ش ق و-دا ءماسليحات دەپۋتاتى قارجى جىمقىردى دەگەن كۇدىككە ءىلىندى

استانا. KAZINFORM - ق م ا شىعىس قازاقستان وبلىسى بويىنشا دەپارتامەنتى «QazConstructions» ج ش س باسشىلىعىنا قاتىستى، شىعىس قازاقستان جانە اباي وبلىستارىنىڭ 7 اۋدانىندا 11 الەۋمەتتىك نىساننىڭ قۇرىلىسىنا بولىنگەن بيۋدجەت قاراجاتىن جىمقىرۋ دەرەگى بويىنشا سوتقا دەيىنگى تەرگەپ-تەكسەرۋ جۇرگىزىپ جاتىر.

كۇدىكتىلەردىڭ قاتارىندا «QazConstructions» ج ش س-نىڭ بۇرىنعى ديرەكتورىنىڭ ورىنباسارى، كۇرشىم اۋدانى ءماسليحاتىنىڭ دەپۋتاتى بار.

اتالعان جوبالار حالىقتىڭ ءومىر ءسۇرۋ ساپاسىن ارتتىرىپ، ازاماتتاردىڭ بوس ۋاقىتىن ءتيىمدى وتكىزۋىنە جاعداي جاساۋعا باعىتتالعان بولاتىن.

- الايدا قىلمىستىق ارەكەتتەر سالدارىنان ءتورت دەنە شىنىقتىرۋ-ساۋىقتىرۋ كەشەنى مەن 20 مىڭنان استام ادام تۇراتىن جەتى اۋىلدى سۋمەن قامتاماسىز ەتۋگە ارنالعان سۋ قۇبىرى جەلىلەرى پايدالانۋعا بەرىلمەگەن.

جىمقىرىلعان قارجىنىڭ جالپى كولەمى 2 ميلليارد تەڭگەدەن اسادى. ولار بايلانىسى بار كومپانيالار ارقىلى قولما-قول اقشاعا اينالدىرىلعان.

قىلمىستىق جولمەن الىنعان تابىسقا استاناداعى قىمبات ساناتتاعى تۇرعىن ءۇي كەشەندەرىنەن پاتەرلەر.

سونداي-اق، «Lamborghini Urus» ،«Cadillac Escalade» ،«Mercedes» اۆتوكولىكتەرى مەن اسىل تۇقىمدى جىلقىلار ساتىپ الىنعان. بۇل مۇلىككە سوت سانكسياسىمەن تىيىم سالىندى، - دەلىنگەن ق م ا حابارلاماسىندا.

ەكى كۇدىكتىگە قاتىستى ەكى اي مەرزىمگە قاماۋعا الۋ تۇرىندەگى بۇلتارتپاۋ شاراسى قولدانىلدى.

تەرگەۋ جالعاسىپ جاتىر.

قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريا ەتىلمەيدى.

ايتا كەتەلىك قارجىلىق مونيتورينگ اگەنتتىگى الاياقتىقتىڭ جاڭا ءتۇرى تۋرالى ەسكەرتتى.