شاڭحاي مەن شياندا جۇمىس ىستەيتىن ەكى قانداسىمىز تانىستىرىلدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
«وزبەكستان مەن قازاقستان اراسىندا تاعى ءبىر اۋە باعىتى اشىلدى – ءو ز ا
قوس باۋىرلاس ەل - وزبەكستان مەن قازاقستان اراسىنداعى بايلانىس تاعى ءبىر ماڭىزدى قاداممەن نىعايا ءتۇستى.
تۇركىستان قالاسىنان سامارقانعا باعىت العان العاشقى جولاۋشىلار ۇشاعى كەشە سامارقان حالىقارالىق اۋەجايىنا ءساتتى قوندى.
بۇل تۋرالى وسى اپتادا «ءو ز ا» اقپارات اگەنتتىگى مالىمدەدى.
حابارلامادا اتالعان باعىت قازاقستاننىڭ «QAZAQ AIR» اۋە كومپانياسى تاراپىنان ىسكە قوسىلدى. ەندى بۇل رەيس استانا، تۇركىستان جانە سامارقان قالالارىن ءوزارا بايلانىستىرىپ، وڭىرلىك تۋريزم مەن ىسكەرلىك قارىم-قاتىناستىڭ دامۋىنا جاڭا سەرپىن بەرمەك.
تۇراقتى اۋە رەيستەرى اپتاسىنا ەكى مارتە - بەيسەنبى جانە جەكسەنبى كۇندەرى ورىندالادى. بۇل - جولاۋشىلار ءۇشىن قولايلىلىقتى ارتتىرىپ قانا قويماي، ەكى ەل اراسىنداعى مادەني، ەكونوميكالىق جانە تۋريستىك بايلانىستاردى ودان ءارى جانداندىرۋعا ىقپال ەتپەك.
ايتا كەتەيىك، العاشقى رەيستىڭ كەلۋىنە وراي وتكەن ارنايى ءىس-شاراعا قازاقستان رەسپۋبليكاسىنىڭ سامارقان قالاسىنداعى باس كونسۋلى مەن سامارقان وبلىسى اكىمدىگىنىڭ وكىلدەرى قاتىسقان.
سونداي-اق وسى اپتادا «ءو ز ا» - دا «بۇحاراعا كەلەتىن ساياحاتشىلار لەگى جىلدان جىلعا كوبەيىپ كەلەدى» دەگەن تاقىرىپتاعى فوتورەپورتاج جاريالاندى.
اتالعان اقپارات كوزىنىڭ دەرەگىنشە، بۇحارانىڭ عاسىرلار بويى ساقتالعان تاريحي ەسكەرتكىشتەرى بۇگىندە الىس-جاقىننان كەلگەن شەتەلدىك تۋريستەرمەن قايتادان جاندانىپ، قالا ءوزىنىڭ تاريحي بولمىسىمەن تاڭقالدىرىپ وتىر.
اتاپ ايتقاندا، بيىلعى جىلدىڭ العاشقى ءۇش ايىندا رەسەيدەن – 9758، قىتايدان – 2878، قازاقستاننان – 1830، ءۇندىستاننان – 1353، جاپونيادان – 1338، يتاليادان – 1161، تۇرىكمەنستاننان – 961، فرانسيادان – 929، ا ق ش- تان – 785، يراننان – 738، يسپانيادان – 668، مالايزيادان - 611 جانە يندونەزيادان - 653 تۋريست بۇحاراعا ساپارلاپ كەلگەن.
تۋريزم سالاسىنداعى ەڭ ۇزدىك باعىتتاردىڭ ءبىرى رەتىندە تانىلاتىن بۇحاراعا جىل سوڭىنا دەيىن 2 ميلليون 200 مىڭنان استام شەتەلدىك تۋريست كەلەدى دەپ كۇتىلۋدە، دەپ جازادى وزبەكستاندىق ب ا ق.
