ش ى ۇ باس حاتشىسىنىڭ ءرولىن كۇشەيتۋ نە ءۇشىن قاجەت - ساراپشى پىكىرى
استانا. KAZINFORM - قازاقستان قوعامدىق دامۋ ينستيتۋتىنىڭ ساراپشىسى اينۇر اباي قىزى شاڭحاي ىنتىماقتاستىق ۇيىمى باس حاتشىسىنىڭ ءرولىن كۇشەيتۋ نە ءۇشىن قاجەت ەكەنىن ايتتى.
ش ى ۇ استانا سامميتىندە پرەزيدەنت قاسىم-جومارت توقايەۆ قازاقستان ۇيىم باس حاتشىسىنىڭ ءرولىن كۇشەيتۋدى قۇپتايتىنىن ايتقان ەدى. ساراپشى اينۇر اباي قىزى بۇل ۇسىنىستىڭ ءمانىن بىلايشا ءتۇسىندىردى.
«ش ى ۇ باس حاتشىسىنىڭ ءرولىن كۇشەيتۋ وتە ماڭىزدى. ويتكەنى ۇيىمعا مۇشە ەلدەردىڭ سانى ارتىپ جاتىر. ش ى ۇ گەوگرافياسىنىڭ كەڭەيۋىنە بايلانىستى، اينالىساتىن تاقىرىپتارىنىڭ كوبەيۋىنە بايلانىستى، ۇيىمنىڭ الەۋەتىن كوتەرۋ ءۇشىن قۇرىلىمدىق دەڭگەيدە جاڭعىرتۋدان ءوتۋ كەرەكتىگى كوپ ايتىلىپ ءجۇر. سوندىقتان بۇل ۇيىم ءارى قاراي جەمىستى جۇمىس ىستەۋ ءۇشىن، ءرولىن كۇشەيتۋ ءۇشىن، قىزمەتىن جەتىلدىرۋ ءۇشىن باس حاتشىنىڭ ءرولىن كەڭەيتۋ قيسىندى بولادى»، - دەيدى ول.
قازاقستان قوعامدىق دامۋ ينستيتۋتىنىڭ ساراپشىسى استانا سامميتىنىڭ ناتيجەسىندە ش ى ۇ ستراتەگيالىق دامۋىنىڭ 2035-جىلعا دەيىنگى ستراتەگياسى قابىلدانىپ جاتقانىن ەسكە سالدى.
«سونىڭ اياسىندا باس حاتشىنىڭ ءرولىن كۇشەيتۋ وتە ماڭىزدى بولىپ وتىر. ونىڭ ۇستىنە مۇنداي قادام ۇيىمنىڭ ينستيتۋتسيونالدىق تۇرعىداعى الەۋەتىن ارتتىرۋعا سەپتىگىن تيگىزەدى»، - دەدى اينۇر اباي قىزى.
