دينا ءتاڭسارى چەرنوگوريادان باسپانا سۇرادى

استانا. قازاقپارات - 15-ساۋىردە ەكستراديتسيالاۋ ءراسىمى اياسىندا چەرنوگوريا سوتى دينا ءتاڭسارىنى ونىڭ چەرنوگوريادان باسپانا سۇراپ قارالماعان وتىنىشىنە بايلانىستى قاماۋدان بوساتتى، دەپ حابارلايدى ق ر باس پروكۋراتۋراسىنىڭ باسپا ءسوز قىزمەتى.

- قازاقستان رەسپۋبليكاسى مەن چەرنوگوريا رەسپۋبليكاسى اراسىندا بەرۋ تۋرالى حالىقارالىق شارت بولماعاندىقتان، ونى ەكستراديتسيالاۋ تۋرالى شەشىمدى چەرنوگوريانىڭ قۇزىرەتتى ورگاندارى ۇلتتىق زاڭناماسىنا سايكەس قابىلدايدى، - دەپ حابارلادى باس پروكۋراتۋرا.

سونداي-اق ۆەدومستۆودا قازاقستاندا دينا سمايىلوۆاعا (ءتاڭسارى - رەد. ) قاتىستى قىلمىستىق ءىس بويىنشا سوتقا دەيىنگى تەرگەۋ مەرزىمى توقتاتىلعانىن اتاپ ءوتتى.

ەسكە سالا كەتسەك، 2023 -جىلى 27-جەلتوقساندا ىشكى ىستەر مينيسترلىگى قۇقىق قورعاۋشى، «نە مولچي» قورىنىڭ باسشىسى دينا تاڭسارىگە ىزدەۋ جاريالادى.

الماتى قالاسىنىڭ، شىعىس قازاقستان جانە الماتى وبلىستارىنىڭ پوليتسيا دەپارتامەنتتەرى وعان قاتىستى كورىنەۋ جالعان اقپارات تاراتۋ، جەكە ومىرگە قول سۇعىلماۋشىلىقتى بۇزۋ فاكتىلەرى بويىنشا 6 قىلمىستىق ءىس قوزعاپ، تەرگەپ جاتىر. ونىڭ ىشىندە ەكى ءىس - الاياقتىق بويىنشا.

بۇعان دەيىن دينا ءتاڭسارىنىڭ چەرنوگوريادا ۇستالعانىن، ونىڭ قازاقستانعا ەكستراديتسيالانۋى مۇمكىن ەكەنىن حابارلاعان ەدىك.

كەيىننەن چەرنوگوريا بيلىگى دينا ءتاڭسارىنى قاماۋدان بوساتقانىن جازعان بولاتىنبىز.

اۆتور

زارينا تۋعانبايەۆا