شاڭحاي قالاسىندا تۇراتىن ءدارى جاسايتىن جاس مامان باۋىرجان - CNR
وسى اپتادا قىتايدىڭ «ورتالىق حالىق راديوسى» اقپاراتتىق اگەنتتىگى شاڭحاي قالاسىندا تۇراتىن ءدارى جاساۋشى جاس مامان باۋىرجان سەيىلبەك ۇلى اتتى قانداسىمىزدان العان ۆيدەو سۇحباتىن جاريالادى.
شاڭحاي قالاسىندا تۇراتىن ءدارى جاسايتىن دارىندى جاس مامان باۋىرجان سەيىلبەك ۇلى تۇسكى ءبىر ساعاتتىق دەمالىس ۋاقىتىن پايدالانىپ سۇحبات بەرگەن. ونىڭ ءار كۇنى قاربالاس وتەدى، تاڭەرتەڭگى قىزمەتكە كەلۋدەن باستاپ، ءتۇرلى كۇردەلى اسپاپتارمەن ءدارى-دارمەكتەردى زەرتتەپ، ودان قاتىستى دەرەكتەردى، انىقتامالاردى شىعارۋعا دەيىن بارلىق جۇمىستار دارىندى جاس ماماننىڭ مىندەتى ەكەن.
ونىڭ شاڭحايداعى ءومىرى، قىزمەتى تۋرالى تىلشىگە بەرگەن سۇحباتىن قىسقاشا تانىستىرا كەتەيىك.
باۋىرجان سەيىلبەك ۇلىنىڭ ايتۋىنشا، ول قازىرگى ۋاقىتتا شاڭحايداعى فارماتسيەۆتيكالىق كومپانيادا جۇمىس ىستەيدى.
2012-جىلى شاڭحاي جياۋ تۋڭ ۋنيۆەرسيتەتىنە تاماق ونەركاسىبى جانە ينجەنەريا ماماندىعىنا قابىلدانعان.
2016-جىلدان باستاپ شاڭحاي فارماتسيەۆتيكالىق كومپانياسىندا پەپتيدتەرمەن بايلانىستى جۇمىسپەن اينالىسا باستاعان.
ونىڭ كۇندەلىكتى جۇمىسى الدىمەن ءبىرىنشى زەرتتەلەتىن ۇلگىلەردى سۇرىپتاۋمەن باستالادى.
باۋىرجان قول استىنداعى ارىپتەستەرىنە جاسايتىن ەكسپەريمەنتتەر مەن جۇمىستاردى رەتتەيدى. ال ەكىنشى كەزەكتى جۇمىسى ءبىر كۇن بۇرىن جاسالعان ەكسپەريمەنتتىك ەسەپتى قايتا تەكسەرۋمەن جالعاسادى. سوسىن جاڭا پرەپاراتتارعا زەرتتەۋ جوسپارلارىن جاسايدى ەكەن.
ونىڭ قازىرگى جۇمىسى فارماتسيەۆتيكا سالاسى حيميامەن تىعىز بايلانىستى سالا.
باۋىرجان سەيىلبەك ۇلى ءوز جۇمىسىندا كليەنتتەرمەن اعىلشىن تىلىندە سويلەسۋ وتە ماڭىزدى ەكەنىن ايتادى. اسىرەسە، بىرنەشە جىل بۇرىن شەتەلدىك كومپانيادا قىزمەت ىستەگەن كەزىندە جۇمىس ءتىلى اعىلشىن ءتىلى بولعان. قازىرگى ۋاقىتتا قىتايلىق كومپانيادا جۇمىس ىستەگەنىمەن تۇتىنۋشىلاردىڭ بارلىعى ەۋروپالىق جانە باسقا دا شەتەلدىك تۇتىنۋشىلار بولعاندىقتان جۇمىس تىلدەرى ءالى دە قىتاي جانە اعىلشىن تىلدەرى بولىپ تابىلادى.
