ديماش قۇدايبەرگەن تاعى ءبىر ماراپاتقا يە بولدى
استانا. KAZINFORM – ديماش قۇدايبەرگەن «جىلدىڭ مادەنيەت قايراتكەرى» نوميناتسياسىن جەڭىپ الدى.

16-قاڭتاردا استانادا «حالىقتىڭ سۇيىكتىسى – 2024» ۇلتتىق سىيلىعىنىڭ ماراپاتتارى سالتاناتتى تۇردە تابىستالدى.
ديماش قۇدايبەرگەن بۇل ماراپاتتى ءتورتىنشى رەت يەلەنىپ وتىر. ول 2023-جىلى «حالىقتىڭ سۇيىكتىسى» سىيلىعىنىڭ ءۇش دۇركىن يەگەرى رەتىندە ارنايى نوميناتسيامەن ماراپاتتالعان بولاتىن.
سالتاناتتى كەش بارىسىندا ءانشى حالىققا العىسىن ءبىلدىردى:
«حالقىما، قىمباتتى جەرلەستەرىمە مەنىڭ شىعارماشىلىعىما ەرەكشە دەن قويىپ، قۇرمەتپەن قاراعانى ءۇشىن ۇلكەن ريزاشىلىعىمدى ءبىلدىرىپ، العىسىمدى ايتامىن. كوپ راقمەت، دوستار!
بۇگىن «حالىقتىڭ سۇيىكتىسى» سىيلىعىن العان بارلىق ۇمىتكەردى قۇتتىقتايمىن. بارشاڭىزعا اماندىق پەن بەرەكە تىلەيمىن. ءبىزدىڭ باستامالارىمىزعا قولداۋ تانىتقان اربىرىڭىزگە مول تابىستار تىلەيمىن»، - دەدى ول.
ەسكە سالايىق، بۇعان دەيىن ديماش قۇدايبەرگەن تاعى ءبىر اتاققا يە بولعانى حابارلانعان بولاتىن.
