ش ق و-دا اۋىر جۇك كولىكتەرى رەسپۋبليكالىق جولدى بۇزىپ جاتىر
وسكەمەن. KAZINFORM - شىعىس قازاقستان وبلىسى كاتونقاراعاي اۋدانىنىڭ تۇرعىندارى اۋىر جۇك كولىكتەرىنىڭ اسفالت جولدى بۇزىپ جاتقانىن ايتىپ شاعىمداندى.
جەرگىلىكتى تۇرعىندارىنىڭ ايتۋىنشا، رەسپۋبليكالىق ماڭىزى بار وسكەمەن- التاي- كاتونقاراعاي- راحمان قاينارلارى تاسجولىنىڭ جاعدايى جاقسى بولعان. الايدا كاتونقاراعايداعى جاڭا اۋەجايدىڭ قۇرىلىسىنا ماتەريال تاسىعان اۋىر جۇك كولىكتەرى جولدى بۇزىپ جاتىر.
- 20 كۇننىڭ ىشىندە جول ابدەن ءبۇلىندى. بۇرىن بۇل جول وقتاۋداي ءتۇزۋ ەدى. ال قازىر 40 توننالىق ساموسۆالدار جولىمىزدى قيراتىپ بارادى، - دەيدى حالىق.
شىعىس قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرجان جۇمادىلوۆ جاعدايدىڭ باقىلاۋعا الىنعانىن ءمالىم ەتتى.
- ءبىز بۇل ماسەلەدەن حاباردارمىز. ءبىراق پرەزيدەنتتىڭ اۋەجاي سالۋعا قاتىستى تاپسىرماسى ورىندالۋى كەرەك. اۋەجاي قۇرىلىسى - ستراتەگيالىق ماڭىزدى جوبا. جۇك كولىكتەرى ءۇشىن قوسىمشا جول سالۋ مۇمكىن ەمەس. بۇزىلعان ۋچاسكەلەر تۋريستىك ماۋسىم باستالعانعا دەيىن تولىق قالپىنا كەلتىرىلەدى، - دەيدى ول.
«قازاۆتوجول» ۇلتتىق كومپانياسىنىڭ وبلىستىق فيليالى شىعىس قازاقستاندا 23-ناۋرىزدان باستاپ وستىك جۇكتەمەگە كوكتەمگى شەكتەۋلەر ەنگىزىلگەنىن، بۇل جىل سايىنعى شارا ەكەنىن ءتۇسىندىردى.
- كوكتەمدە جول جامىلعىسى ەرەكشە وسال بولادى. سەبەبى ەرىگەن سۋدىڭ اسەرىنەن اسفالت استىنداعى توپىراق بەرىكتىگىن جوعالتادى جانە كەز كەلگەن ارتىق جۇكتەمە جابىننىڭ بۇزىلۋىنا اكەلىپ سوعۋى مۇمكىن. سوندىقتان ءبىر وسكە رۇقسات ەتىلگەن جۇكتەمە ۋاقىتشا 10 توننادان 8 تونناعا دەيىن تومەندەتىلدى. الايدا مەردىگەر بۇل شەكتەۋلەردى ساقتاماعان. ەندى ول جولدى ءوز قاراجاتىنا قالپىنا كەلتىرۋگە مىندەتتەلەدى، - دەيدى «قازاۆتوجول» ش ق و فيليالىنىڭ ديرەكتورى نۇربەك تەمىرحانوۆ.
ەسكە سالساق، وسىعان دەيىن كاتونقاراعايداعى توپقايىڭ اۋىلىنىڭ حالقى ءالى كۇنگە دەيىن وزەننەن سۋ تاسىپ ىشۋگە ءماجبۇر ەكەندىگى جايلى جازعانبىز.
اۆتور
تالعاتجان مۇحامەتبەك ۇلى