ب. سەيىلبەك ۇلى 2020-جىلى ۇيلەنگەن. ونىڭ ايەلى دە شاڭحاي جياۋ تۋڭ ۋنيۆەرسيتەتىن بىتىرگەن. ەكەۋى وقۋدى ءتامامداعان سوڭ دامۋ ءۇشىن شاڭحايدا قالۋدى شەشكەن. بىلتىر ءسابيلى بولعان. ەندىگى جوسپارلارى جارقىن بولاشاق ءۇشىن شاڭحاي قالاسىندا ماماندىعىمىز بويىنشا جۇمىسىمىزدى جالعاستىرا بەرۋ دەيدى قانداسىمىز.
سونداي-اق وسى اپتادا «CNR» باسىلىمىندا «قۇشتار: بۇل مەنىڭ وسكەن جۇرتىم» دەگەن تاقىرىپتاعى قىتايدىڭ تاريحي استاناسى سانالاتىن سيان قالاسىندا جۇمىس ىستەيتىن قانداسىمىز تۋرالى ۆيدەو سۇحبات جاريالاندى.
«دايانتا مۇناراسى ماڭىنداعى جاستىق كوكتەم نەمەسە بۇل مەنىڭ وسكەن جۇرتىم»، دەيدى شياندا قىزمەت ىستەيتىن قۇشتار مۇحتار ۇلى.
قىتايلىق ب ا ق-تىڭ دەرەگىنشە، بايىرعى قالا سيانداعى دايانتا مۇناراسى ەجەلگى زاماننان بەرگى جىلجىپ وتكەن جىلدار، اۋناپ وتكەن ايلاردىڭ ايعاعى. ول وسىندا وزگە جۇرتتان كەلىپ، قونىس تەۋىپ، وركەن جايعان جانداردىڭ ءومىر كارتيناسىنىڭ كۋاسى ىسپەتتى.
بۇگىن تىلىمىزگە تيەك بولاتىن اڭگىمە شيان ەلەكتروندى عىلىم-تەحنيكا ۋنيۆەرسيتەتىندە جەتەكشى ۇستاز قىزمەتىن اتقاراتىن گەرويىمىزدىڭ جاستىق كوكتەمى جايلى بولادى، دەپ جازادى قىتايدىڭ «ورتالىق حالىق راديوسى».
قايتپاس جاستىڭ قۇمعا بىتكەن توراڭعىداي قايسار رۋحى 13 پاتشالىقتىڭ استاناسى بولعان بايىرعى قالادان ءوز ءومىر جولىن تاپقان. ول وسىنداعى جەتى جىلعى جۇمىسىنان تۇيگەنى، سەزگەنى دە وسى وڭىرگە تامىر تارتقانى بولدى. سوندىقتان ول سياندى بۇل مەنىڭ وسكەن جۇرتىم، دەپ سانايدى ەكەن.
ونىڭ شيانعا قالۋىنا ەكى سەبەپ بولىپتى. ءبىرىنشىسى اتالعان قالانىڭ كليماتى تۋعان جەرى شينجاڭعا ۇقسايدى. وسىندا كەلە سالىپ اۋا رايىنا تەز ۇيلەسىپ كەتىپتى. ەكىنشىدەن شيان قىتايدىڭ ون ءۇش پاتشالىعىنىڭ ورداسى بولعان. وسىنداي وتە باي مادەنيەت مەنى قىزىقتىردى دەيدى ول.
يراننىڭ ءبىر ۋنيۆەرسيتەتىندە الەمنىڭ 130 ەلىنەن ون مىڭداعان ستۋدەنتتەر ءبىلىم الۋدا- ParsToday
يراننىڭ مۇستافا ءال-ءالاميا ۋنيۆەرسيتەتىنىڭ رەكتورى بۇل وقۋ ورىنىندا الەمنىڭ 130 ەلىنەن ون مىڭداعان شەتەلدىك ستۋدەنتتەردىڭ ءبىلىم الاتىنىن ايتتى، دەپ حابارلايدى ParsToday اقپارات اگەنتتىگى.
