شاۋەشەك - الماتى باعىتىندا حالىقارالىق اۆتوبۋس قاتىناي باستادى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
وزبەكستان مەن قازاقستان 2030 -جىلعا دەيىن ءوزارا تاۋار اينالىمىن 10ميلليارد دوللارعا جەتكىزبەك - ءوز ا
وزبەكستان رەسپۋبليكاسىنىڭ ينۆەستيتسيالار، ونەركاسىپ جانە ساۋدا ءمينيسترى لازيز قۋدراتوۆ پەن قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى ارمان شاققاليەۆ كەزدەسۋ وتكىزدى، دەپ حابارلايدى «ءوز ا» اقپارات اگەنتتىگى.
حابارلامادا ايتىلعانداي، كەلىسسوزدەر بارىسىندا تاراپتار ەكى ەل اراسىنداعى ەكونوميكالىق ىنتىماقتاستىقتىڭ وزەكتى ماسەلەلەرىن تالقىلادى. اتاپ ايتقاندا، 7 ميلليارد ا ق ش دوللارىن قۇرايتىن «جول كارتاسى» اياسىنداعى جوبالاردى ىسكە اسىرۋ، قۇرىلىپ جاتقان «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ قۇقىقتىق نەگىزىن قالىپتاستىرۋ جانە «UZKAZTRADE» بىرلەسكەن كاسىپورنىنىڭ قىزمەتىن كەڭەيتۋ جايى قاراستىرىلدى.
- كەزدەسۋ قورىتىندىسى بويىنشا تاراپتار 2030 -جىلعا دەيىن ءوزارا تاۋار اينالىمىن 10 ميلليارد ا ق ش دوللارىنا دەيىن ۇلعايتۋ باعدارلاماسىنا قول قويدى. سونداي-اق، 2025 -جىلى قازاقستان وڭىرلەرىنىڭ وزبەكستانعا جانە وزبەكستان وڭىرلەرىنىڭ قازاقستانعا ساپارلارىنىڭ كەستەسى بەكىتىلدى. بۇل قۇجات ەكى ەل اراسىنداعى ءوڭىرارالىق ىنتىماقتاستىقتى جانداندىرۋعا، سونداي-اق بىرلەسكەن ينۆەستيتسيالىق جوبالاردى جۇزەگە اسىرۋعا مۇمكىندىك بەرمەك، - دەلىنگەن قازاقستان ەلشىلىگى حابارلاماسىندا، دەپ جازادى وزبەكستاندىق ب ا ق.
سونداي-اق وسى اپتادا «ءوز ا»-دا «فەرعانا قالاسىندا ۇلكەن نان دايىندالدى» دەگەن تاقىرىپتاعى اقپارات جاريالاندى.
اتالعان اقپارات كوزىنىڭ دەرەگىنشە، فەرعانا قالاسىندا ەرەكشە ۇلكەن نان دايىندالدى. بۇل ىسكە قالانىڭ نان ورتالىعىنىڭ جەتەكشىسى ۋتكيرجان ماماجانوۆ پەن ونىڭ بەس شاكىرتى اتسالىستى. ناندى ءپىسىرۋ ءۇشىن 16 كەلى ۇن، 3 كەلى ماي جانە 3 ليتر سۋ پايدالانىلدى.
ناننىڭ ساپالى ءارى ادەمى بولۋى ءۇشىن قامىرعا جاڭعاق، مەيىز جانە سەدانا قوسىلىپتى. قامىردى تارازىعا قويعان كەزدە ونىڭ سالماعى 23 كەلىدەن استام بولعان.
الىپ ناندى پەشكە جابۋ ءۇشىن ارنايى قۇرال جاسالدى، ال پەش تە وسى ماقساتقا ساي ەتىپ ازىرلەنگەن ەكەن.
- نانشى ۋتكيرجان كەلەسىدە 50 كەلى تارتاتىن نان دايىنداۋدى جوسپارلاپ وتىر. ءول ۇشىن ارنايى پەش سالدىرماق. نان پىسكەن سوڭ ونى تارازىعا قويعاندا، 21 جارىم كەلىنى كورسەتتى. وسىلايشا، ەلدەگى رەكورد جاڭارتىلدى، - دەپ جازادى «ءوزا».
«شاۋەشەك- الماتى» باعىتىندا حالىقارالىق اۆتوبۋس قاتىناي باستادى - Harajorga
حالىقارالىق تاسىمال باعىتى 15-ناۋرىز كۇنى اشىلدى.
