ديماش قىتايلىق CGTN تەلەارناسىنىڭ «يدەيالار وزگەرىس اكەلەدى» جوباسىنا قاتىستى

Dimash
Photo: Dimashnews.com

الماتى. KAZINFORM – ق ح ر ءتوراعاسىنىڭ قازاقستانعا مەملەكەتتىك ساپارى قارساڭىندا «يدەيالار وزگەرىس اكەلەدى» باعدارلاماسىندا قازاق-قىتاي دوستىعىن دامىتۋعا زور ۇلەس قوسقان تۇلعالار قوناق بولدى. ءتۇسىرىلىم الماتى قالاسىندا ءوتتى. بۇل جايىندا Dimashnews حابارلادى.

جوبانىڭ باس كەيىپكەرى ديماش قىتايداعى كوكتەم فەستيۆالىندە العاش ونەر كورسەتكەن كەزدە باسىنان وتكەن جاعدايلاردى ايتىپ بەردى.

«ەڭ تانىمال پەرفورمانسىم رەتىندە ەسىمدە ماڭگى قالىپ كەتتى. 2018-جىلى دوستارىم تيا رەي جانە سياو تسزينتەنمەن بىرگە ونەر كورسەتۋ قۇرمەتىنە يە بولدىم. ءبىز قىتاي تىلىندە ءان ايتتىق. قاتتى ۋايىمداعانىم ەسىمدە. ارينە، ساحنانىڭ الدىندا قوبالجۋ، جاۋاپكەرشىلىكتى سەزىنۋ - قالىپتى جاعداي. سوعان قاراماستان ول كەش كوڭىلدى جانە تاماشا ءوتتى! ءدال وسى ءسات ماعان قىتايداعى فاناتتار سانىن كوبەيتۋگە كومەكتەستى. ال I am a Singer شوۋىنا قاتىسقاننان كەيىن قىتايدا عانا ەمەس، بۇكىل الەمدە ۇلكەن كونسەرتتەردە ونەر كورسەتە باستادىم»، - دەيدى ورىنداۋشى.

Dimash
Photo: Dimashnews.com

ول قىتاي حالقىنا 22 جاستاعى ديماشتى الەمگە كورسەتىپ، تانىتقانى ءۇشىن شەكسىز ريزا.

«مويىنداۋىم كەرەك، وسىدان كەيىن مەنىڭ ونەردەگى تاسىم ورگە دومالاي باستادى. جالپى قىتاي كورەرمەندەرى مەنىڭ جۇرەگىمدە ەرەكشە ورىن الادى. قىتايعا قانشا بارسام دا، قانشا رەت ونەر كورسەتسەم دە، ولاردىڭ ماعان دەگەن سىي-قۇرمەتى مەن ماحابباتى مەنى تاڭقالدىرادى. سولاردىڭ ارقاسىندا شابىتتانىپ، جۇمىس ىستەپ، ەڭبەكتەنۋگە ەكى ەسە تالپىنا باستايمىن»، - دەيدى ديماش.

ديماش قىتاي حالىق رەسپۋبليكاسىنىڭ ءتوراعاسى شي جينپيڭ مىرزامەن العاشقى كەزدەسۋى جانە شيان قالاسىندا وتكەن «ورتالىق ازيا-قىتاي» سامميتىندە سويلەگەن ءسوزى تۋرالى ەستەلىگىن ءبولىستى.

