ش ى ۇ بايقاۋشىلارى رەفەرەندۋمنىڭ قالاي ءوتىپ جاتقانىن باعالادى
استانا. KAZINFORM - شاڭحاي ىنتىماقتاستىق ۇيىمىنىڭ بايقاۋشىلار ميسسياسىندا 13 بايقاۋشى رەفەرەندۋمنىڭ ءوتۋ بارىسىن باقىلاۋدا. بۇل تۋرالى ميسسيا باسشىسى، ش ى ۇ باس حاتشىسىنىڭ ورىنباسارى ولەگ كوپىلوۆ ايتىپ بەردى.
«ءبىز قازاقستاننىڭ سىرتقى ىستەر مينيسترلىگىنىڭ شاقىرۋىمەن استاناعا كەلدىك جانە قازاقستاندا ا ە س سالۋ ماسەلەسى بويىنشا رەسپۋبليكالىق رەفەرەندۋم وتكىزۋگە دايىندىق بارىسىنا مونيتورينگ جۇرگىزدىك. حالىقارالىق بايقاۋشىلاردىڭ شاقىرىلۋىن استانانىڭ رەفەرەندۋمنىڭ بارىنشا اشىقتىعىن، اشىقتىعىن جانە دەموكراتيالىعىن قامتاماسىز ەتۋگە ۇمتىلىسى رەتىندە باعالايمىز. ءبىزدىڭ ميسسيامىزدا 13 باقىلاۋشى اككرەديتتەلگەن. وندا سايلاۋ، زاڭ شىعارۋشى ورگانداردىڭ وكىلدەرى، ش ى ۇ- عا مۇشە مەملەكەتتەردىڭ ديپلوماتيالىق قىزمەتكەرلەرى، سونداي-اق ش ى ۇ حاتشىلىعىنىڭ لاۋازىمدى تۇلعالارى بار»، - دەدى و. كوپىلوۆ استانادا حالىقارالىق بايقاۋشىلارعا قولعابىس كورسەتۋ ورتالىعىندا وتكەن بريفينگتە.
ونىڭ ايتۋىنشا، ش ى ۇ ميسسياسى پرەزيدەنتتىك جانە پارلامەنتتىك سايلاۋدا، سونداي-اق رەفەرەندۋمداردا شىۇ بايقاۋشىلار ميسسياسى تۋرالى ەرەجەنى باسشىلىققا الىپ، قازاقستان رەسپۋبليكاسىنىڭ ۇلتتىق زاڭنامالارىنا سايكەس، مەملەكەت ءىسىن جاڭارتۋدا ساياسي بەيتاراپتىق، وبەكتيۆتىلىك جانە ارالاسپاۋ قاعيداتىن ساقتاي وتىرىپ، ءوز فۋنكسيالارىن ورىندايدى.
رەفەرەندۋم قارساڭىندا ميسسيا مۇشەلەرى دايىندىقتى باعالاۋ ءۇشىن استانا مەن اقمولا وبلىسىندا ورنالاسقان ءبىرقاتار ۋچاسكەلىك رەفەرەندۋم كوميسسيالارىنا بارعان.
«قابىلداۋشى تاراپ داۋىس بەرۋ پروتسەسىن مونيتورينگتەۋ، داۋىس بەرۋگە دايىندىق پەن وتكىزۋ ءۇشىن بارلىق قاجەتتى جاعداي جاساعانىن اتاپ وتكىم كەلەدى. تولىققاندى اقپارات بەرىلگەن. جالپى، ەشقانداي شاعىم جوق. رەفەرەندۋم ازاماتتىق قوعام وكىلدەرىنىڭ بەلسەندى قاتىسۋىمەن جانە سانالى تاڭداۋ جاساۋى ءۇشىن بارىنشا قولايلى جاعدايلار جاساۋىمەن اشىقتىق اتموسفەراسىندا ءوتىپ جاتقانىن ايتقىمىز كەلەدى. رەسپۋبليكالىق رەفەرەندۋم قولدانىستاعى زاڭناماعا جانە قازاقستان رەسپۋبليكاسىندا قابىلدانعان حالىقارالىق مىندەتتەمەلەرگە سايكەس ءوتىپ جاتىر»، - دەدى ميسسيا باسشىسى.
ەسكە سالايىق، بۇگىن قازاقستاندىقتار اتوم ەلەكتر ستانسياسىن سالۋ ماسەلەسى بويىنشا جالپىۇلتتىق رەفەرەندۋمدا داۋىس بەرىپ جاتىر.
رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى:
- ءسىز قازاقستاندا اتوم ەلەكتر ستانتسياسىن سالۋعا كەلىسەسىز بە؟
داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى:
- «ءيا، كەلىسەمىن» نەمەسە، «جوق، كەلىسپەيمىن».
ايتا كەتەيىك، ساعات 14:00 دەگى جاعداي بويىنشا 6339425 ازامات بيۋللەتەن الدى. بۇل تىزىمگە ەنگىزىلگەن ازاماتتاردىڭ 51,77 پايىزىن قۇرايدى.