سول كۇنى تۇستەن كەيىن ساعات 16:00-دە، اۆتوۆوكزالدا كوپتەگەن ادامدار جينالعان. تۇڭعىش رەت الماتىعا قاتىنايتىن كەزەكشى اۆتوبۋس دايىن تۇردى. جولاۋشىلاردىڭ بارلىعى كوڭىلدى ءجۇردى. سەبەبى ولار ءۇشىن ايتقاندا، بۇل ءبىر جولعى قاراپايىم ساپار ەمەس، قايتا شەكارا اتتاعان تۋريستىك ساپار سانالادى، دەپ جازادى قىتايلىق Harajorga باسىلىمى.
بۇل حالىقارالىق جولاۋشى تاسىمال باعىتىن شينجاڭ «شينتا» تاسىمال توبى ىسكە اسىرۋدا.
شينجاڭ «شينتا» تاسىمال توبى ج ش س-نىڭ ورىنباسار ديرەكتورىنىڭ ايتۋىنشا، حالىقارالىق جولاۋشى تاسىمال باعىتىنىڭ جالپى ۇزىندىعى شامامەن 900 شاقىرىم. بارعان جولعا شامامەن 13 ساعات ۋاقىت كەتەدى. العاشقى مەزگىلدە اپتاسىنا ەكى رەت قاتىنايدى، جولاۋشى مولشەرىنە قاراي كەزەك سانىن بىرتىندەپ ارتتىرۋ جوسپارلانۋدا. بيلەت باعاسى ءتيىمدى، ادام باسىنا 330 يۋان بولىپ، جولاۋشىلاردىڭ جولداعى اۋىرتپالىعىن ونان ارى جەڭىلدەتكەن.
ءۇرىمجى ديۆوپۋ حالىقارالىق اۋەجايىنىڭ اتاۋى وزگەرتىلدى - حالىق گازەتى
جاقىندا قىتايدىڭ ازاماتتىق اۆياتسيا اكىمشىلىگىنىڭ رەسمي سايتىندا ازاماتتىق اۋەجاي اتاۋى وزگەردى، بۇل ءۇرىمجى ديۆوپۋ حالىقارالىق اۋەجايى ءۇرىمجى تيانشان حالىقارالىق اۋەجايى بولىپ وزگەرگەنىن بىلدىرەدى، دەپ حابارلايدى حالىق گازەتى.
اتالعان ب ا ق-تىڭ دەرەگىنە سۇيەنسەك، ءۇرىمجى تيانشان حالىقارالىق اۋەجايى ارقىلى 2024 -جىلى 27,7657 ميلليون جولاۋشى تاسىمالدانعان. حالىقارالىق جولاۋشى مارشرۋتتارى 20 دان استام قالاعا قاتىنايدى.
- تيانشان تاۋلارى شىعىستان باتىسقا قاراي ءتورت ەلدى - قىتاي، قازاقستان، قىرعىزستان جانە وزبەكستاندى قامتىپ جاتىر. تاۋدىڭ جالپى ۇزىندىعى شامامەن 2500 شاقىرىمعا جۋىق. شينجاڭ تيانشان تاۋى قىتايدىڭ شىعىس تيانشان تاۋىن مەڭزەيدى، ونىڭ ۇزىندىعى شامامەن 1760 شاقىرىمدى قۇرايدى. بۇل تيانشان تاۋى جالپى ۇزىندىعىنىڭ ۇشتەن ەكىسىنەن استامىن يەلەپ، بۇكىل شينجاڭدى كەسىپ وتەدى، - دەپ جازادى قىتايلىق باسىلىم.
ناۋرىز مەرەكەسىنە «ازادي» مۇناراسىندا يراننىڭ جاقىن جانە الىس كورشىلەرىنىڭ تۋى بەينەلەندى - ParsToday
«جاھاندىق ناۋرىز مەرەكەسىنىڭ» اشىلۋى؛ «ازادي» مۇناراسىندا يراننىڭ جاقىن جانە الىس كورشىلەرىنىڭ تۋى بەينەلەندى.
«جاھاندىق ناۋرىز مەرەكەسىنىڭ» اشىلۋ سالتاناتى تەھراننىڭ «ازادي» الاڭىندا ي ي ر مادەنيەت جانە يسلامدىق باعدار ءمينيسترى سەيەد ابباس سالەحي، سىرتقى ىستەر ءمينيسترى سەيەد ابباس اراقچي، مادەني مۇرا، تۋريزم جانە قولونەر ءمينيسترى سەيەد رەزا سالەحي اميري جانە ءارتۇرلى ەلدەردىڭ ەلشىلەرى، مادەنيەت جانە ونەر قايراتكەرلەرى مەن حالىقتىڭ ءارتۇرلى توپتارىنىڭ قاتىسۋىمەن ءوتتى، دەپ جازدى ParsToday اقپارات اگەنتتىگى.
