دزيۋدوشى ءابيبا ءابۋجاقىنوۆاعا ءۇشىنشى كولىك سىيعا بەرىلدى

اتىراۋ. KAZINFORM - پاريج وليمپياداسىندا 5-ورىن العان دزيۋدوشى ءابيبا ءابۋجاقىنوۆاعا ءۇشىنشى كولىك سىيعا بەرىلدى. ەندى ونىڭ Kia ،Zeekr جانە BMW X3 ماركالى كولىگى بار.

«جەڭىس» دزيۋدو كلۋبىنىڭ پرەزيدەنتى الماز السەنوۆ دزيۋدوشى ءابيبا ءابۋجاقىنوۆاعا BMW X3 كروسسوۆەرىن سىيلاعان.

«الماز السەنوۆ كەزەكتى كولىكتىڭ كىلتىن تابىستادى. كلۋبتىڭ كاپيتانى رەتىندە العان كولىك مەنى بۇدان كەيىن دە توقتاماۋعا، تىنباي ەڭبەكتەنۋگە تاعى ءبىر سەبەپ دەپ ويلايمىن. وليمپيادا ويىندارى مەنىڭ ءومىرىمدى تۇبەگەيلى وزگەرتكەنى انىق. سوعان قاراماستان بارلىعى مەنى قولداپ، جىلى لەبىزدەرىن اياپ جاتقان جوق. مەملەكەتتەن، رەسپۋبليكالىق فەدەراتسيادان، اتىراۋ وبلىسى جانە سۇيىكتى «Jenys» كلۋبىمنان بۇرىن قانداي قولداۋ بولسا، وليمپياداداعى جۇلدەسىز ناتيجەگە قاراماستان قولداۋىن جالعاستىرىپ وتىر. بۇل - ءبىر كۇندىك ەمەس، كوپ جىلدىق ەڭبەگىمنىڭ، ماڭداي تەرىم مەن تىنىمسىز جاتتىعۋلاردىڭ ناتيجەسىندە جەتكەن سىي دەپ قابىلدايمىن. ءالى-اق سىزدەردىڭ ۇمىتتەرىڭىزدى اقتاپ، قولداۋلارىڭىزدىڭ وتەۋى رەتىندە جەڭىستى جولدى جالعاستىرامىن دەپ ۋادە بەرەمىن»، - دەدى ءابيبا ءابۋجاقىنوۆا الەۋمەتتىك جەلىدەگى پاراقشاسىندا.

دزيۋدوشى ءابيبا ءابۋجاقىنوۆا - الەم چەمپيوناتىنىڭ ەكى دۇركىن كۇمىس جۇلدەگەرى. ول 48 كەلى سالماقتا كۇرەسىپ ءجۇر. پاريج وليمپياداسىنا اتىراۋ وبلىسىنىڭ اتىنان قاتىسىپ، قولا جۇلدە ءۇشىن بەلدەسۋدە شۆەد پالۋانىنان جەڭىلگەن ەدى. الايدا، ءتورتجىلدىق دودادا 5-ورىنعا تۇراقتادى.

وعان پاريج وليمپياداسىنان ورالعان ساتتە پارلامەنت ءماجىلىسىنىڭ دەپۋتاتى ايداربەك حودجانازاروۆ Kia كولىگىن سىيعا بەردى. ال، اتىراۋ وبلىسىنىڭ دەمەۋشىلەرى Zeekr كولىگىن الىپ بەردى.

ەسكە سالا كەتەلىك، بۇدان بۇرىن اتىراۋلىقتار پاريج وليمپياداسىنان ورالعان ءابيبا مەن ەسميگۇلگە كولىك سىيلاعانىن جازعان ەدىك.

كەيىن دزيۋدوشى ءابيبا ءابۋجاقىنوۆا مەن ءالى-اق جارق ەتەمىن دەپ جازبا قالدىرعانىن حابارلاعان بولاتىنبىز.