ش ى ۇ قاتىسۋشى ەلدەر قالدىقتاردى ءتيىمدى باسقارۋ سالاسىندا مالىمدەمە جاسايدى
استانا. KAZINFORM - ش ى ۇ سامميتى اياسىندا قاتىسۋشى ەلدەر ەكولوگيا سالاسىندا ەكى كەلىسىمگە قول قويدى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى.
ونىڭ سوزىنشە، ءبىرىنشى قۇجات - قورشاعان ورتانى قورعاۋ سالاسىنداعى ىنتىماقتاستىق باعدارلاماسى.
«ەكىنشى قۇجات - ش ى ۇ قاتىسۋشى مەملەكەتتەر باسشىلارى كەڭەسىنىڭ قالدىقتاردى ءتيىمدى باسقارۋ سالاسىنداعى مالىمدەمەسى. بۇل جەردە قازىرگى ۋاقىتتا بارلىق ەلدەردە قالدىقتار ماسەلەسى وتە وزەكتى بولىپ وتىرعانىن ءتۇسىنۋ كەرەك. سوندىقتان بۇگىن وسى ۋاعدالاستىقتار شەڭبەرىندە ءبىز - ش ى ۇ ەلدەرى وسى پروبلەمالاردى بىرلەسىپ زەرتتەپ، تاجىريبە الماساتىن بولامىز. بۇگىندە بارلىق دەرلىك ەلدەر قالدىقتاردى ءتيىمدى باسقارادى، ولاردان ۇيرەنەتىن نارسە كوپ»، - دەدى ە. نىسانبايەۆ ش ى ۇ سامميتى كۋلۋارىندا بەرگەن سۇحباتىندا.
سونىمەن بىرگە، ەكولوگيا ءمينيسترى ەرەكشە قورعالاتىن اۋماقتار سالاسىنداعى ىنتىماقتاستىقتى دامىتۋ جونىندە باياندادى.
«قازىر ءبىز تابيعاتتىڭ قانداي وراسان جۇكتەمەلەرگە ۇشىراعانىن كورىپ وتىرمىز. مۇندا ەرەكشە قورعالاتىن اۋماقتاردى قۇرۋ جانە ش ى ۇ ەلدەرىنىڭ وسى ماسەلە بويىنشا ءوزارا ءىس-قيمىلى وتە ماڭىزدى. بۇل بيوالۋاندىقتى ساقتاۋ ماسەلەسىنە دە قاتىستى»، - دەدى ول.
ايتا كەتەيىك، قازاقستاننىڭ شاڭحاي ىنتىماقتاستىق ۇيىمىنا ءتوراعالىعى شەڭبەرىندە 2024 -جىل ۇيىمنىڭ ەكولوگيا جىلى بولىپ جاريالانعان بولاتىن.
ش ى ۇ باس حاتشىسى جاڭ ميڭ Kazinform اگەنتتىگىنە بەرگەن سۇحباتىندا ۇيىمعا مۇشە مەملەكەتتەردىڭ ەكولوگيالىق ىنتىماقتاستىعى، ونىڭ كەلەشەگى مەن قازىرگى جوبالارى تۋرالى ايتىپ بەردى.
ايتا كەتەيىك، ەلورداداعى تاۋەلسىزدىك سارايىندا قازاقستان توراعالىعىمەن شاڭحاي ىنتىماقتاستىق ۇيىمىنىڭ سامميتى باستالدى.
قازاقستان پرەزيدەنتى قاسىم-جومارت توقايەۆ ش ى ۇ سامميتىنە كەلگەن مارتەبەلى مەيمانداردى قارسى الىپ، قول الىستى. ەل باسشىلارىن قارسى الۋ ءراسىمى اياقتالدى.
بەلارۋس ش ى ۇ-نىڭ تولىققاندى مۇشەسى بولدى. شاڭحاي ىنتىماقتاستىق ۇيىمىنىڭ سامميتىندە مۇشە مەملەكەتتەردىڭ باسشىلارى بەلارۋس رەسپۋبليكاسىن ۇيىم مۇشەلەگىنە قابىلداۋعا قاتىستى ءبىرقاتار قۇجاتقا قول قويدى.
شاڭحاي ىنتىماقتاستىق ۇيىمى حالىقارالىق قاتىناس جۇيەسىنىڭ ماڭىزدى تەتىگىنە اينالدى. بۇل تۋرالى سامميتتە مەملەكەت باسشىسى قاسىم-جومارت توقايەۆ ايتتى.
اۆتور
ايجان سەرىكجان قىزى
