ش ى ۇ - وركەنيەت جارشىسى: ساراپشىلار ۇيىم جۇمىسىن قالاي باعالايدى

استانادا «شانحاي ىنتىماستاستىق ۇيىمى ەلدەرى اراسىنداعى وركەنيەتتەر ديالوگى» اتتى باسقوسۋ ءوتتى. الەمنىڭ وننان استام ەلىنەن كەلگەن ءتۇرلى سالانىڭ ساراپشىلارى ۇيىمنىڭ ساياسي-ەكونوميكالىق، مادەني تۇرعىدا دامۋىن تالداپ، اتقارعان ىستەرىنە باعا بەردى.

ШЫҰ басқосу
Фото: Kazinform

ەۋرازيا ماتەريگىنىڭ 65 پايىزدان استام اۋماعىن الىپ جاتقان ش ى ۇ الەمدىك ارەنادا دا ىقپالدى ۇيىمداردىڭ ءبىرى سانالادى. سونىمەن، جيىندا قانداي ويلار ايتىلىپ، ساراپشىلار ۇيىم بولاشاعى جونىندە نە ايتقانىن شولىپ كورەيىك.

كەيىنگى جىلدارى ش ى ۇ- عا مۇشە بولۋدى كوزدەگەن ەلدەردىڭ قاتارى ارتىپ وتىر. وسىنىڭ ءوزى - جەمىستى ىستەردىڭ كورىنىسى. بۇل جايىندا جيىن باسىندا ءسوز العان ش ى ۇ باس حاتشىسىنىڭ ورىنباسارى سوحايل حان باياندادى.

- شانحاي ىنتىماقتاستىق ۇيىمىنا مۇشە ەلدەر ءبىر-ءبىرىنىڭ مادەنيەتىن جەتە تۇسىنەدى، بارلىق قارىم-قاتىناس دوستىق سەنىمگە نەگىزدەلگەن. سونىڭ ارقاسىندا ۇيىمنىڭ ىقپالى الداعى ۋاقىتتا دا ارتا بەرۋى مۇمكىن. سەبەبى وسى كۇنى ۇيىمعا بەلارۋس پەن افريكا قۇرلىعىنداعى كوپتەگەن ەلدەردىڭ قىزىعۋشىلىعى تۋىپ وتىر. ياعني، وركەنيەتتەر جيىنتىعىن قۇراي الدىق. الداعى ۋاقىتتا ءبىز جاھاندىق ماسەلەلەرگە زەر سالۋىمىز قاجەت، - دەدى ول.

ءوز كەزەگىندە ق ر مادەنيەت جانە اقپارات مينيسترلىگى مەملەكەتارالىق بايلانىستاردىڭ نىعايۋىنا مۇددەلى ەكەندەرىن جەتكىزدى. بۇل ماقساتقا ولار ءتۇرلى مادەني شارالاردى ۇيىمداستىرۋ ارقىلى اتسالىسىپ كەلەدى. اتالعان ۆەدومستۆوعا قاراستى مادەنيەت كوميتەتى ءتوراعاسىنىڭ ورىنباسارى سابيت بارلىبايەۆ مادەني بايلانىستار دامي بەرەتىنىنە سەنىم ءبىلدىردى.

- الەمدىك وركەنيتتەر كوشىنە ىلەسە وتىرىپ، ءبىز ادامزاتتىڭ قۇندىلىقتارىن ساقتاي الامىز. قازىر ۇيىمعا مۇشە ەلدەر اراسىندا تاريحتان باستاۋ العان بەلسەندى مادەني بايلانىستار بار. وسى سەكىلدى اۋقىمدى باسقوسۋلار دوستىعىمىزدى ايشىقتاپ، ءارى قاراي جالعاسىن تابا بەرۋىنە ىقپال ەتەتىنىنە سەنىمدىمىز، - دەپ تۇيىندەدى ءسوزىن.

ال وزبەكستان س ءى م جانىنداعى حالىقارالىق قاتىناستاردى اقپاراتتىق-تالداۋ ورتالىعىنىڭ ديرەكتورى سانجار ۆاليەۆ ساياسي قارىم-قاتىناستاردا تۇسىنىستىكتىڭ ارتۋىنا اشىق ديالوگ الاڭدارى كومەكتەسەتىنىن العا تارتتى.

- ش ى ۇ ورتاق تۇسىنىستىككە، قۇندىلىقتاردى باعالاۋعا نەگىزدەلگەن. قازىر ۇيىم قاۋىپسىزدىك سالاسىندا دا جەمىستى ەڭبەك ەتۋدە. تولەرانتتىلىق كورسەتىپ، ءار حالىقتىڭ سەنىمىنە قۇرمەتپەن قاراۋ ءۇشىن وسى سەكىلدى اشىق ديالوگ الاڭدارى كوپ بولعانى ءجون، - دەپ تولىقتىردى.