اتالعان ب ا ق- تىڭ مالىمەتىنشە، يراننىڭ مۇستافا ءال-ءالاميا ۋنيۆەرسيتەتىنىڭ رەكتورى ءالي ابباسيدىڭ سەنبى كۇنگى حابارلاۋى بويىنشا، يراننىڭ قۇم سەمينارياسى عالىمدار، پروفەسسورلار مەن عىلىم قايراتكەرلەرىنىڭ سانى، وسى سالادا ۇسىنىلعان بىلىمدەردىڭ الۋان تۇرلىلىگى جانە وسى سالانىڭ ەل ىشىندەگى جانە سىرتىنداعى ءارتۇرلى عىلىمي ورتالىقتارمەن كەڭ بايلانىسى تۇرعىسىنان الەمدە كورنەكتى.
ابباسيدىڭ مالىمەتىنشە، ءال-مۇستافا قاۋىمى قازىر 130 دان استام ۇلتتىڭ ون مىڭداعان ستۋدەنتتەرىن قابىلدايدى. ونىڭ 40 پايىزعا جۋىعىن قىزدار مەن ايەلدەر قۇرايدى.
سونداي-اق ParsToday اقپارات اگەنتتىگىندە «يران عالىمدارىمەن كەزدەسۋ» دەگەن تاقىرىپتاعى اقپارات جاريالاندى.
يراندىق ب ا ق- تىڭ دەرەگىنشە، 2025-جىلعى 2-مامىردا ءال-فارابي قاز ۇ ۋ شىعىس تانۋ فاكۋلتەتىنە اللامە تاباتاباي ۋنيۆەرسيتەتىنىڭ عىلىمي ىستەر جونىندەگى پرورەكتورى ماندانا تيشەيار حانىم مەن يران ۇلتتىق كىتاپحاناسى ديرەكتورىنىڭ ورىنباسارى مورتازا نۋري مىرزا رەسمي ساپارمەن كەلگەن.
يراندىق عالىمدار شىعىس تانۋ فاكۋلتەتى تاياۋ شىعىس جانە وڭتۇستىك ازيا كافەدراسىنىڭ پروفەسسور- وقىتۋشىلارىمەن كەزدەستى. كەزدەسۋ بارىسىندا بارىسىندا ەكى ەلدىڭ مادەني جانە عىلىمي بايلانىستارىن نىعايتۋ، سونداي-اق ءبىلىم مەن عىلىم سالاسىنداعى ءوزارا ىنتىماقتاستىقتى ارتتىرۋ ماسەلەلەرى تالقىلاندى.
ParsToday اگەنتتىگىنىڭ دەرەگىنشە، ەكى ۋنيۆەرسيتەت اراسىندا عىلىمي زەرتتەۋلەر جانە مادەني جوبالار بويىنشا بىرلەسكەن جۇمىستاردى دامىتۋ جولدارى دا قاراستىرىلعان.
سونداي- اق ماندانا تيشەيار حانىم اتالعان كەزدەسۋ ەكى تاراپ ءۇشىن ماڭىزدى ەكەنىن جانە عىلىم مەن مادەنيەتتىڭ دامۋىنا قوسار ۇلەسى زور بولاتىنىن اتاپ وتكەن. سونىمەن قاتار، ول قاز ۇ ۋ مەن تاباتاباي ۋنيۆەرسيتەتى بىرلەسىپ شىعاراتىن جاڭا عىلىمي-تانىمدىق جۋرنال «ناۋرىز» تۋرالى كەڭىنەن بايانداعان.
