڭ اراسىندا ءىرى ۇلتتىق كومپانيالار مەن ترانسۇلتتىق كورپوراتسيالار دا بار.

«شاڭحاي ەكسپو كورمەسى - بۇل قىتايلىق سەرىكتەستەر قازاقستاندىق ءونىمنىڭ ساپاسىن ءوز كوزدەرىمەن كورىپ، باعالاي الاتىن اۋقىمدى الاڭ، سوندىقتان مەملەكەت جىل سايىن وعان قاتىسۋعا ۇلكەن كوڭىل بولەدى. كورمە ءبىزدىڭ ءونىم وندىرۋشىلەرگە ۇلكەن مۇمكىندىكتەر بەرەدى، سەنىمدى سەرىكتەستەر تابۋعا جانە تاجىريبە الماسۋعا كومەكتەسەدى»، - دەپ تۇيىندەدى اسەل ەگەمبەرديەۆا.

بەس جىلدا قىتايدىڭ يمپورتتىق كورمەسىنە اۋىل شارۋاشىلىعى ونىمدەرىن وندىرەتىن 160 كومپانيا قاتىسىپ، 260 ميلليون دوللاردىڭ كەلىسىم-شارتىنا قول قويىلدى.