باسقوسۋعا حالىقارالىق قور ۇيىمدارىنىڭ وكىلدەرى قوناق رەتىندە شاقىرىلدى. سونىڭ ءبىرى - «روزا وتىنبايەۆانىڭ باستاماسى» حالىقارالىق قوعامدىق قورىنىڭ اتقارۋشى ديرەكتورى روزا كايىكوۆا. ونىڭ سوزىنشە، ش ى ۇ ەلدەرىنىڭ باسىم باعىتىنىڭ ءبىرى رەتىندە گۋمانيتارلىق قىزمەت قامتىلۋى قاجەت.

- ەلدەر اراسىنداعى بايلانىستى نىعايتىپ، حالىقارالىق ساياساتتاعى پوزيتيۆتى كليماتتى ۇستاپ تۇرۋ ءۇشىن گۋمانيتارلىق كومەك قىزمەتىن جەتىلدىرە ءتۇسۋىمىز قاجەت. مەيلى، ول كومەك قارجىلاي بولا ما، قانداي سيپاتتا بولسا دا ماڭىزدى. گۋمانيتارلىق قىزمەت - ۇيىمنىڭ ورتاق قۇندىلىعىنا اينالا الادى. سەبەبى الەمنىڭ ءار تۇكپىرىندە قيىن جاعدايعا دۋشار بولعان مەملەكەتتەر بار. ولاردى قولداعان دۇرىس، بۇل - ءبىلىم مەن مادەني بايلانىستاردا ۇلكەن ءرول وينايدى، - دەيدى ول.

جيىن بارىسىندا قازاقستاننىڭ ادەبي ءھام مادەني تاريحى جايلى پىكىر ايتۋشى شەتەلدىكتەر كەزدەستى. اسىرەسە، ءۇندىستاندىق «وڭتۇستىك ازيا جاڭا فورۋمىنىڭ» نەگىزىن قالاۋشى سۋدحيندرا كۋلكارنيدىڭ ويى وزگەلەردەن ەرەكشەلەندى. ساراپشىنىڭ ايتۋىنشا، ەلدەر اراسىنداعى دوستىق پەن تۇسىنىستىك ارتۋى ءۇشىن ءار ۇلتتى ادامزات دەڭگەيىنە تانىتقان تۇلعالاردى دارىپتەۋىمىز ءتيىس. «بۇل تۇستا قازاق اقىنى اباي قۇنانباي ۇلىنىڭ شىعارماشىلىعى كوپكە ۇلگى بولا الادى» دەپ تۇيىندەدى ول.

قازاقستاندىق ساراپشىلار دا باسقوسۋدان تىس قالعان جوق. ق ر پرەزيدەنتى جانىنداعى ق س ز ي ازيالىق زەرتتەۋلەر ءبولىمىنىڭ جەتەكشى ساراپشىسى ءاليا مۇسابەكوۆانىڭ قۇندى پىكىرى شەتەلدىك ساراپشىلاردىڭ كوڭىلىنەن شىققانىن اڭعاردىق.

- ش ى ۇ- نىڭ جاھاندىق قاۋىپسىزدىك ماسەلەسىندەگى ارىپتەستىگىن جاقسى باعالاۋعا بولادى. مەملەكەتتەر ءبىر-بىرىمەن مادەني بايلانىستار ورناتا الدى. سوندىقتان ۇيىمدى ءساتتى قۇرىلدى دەپ اتاۋىمىزعا نەگىز بار. ايتسە دە ۇيىم بۇنىمەن شەكتەلمەي، كوپتەگەن ماسەلەلەرگە زەر سالۋى كەرەگىن جاسىرمايمىز. اسكەري قاقتىعىستار كوبەيگەن تۇستا، ەلدەر ونىڭ الدىن الۋ جايىن ويلاعانى ابزال. ءار مەملەكەتتىڭ بۇل تۇرعىدا تاجىريبەسى جەتەرلىك. ۇيىمنىڭ ماسشتابى وتە ۇلكەن ەكەنىن العا تارتا وتىرىپ، ءتۇرلى قىلمىس تاۋەكەلدەرىن جويۋدى قولعا العانىمىز ابزال. الايدا ەڭ باستىسى، اتالعان باعىتتاعى جۇمىستاردى ورتاق قاۋىپسىزدىگىمىزدى ەسكەرىپ، ەلدەر ءبىر-بىرىنە قاۋىپ توندىرمەي اتقارعانى دۇرىس، - دەپ تولىقتىردى مامان.

ШЫҰ Қытай мәдениеті
Фото: Kazinform

شارا كەزىندە قىتايدان كەلگەن وكىلدەر وزدەرىنىڭ مادەنيەتىن ايشىقتايتىن شاعىن كورمەلەرىن ۇسىنىپ، قوناقتارعا ۇلتتىق سۋسىن مەن تاعامدارىنان ءدام تاتقىزدى. سونداي-اق يەروگليفتاردان تۇراتىن تاريحى تەرەڭ قىتاي جازۋىنىڭ ەرەكشەلىكتەرى ايتىلدى.

سوڭعى جاڭالىقتار