دينارا زاكيەۆا 12 جاسقا دەيىنگى بالالاردى ۇيدە جالعىز قالدىرۋعا زاڭدى تۇردە تىيىم سالۋدى ۇسىندى
استانا. KAZINFORM - بالالار ومبۋدسمەنى دينارا زاكيەۆا 12 جاسقا دەيىنگى بالالاردى ۇلكەندەردىڭ قاراۋىنسىز قالدىرۋعا زاڭدى تۇردە تىيىم سالۋ تۋرالى باستاما كوتەردى.
ول اقمولا وبلىسىندا ءورت سالدارىنان ەكى بالا قازا تاپقان قايعىلى وقيعانى مىسال كەلتىرگەن. سونداي-اق، ونىڭ ايتۋىنشا، 2024 -جىلدىڭ باسىنان بەرى قازاقستاندا بالالاردىڭ ولىمىمەن 15 ءورت وقيعاسى تىركەلدى. ولاردىڭ كوپشىلىگىندە بالالار ۇيدە جالعىز بولعان.
- وسى فاكتىلەردى تالداي وتىرىپ، مەن 12 جاسقا دەيىنگى بالالاردى ەرەسەكتەردىڭ قاراۋىنسىز قالدىرۋعا تىيىم سالاتىن زاڭنامالىق شارالاردى ازىرلەۋ قاجەت دەپ سانايمىن، ارينە، بۇل رەتتە قولداۋدى قاجەت ەتەتىن وتباسىلارعا مەملەكەت تاراپىنان كومەك كورسەتۋ باعدارلامالارى قاجەت»، - دەپ جازدى ول Instagram پاراقشاسىندا.
بۇعان دەيىن دينارا زاكيەۆا قازاقستاندا قورعانشىلىق قىزمەتكەرلەرىنىڭ سانى ارتىپ، جالاقىسى كوتەرىلەتىنىن ايتقان بولاتىن.
اۆتور
ەلميرا ورالبايەۆا
