دىنمۇحامەد قونايەۆ كۇزەتسىز جۇرەتىن

استانا. قازاقپارات - دىنمۇحامەد قونايەۆ كىشىپەيىل باسشى ەسەبىندە تانىلدى. ول ەرتەمەنەن كوممۋنيستىك داڭعىل مەن كيروۆ كوشەسىنىڭ (بۇگىنگى ابىلايحان داڭعىلى مەن بوگەنباي باتىر كوشەسىنىڭ) قيىلىسىنداعى ءۇش قاباتتى ۇيدەن شىعىپ، ىلديداعى ۇكىمەت ۇيىنە قاراي جايباراقات جۇمىسقا بارا جاتاتىن.

قونايەۆ سول ۇيدە كوپ جىلدار بويى تۇردى، ءتىپتى، قازاقستان ك پ و ك-نىڭ ءبىرىنشى حاتشىسى بولعان كەزىندە دە، قالانىڭ ورتالىعىندا ءۇش بولمەلى پاتەرى بولا تۇرا الگى ۇيدە تۇردى.

ال باسقا ۇيگە كوشكەندە قونايەۆ پاتەرىن ءوزىنىڭ كادرلىق ساياساتىن قاتتى سىناپ جۇرگەن جازۋشى ءالجاپپار ابىشەۆكە سىيعا تارتىپ كەتتى. مەن دە سول كەزدە الماتىنىڭ ورتالىعىندا تۇردىم، مەنىڭ دە جۇمىسقا باراتىن جولىم كوممۋنيستىك داڭعىلدىڭ بويى ەدى. اندا-ساندا الدىمنان جالعىز كەلە جاتقان ۇزىن بويلى قونايەۆتىڭ سىمباتتى تۇلعاسىن سىرتىنان كورەتىنمىن.

وسىنى ايتسام، ادامدار سەنبەيدى: قالايشا ول كۇزەتسىز ءجۇر دەپ. راسىندا دا كۇزەت قىزمەتىنىڭ سانى كوبەيتىلىپ، كىم كورىنگەن جانىنا كۇزەت قاپتاتىپ جاتقان ۋاقىتتا مەملەكەتتىڭ ءبىرىنشى ادامى جۇمىسقا جاياۋ جانە كۇزەتسىز بارادى دەگەنگە سەنۋ وتە قيىن.

مينيسترلەر كەڭەسىنىڭ ءتوراعاسى بولعاندا قونايەۆ اكادەميك اتاعى ءۇشىن وزىنە تولەنەتىن 340 سوم شاماسىنداعى اقىدان باس تارتقانىن بىلەمىز. بۇل اقشانى ول بالالار مەن جاس عالىمدارعا كومەكتەسۋ ماقساتىندا جۇمساۋعا بۇيىردى.

وسىنداي كىشىپەيىلدىلىك ونىڭ تۋا ءبىتتى قاسيەتى ەكەنى كوزگە كورىنىپ تۇردى جانە جۇرتتىڭ وعان دەگەن سەنىمىن كۇشەيتتى. ونىڭ جەكە باسىنىڭ بايلىق-داۋلەتكە قىزىعۋشىلىعى بايقالمادى.

ونىڭ اينالاسىنداعى ادامداردىڭ اراسىندا ونى ۇلىقتاۋدان جارىس بولعان جوق، ەسەسىنە ولار ونىڭ كوشباسشىلىق بەدەلىن قىزعىشتاي قوريتىن، ونىڭ جەتىستىكتەرىنە قىلاۋ تۇسىرمەۋگە تىرىساتىن.

قارت جۋرناليست مادات اققوزين