ديماشتىڭ ءانى العاش رەت الەمدەگى ەڭ ءىرى مۋزىكالىق راديودا قويىلدى

استانا. KAZINFORM - ديماش قۇدايبەرگەننىڭ «Love’s Not Over Yet» ءانى العاش رەت الەمدەگى ەڭ ءىرى مۋزىكالىق راديو برەندتەردىڭ ءبىرى - Radio Disney-دىڭ بارلىق مەكسيكالىق ستانسيالارىنىڭ روتاتسياسىنا ەندى. بۇل تۋرالى dimashnews.com جازدى.

ءىس-شارانىڭ باستاماشىسى - ديماشتىڭ 2023 -جىلى بۋداپەشتتەگى بولعان كونتسەرتىنەن شابىتتانعان جانكۇيەرى. ول سول تۇستا ءارتىستىڭ داۋىسىن Disney راديوسىنان ەستۋدى ارمانداعان ەكەن. كوپ ۇزاماي ءانشىنىڭ اندەرى 30 دان استام ەلدەگى Dears فان-قوعامداستىعى قولداعان حالىقارالىق ناۋقانعا اينالدى.

الەۋمەتتىك مەديا، اتاپ ايتقاندا X پلاتفورماسى (بۇرىنعى Twitter) ارقىلى جانكۇيەرلەر #DimashRadioDisney حەشتەگىن 2024 -جىلدىڭ قىركۇيەك ايىنىڭ سوڭىندا ترەندكە اينالدىرعان ەدى. بۇل مەكسيكاداعى راديوستانتسيانىڭ جۇرگىزۋشىلەرى مەن پروديۋسەرلەرىنىڭ نازارىن اۋداردى.

پاچۋكاداعى ديسنەي راديوسىنىڭ جۇرگىزۋشىسى بريسسيا مەن پروديۋسەر ەدۋاردو بۇل يدەيانى قولداپ، ديماشتىڭ اندەرىن باعدارلامالاۋ بولىمىندەگى راديوستانسيانىڭ اندەر تىزىمىنە ەنگىزۋ تۋرالى ۇسىنىس جاسادى.

ولاردىڭ قاتىسۋى مەن جانكۇيەرلەردىڭ بەلسەندىلىگىنىڭ ارقاسىندا «Love’s Not Over Yet» ءانى قازىر بۇكىل مەكسيكانىڭ Radio Disney ەفيرىندە وينالادى.

ديماش قۇدايبەرگەن نيۋ-يوركتەگى ايگىلى Madison Square Garden ساحناسىندا جەكە كونسەرت وتكىزەتىنىن جازعان بولاتىنبىز.