اقتوبە مەن سيان اراسىندا تىكەلەي اۋە رەيسىن اشۋ ماسەلەسى تۋرالى باستاما كوتەرىلدى- «حالىق گازەتى»
سيان قالاسىندا اقتوبە وبلىسىنىڭ اكىمى اسحات شاحاروۆ پەن شەنسي ولكەسىنىڭ ولكە باستىعىنىڭ رەسمي كەزدەسۋى ءوتتى، دەپ حابارلايدى «حالىق گازەتى» aqtobegazeti.kz باسىلىمىنا سىلتەمە جاساپ.
اتالعان كەزدەسۋ اياسىندا ءوڭىردىڭ ينۆەستيتسيالىق جانە ونەركاسىپتىك الەۋەتى تانىستىرىلعان.
ءوڭىر باسشىسى شەنسيدىڭ ولكە باستىعى چجاو گانعا اقتوبە مەن سيان اراسىندا تىكەلەي اۋە رەيسىن اشۋ ماسەلەسى تۋرالى باستاما كوتەرگەن. ول مۇنداي اۋە قاتىناسىنىڭ وڭىرلەر اراسىنداعى ساۋدا-ەكونوميكالىق ىنتىماقتاستىقتى دامىتۋعا جانە تۋريستىك اعىندى ارتتىرۋعا سەپتىگىن تيگىزەتىنىن اتاپ وتكەن.
ايتا كەتەيىك، قابىلداۋ بارىسىندا اقتوبە وبلىسىنىڭ يندۋستريالىق- يننوۆاتسيالىق دامۋ باسقارماسى مەن شەنسي پروۆينتسياسىنىڭ كوممەرتسيا باسقارماسى اراسىندا ساۋدا-ەكونوميكالىق ىنتىماقتاستىق تۋرالى مەموراندۋمعا قول قويىلدى.
تۇركيادان شىققان «قايىرىمدىلىق كەمەسى» سۋدانعا جەتتى- TRT
سۋدانداعى گۋمانيتارلىق داعدارىس ۋشىققان كەزەڭدە 1600 توننادان استام كومەك تيەلگەن تۇرىك گۋمانيتارلىق كومەك كەمەسى پورت-سۋدانعا جەتىپ، ماڭىزدى قولداۋ كورسەتتى، دەپ حابارلايدى تۇركيا راديو تەلەۆيزيا پورتالى.
«TRT» - نىڭ دەرەگىنشە، «ەكىنشى قايىرىمدىلىق كەمەسى» دەپ اتالاتىن بۇل كەمە ادام قۇقىقتارى مەن بوستاندىقتارى گۋمانيتارلىق كومەك قورى (IHH) تاراپىنان جىبەرىلگەن. كەمە 1605 توننا ازىق-تۇلىك، كيىم-كەشەك، گيگيەنالىق ماتەريالدار مەن باسپانا جابدىقتارىن جەتكىزگەن.
دۇيسەنبى كۇنى كەمەنى تۇركيانىڭ سۋدانداعى ەلشىسى فاتيح يىلدىز، IHH باسقارما مۇشەسى مەحمەت ەنەس ارىكان، سۋدان گۋمانيتارلىق كومەك كوميسسارى سەلۆا ادەم جانە جەرگىلىكتى بيلىك وكىلدەرىنىڭ قاتىسۋىمەن رەسمي راسىممەن قارسى الدى.
ايتا كەتەيىك، ەلشى يىلدىز انادولى اگەنتتىگىنە بەرگەن سۇقباتىندا «بۇل - تۇركيانىڭ قاقتىعىس باستالعالى بەرى جىبەرگەن ءتورتىنشى گۋمانيتارلىق كومەك كەمەسى. ولاردىڭ ەكەۋىن تۇركيانىڭ اپات جانە توتەنشە جاعدايلاردى باسقارۋ ءتوراعالىعى (AFAD) ۇيىمداستىردى جانە بۇل IHH- ءنىڭ ەكىنشى كەمەسى»، - دەگەن.
اۆتور بەيسەن سۇلتان
