ديەتولوگتار: تاڭعى اشىعۋ ءتۇرلى سىرقاتقا ەم

استانا. قازاقپارات - تاڭعى اس ىشۋدەن ۋاقىتشا تىيىلۋ كورەك. تاعام تانۋ ماماندارى سوزىلمالى سىرقاتى بار ادامدارعا وسىنداي كەڭەس بەرىپ وتىر. ازاندا اشىعۋ قانت ديابەتى، قان قىسىمى جوعارى جاندارعا پايدالى.

دەگەنمەن مۇنداي ەم-دومعا ديەتولوگ- دارىگەر كەلىسىمىمەن عانا كىرىسۋ كەرەك. ال تاڭعى استى تۇراقتى ىشەتىن تۇرعاندار قانداي تاعام تۇرلەرىن تۇتىنىپ، نەدەن باس تارتۋى قاجەت؟

تاڭعى اس ىشكەن ادام كۇنى بويى سەرگەك جۇرەدى. شارشاۋ، ۇمىتشاقتىق، زەيىننىڭ تومەندىگى سەكىلدى ماسەلەلەر بولمايدى. سويتە تۇرا، كەي كىسىلەر ءۇشىن بۇل ادەتتەن ۋاقىتشا باس تارتقان ابزال. دارىگەرلەر: «تاڭعى اشىعۋ ءتۇرلى سىرقاتقا ەم، دەرتكە داۋا»، - دەيدى.

مارال الماعانبەتوۆا، جالپى تاجىريبەلىك دارىگەر، ديەتولوگ:

- تاڭعى اس جەمەگەن كەزدە قانداعى ينسۋلين گورمونى، قانداعى گليۋكوزا تومەندەيدى. سوعان بايلانىستى قابىنۋ پروتسەستەرى دە ازايادى. سودان كەيىن يممۋنوگلوبۋلين جوعارىلايدى. بۇل دەگەنىمىز - ءبىزدىڭ يممۋنيتەتىمىزگە جاۋاپتى جۇمىس جاسايتىن، ءارتۇرلى ينفەكسيالاردان قورعايتىن اعزامىزدىڭ كۇزەتشىلەرى. سول يممۋنوگلوبۋليننىڭ جۇمىسى جوعارلايدى، سەبەبى اعزادان جۇكتەمە تۇسەدى.

تاڭعى اسقا قانداي تاعام ءتۇرىن تۇتىنعان دۇرىس؟

ماماندار تاماقتانۋدان بۇرىن جىلى سۋ ءىشۋدى كەڭەس ەتەدى. «ال تاماققا قۇرامىندا كومىرسۋى كوپ، بەلوكقا باي، مايسىز اس ءىشۋ كەرەك»، - دەيدى.

باعاي نازارباي ۇلى، ا م ۋ اكادەميك دالەنوۆ اتىنداعى ع ز ي قىزمەتكەرى:

- تاڭعى استى ءبىز قالاي ءىشۋىمىز كەرەك؟ تاڭعى استا كۇردەلى كومىرسۋلار، بەلوك، ماي قامتىلاتىن تاعام تۇرلەرى بولۋى ءتيىس. كومىرسۋلارعا، مىسالى، دانەكتەردەن جاسالعان بوتقالار، سۇلى، ارپا ت. ب. جاتادى. بەلوك ءۇشىن سۋعا پىسىرىلگەن جۇمىرتقا، يوگۋرت قامتىلعان اس ءتۇرى بولعان ءجون. ال كەشكى اسقا، كەرىسىنشە، قۇنارى تومەن، تەز قورىتىلاتىن تاعام تۇرلەرىن تۇتىنعان ابزال.

الايدا تاڭنىڭ اتىسىنان، كەشتىڭ باتىسىنا دەيىن ۇيىنەن قوناق ارىلمايتىن قازاقتارعا كەشكى ءدامنىڭ ورنى ەرەكشە. ەت اسىپ، قازان كوتەرۋ - قالىپتى ءھام ۇيرەنشىكتى ءىس.

باعاي نازارباي ۇلى، ا م ۋ اكادەميك دالەنوۆ اتىنداعى عزي قىزمەتكەرى:

- قازاقتا ماقال بار: «تاڭعى استى اسىرا جە، تۇسكى استى باتىرا جە، كەشكى استى تارتا جە»، - دەگەن. ەندى قازاق ەت جەگەن كەزدە ونى قورىتۋ ءۇشىن نە ىستەدى؟ تاماق ءسىڭىرىلۋ ءۇشىن قيمىل-ارەكەت بولعان. قوزعالىس كوپ بولعان. سونىمەن بىرگە كۇردەلى تاعامداردى جەگەن كەزدە ايران، ءسۇت، قىمىز ىشكەن. بۇل دا استىڭ جاقسى قورىتىلۋىنا كومەكتەسەتىن جاقسى سۇيىقتىق.

ءيا، بۇرىنعىلار جاتار ورىنعا اعارعان ىشكەن. سەبەبى سول كەشكى استىڭ تەز قورىتىلۋىنا كومەكتەسەدى. مۇنى اتام قازاق بىلگەن، دارىگەر دە قوشتاپ وتىر. ەندەشە ءسىز بەن بىزدە قاپەردە ۇستاعانىمىز ابزال.

24.kz