ParsToday وسى رەپورتاجىندا تەھراندا وتكەن «جاھاندىق ناۋرىز مەرەكەسىنىڭ» اشىلۋىنان سۋرەتتەردى ۇسىنعان.
- ناۋرىز، كۇن جىلىنۋىنىڭ ءبىرىنشى كۇنى، فارۆاردين ايىنىڭ 1 كۇنىنە سايكەس كەلەدى، پارسىلاردىڭ جاڭا جىلىنىڭ باستالۋىن تويلاۋ جانە ەجەلگى يراننان قالعان ەڭ كونە مەرەكەلەردىڭ ءبىرى، -دەپ جازادى يراندىق ب ا ق.
يران سىرتقى ىستەر ءمينيسترى ناۋرىز مەرەكەسىندە ءسوز سويلەدى.
ParsToday اگەنتتىگىنىڭ مالىمەتىنشە، يراندىقتاردا ناۋرىزدى تابيعاتتىڭ قايتا ءتىرىلۋىنىڭ باستاۋى، كەيدە باقتار مەن ساياباقتاردىڭ ءوسىپ، تۋۋى دەپ سانايدى.
سونداي-اق حيجري كۇنتىزبەسىن قولداناتىن يراندا ناۋرىز جاڭا جىلدىڭ باسىن بىلدىرەدى ەكەن.
دۇنيەجۇزىلىك ناۋرىز مەرەكەسىندە «ازادي» مۇناراسىندا يراننىڭ جاقىن جانە الىس كورشىلەرىنىڭ تۋى بەينەلەندى. اتاپ ايتقاندا، ءۇندىستان، تۇركيا، قىرعىزستاننىڭ تۋى الەمدىك ناۋرىز مەرەكەسىندە كورسەتىلدى. سونىمەن قاتار تۇركىمەنستاننىڭ تۋى، وزبەكستاننىڭ تۋى، گرۋزيانىڭ تۋى جانە ازەربايجان تۋى مەن يران تۋى كورسەتىلدى. ءبىراق قازاقستاننىڭ تۋى كورسەتىلگەنى تۋرالى اقپارات بەرىلمەگەن.
3500 جىلدان استام تاريحى بار پاتشالىق قابىر تابىلدى- TRT
ارحەولوگتەر مىسىردىڭ ەكىنشى ارالىق كەزەڭىنە جاتاتىن پاتشالىق قابىر مەن ريم داۋىرىنە تيەسىلى قىش شەبەرحاناسىن انىقتادى.
مىسىردىڭ تۋريزم جانە كونە جادىگەرلەر مينيسترلىگى پەنسيلۆانيا ۋنيۆەرسيتەتىنىڭ مىسىرلىق- امەريكالىق بىرلەسكەن ارحەولوگيالىق توبى ەلدىڭ وڭتۇستىگىندەگى ابيدوس قالاسىندا ورنالاسقان دجەبەل انۋبيس نەكروپولىنەن ەكىنشى ارالىق كەزەڭگە جاتاتىن پاتشالىق قابىردى تاپقانىن حابارلادى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
مينيسترلىكتىڭ مالىمدەمەسىنە سايكەس مىسىردىڭ جوعارعى كونە جادىگەرلەر كەڭەسىنە قاراستى باسقا ارحەولوگيالىق توپ سوحاگ پروۆينسياسىنا قاراستى باناۆيت اۋىلىنان ريم داۋىرىنە تيەسىلى قىش شەبەرحاناسىن انىقتادى.
«TRT»-نىڭ دەرەگىنشە، «ابيدوس قالاسىنداعى پاتشالىق قابىردىڭ تابىلۋى دجەبەل انۋبيس نەكروپولىندەگى پاتشا جەرلەۋلەرىنىڭ دامۋ تاريحىنا قاتىستى جاڭا عىلىمي دالەلدەر ۇسىنادى» دەلىنگەن حابارلامادا.
اتالعان قابىرلەر ب. ز. د. 1700-1600 -جىلدارعا تيەسىلى ەكەنى كورسەتىلگەن.
اۆتور
بەيسەن سۇلتان