«ءبىر-ەكى اپتا بۇرىن قوڭىراۋ شالىپ، كونسەرتكە شاقىردى. وسى شاقىرۋدى قابىلداعانىما وتە قۋانىشتىمىن. ەگەر مەنىڭ جۇمىسىم ەلدەر اراسىنداعى ديپلوماتيالىق قارىم-قاتىناستىڭ نىعايۋىنا قانداي دا ءبىر سەپتىگىن تيگىزسە، مەنەن اسقان باقىتتى ادام بولا قويماس. پرەزيدەنتتەرگە ارتىلعان جۇكتىڭ اۋىر ەكەنىن، ارينە، بىلەمىن، تۇسىنەمىن. ەكى ەلدىڭ دوستىعىنا وراي ەكى ءان جازعانىم ەسىمدە. ءبىرىنشى ءان قىتايشا، ەكىنشىسى قازاقشا جازىلدى. مەنىڭ كورسەتكەن ونەرىم قىتاي پرەزيدەنتىنە ەرەكشە اسەر ەتىپ، ۇناتىپ قالىپتى. بىردەن بايقاعانىم - ول كىسى رۋحاني تۇرعىدا كەمەلدەنگەن ادام. ءاندى تولىققاندى تۇسىنۋگە تىرىسىپ، سەزىنىپ، تولعانادى. جالپى وتە مادەنيەتتى كىسى ەكەنى بىردەن اڭعارىلادى. شي جينپيڭ مىرزامەن العاش رەت 2017-جىلى I am a Singer جوباسىنان كەيىن كەزدەسكەن بولاتىنمىن. ءاندى ورىنداپ بولعان سوڭ ول كىسى ماعان كەلىپ، جالپى مەن تۋرالى جانە مەنىڭ ونەرىم تۋرالى، قىتايداعى ەرەكشە تانىمالدىعىم تۋرالى ءوز پىكىرىن ايتقانى ەسىمدە. ماعان باتاسىن بەرىپ، ونەرىمە جانكۇيەر ەكەنىن، سونداي-اق، ايەلى دە مەنىڭ ونەردەگى جولىمدى باقىلاپ جۇرەتىنىن ايتىپ، ەرەكشە اسەرلەندىردى. بۇل، ارينە، مەن ءۇشىن وتە قۋانىشتى جانە سونىمەن قاتار زور جاۋاپكەرشىلىك جۇكتەگەن وقيعا بولدى»، - دەيدى ديماش قۇدايبەرگەن.

Димаш принял участие в проекте китайского телеканала CGTN «Идеи меняют»
Фото: dimashnews.com

سول ساتتەن بەرى 7 جىلدان استام ۋاقىت ءوتتى.

«وسى ۋاقىت ىشىندە مەن قىتاي مادەنيەتى، قىتاي تاريحى وتە تەرەڭ جانە اۋقىمدى ەكەنىن ءتۇسىندىم. ءبىز بار بولعانى كورشى ەلمىز. مادەني تۇرعىدان العاندا، وسى باعىتتا ءبىزدىڭ سالانىڭ بارىنشا كوپ وكىلدەرى جۇمىس ىستەگەنىن قالايمىز، ويتكەنى بۇكىل الەم، مىسالى، دجەكي چاننىڭ كىم ەكەنىن بىلەدى. قىتاي مادەنيەتىنىڭ قانداي ەكەنىن ءبارى بىلەدى. سول سەبەپتى مادەنيەتىمىزدى، ەلدىگىمىزدى الەمگە دارىپتەيتىن قازاقستاندىق جىگىتتەر قىتاي ونەرپازدارىمەن بىرلەسىپ جۇمىس جاساۋ كەرەك. ارينە، وسىعان بايلانىستى قىتاي مەن قازاقستان اراسىنداعى مادەني الماسۋ ودان ءارى جاندانا تۇسەتىنى ءسوزسىز. ال، وسى ورايدا قازاقستان مەن قىتاي وتە جاقسى ديپلوماتيالىق قارىم-قاتىناستاعى ەلدەر ەكەنىنە دە قۋانىشتىمىن. مەنىڭ مىندەتىم - بەيبىتشىلىكتى، سۇيىسپەنشىلىكتى، تۇسىنىستىك پەن دوستىقتى قولداۋ. مەن تەك قىتاي مەن قازاقستاندا عانا ەمەس، سونىمەن قاتار، بۇكىل الەمدەگى تىڭدارماندار مەن كورەرمەندەرگە جەتكىزگىم كەلەتىنى: حالىقتار اراسىندا تەك بەيبىتشىلىك پەن كەلىسىم ورناپ، سوعىسسىز بەيبىت ءومىر ورناعانىن قالايمىن»، - دەپ اعىنان جارىلادى ءانشى.

سوڭعى جاڭالىقتار