شاڭحاي ينتەرنەت-كونتەنت ورتالىعىنا اينالۋدى كوزدەيدى

استانا. KAZINFORM - شاڭحاي قالاسىنىڭ بيلىگى مەگاپوليستى ساپالى ينتەرنەت-كونتەنت وندىرەتىن حالىقارالىق ورتالىققا اينالدىرۋ ماقساتىندا جاڭا قولداۋ شارالارىن جاريالادى. بۇل تۋرالى Kazinform شينحۋا اگەنتتىگىنە سىلتەمە جاساپ حابارلايدى.

قۇجاتقا سايكەس، حۋانپۋ جانە يانپۋ اۋداندارى جاھاندىق كونتەنت ءوندىرۋ كلاستەرىن قالىپتاستىرۋ ءۇشىن پيلوتتىق ايماقتار رەتىندە بەلگىلەندى. جوعارى تيىمدىلىك كورسەتكەن سيفرلىق پلاتفورمالار، ينكۋباتورلار مەن يندۋستريالىق پاركتەر جىل سايىن 10 ميلليون يۋانعا دەيىن (شامامەن 1,4 ميلليون ا ق ش دوللارى نەمەسە 733 ميلليون تەڭگە) قولداۋ الا الادى.

نەگىزگى قولداۋ شارالارىنا مىنالار كىرەدى:

شەتەلدىك كونتەنت-مەيكەرلەر ءۇشىن ۆيزا راسىمدەۋ ءتارتىبىن جەڭىلدەتۋ؛

مادەني نىساندار مەن كورنەكتى ورىنداردى تۇسىرىلىمگە اشۋ؛

حالىقارالىق فورۋمدار مەن بايقاۋلار ۇيىمداستىرۋ.

سونىمەن قاتار، جاساندى ينتەللەكت سالاسىنداعى جوبالار جالپى شىعىنداردىڭ 30 پايىزىنا دەيىن سۋبسيديا الا الادى. ال جەكە اۆتورلار ۇزدىك تۋىندىلارى ءۇشىن 100 مىڭ يۋانعا دەيىن (شامامەن 14 مىڭ دوللار نەمەسە 7,3 ميلليون تەڭگە) گرانتقا ۇمىتكەر بولا الادى.

سالا وكىلدەرىنە جەڭىلدەتىلگەن نەسيە، كوۆوركينگ كەڭىستىكتەرى، جاس ماماندارعا قىزمەتتىك باسپانا، شىعارماشىلىق ماماندىقتار بويىنشا سەرتيفيكاتتاۋ راسىمدەرىن جەڭىلدەتۋ سياقتى مۇمكىندىكتەر دە قاراستىرىلعان. تالانتتى كونتەنت اۆتورلارى شاڭحايدىڭ كادرلىق ىنتالاندىرۋ باعدارلامالارىنا قاتىسا الادى.