ديماش قۇدايبەرگەن «تاۋ ىشىندە» انىنە بەينەبايان ءتۇسىردى
استانا. قازاقپارات - 15- مامىردا ديماش قۇدايبەرگەن بەلگىلى قازاق اقىنى ءارى جازۋشىسى، قازاق ادەبيەتىنىڭ نەگىزىن سالۋشىلاردىڭ ءبىرى ساكەن سەيفۋلليننىڭ انىنە تۇسىرىلگەن جاڭا بەينەباياننىڭ تۇساۋىن كەستى.
«تاۋ ىشىندە» پرەمەراسى قارساڭىندا رەداكتسيا بەينەباياننىڭ رەجيسسەرى عالىم اسىلوۆتان جانە مۋزىكالىق فيلمدە باستى ءرولدى سومداعان اكتريسا ايىم سەيىتمەتوۆادان سۇحباتتاستى
رەجيسسەر عالىم اسىلوۆتىڭ سوزىنشە، بەينەباياندا ديماشتى ەرەكشە جانردا ءتۇسىرىپ، كورەرمەندى تاڭعالدىرعىسى كەلگەندەرىن ايتادى.
- اۋەلى، ارينە، ءاندى ورىنداپ الدىق. ءبىز سەناريدى باسقاشا جازىپ، ديماشتى ەرەكشە جانردا ءتۇسىرىپ، كورەرمەندى تاڭ قالدىرعىمىز كەلدى. ءانشى بۇدان بۇرىن حوررور، ەكشن، عارىشتىق فانتاستيكا جانرىندا بەينەباياندارعا ءتۇسىپ كورگەن، سول سەبەپتى بۇل جولى كومەديا جانرىندا بايقاپ كورۋدى ءجون كوردىك، - دەدى ول.
اسىلوۆ تۇسىرىلىمدە ەڭ قيىن، قىزىقتى جانە ەستە قالعان قانداي ەرەكشە ساتتەر بولعانىن ايتىپ بەردى.
- ديماشتىڭ بەينەسىن باسقا كەيىپكەرلەرمەن ۇيلەستىرۋ وڭاي ءىس ەمەس ەدى، ناتيجەسى ستاندارتقا ساي كەلمەۋى مۇمكىن، ءبىراق ءبارى ويداعىداي بولدى دەپ ويلايمىن. اسىرەسە، اكەسى مەن شەشەسى بولىپ ويناعان باستى رولدەگى كەيىپكەرلەردىڭ ويىنى، ولاردىڭ كاسىبي شەبەرلىگى مەنى تاڭعالدىردى. ءبىر قىزىعى، بەينەباياننىڭ العاشقى كورىنىستەرىندەگى سوزدەردى ءتۇسىرىلىم الاڭىنداعى اكتەرلار يمپروۆيزاتسيالاعان، - دەدى مامان.
رەجيسسەر باستى رولدەرگە اكتەرلەردى قالاي تاڭدالعانىن ايتتى.
- ديماش بىردەن اكتەرلىك وتباسىعا ۇسىنىس جاسادى، بۇل ارينە، تاماشا شەشىم بولدى. ول وتباسى ديماشتى بالا كەزىنەن بىلەدى، ياعني وتباسىلىق دوستار، - دەپ ءتۇسىندىردى عالىم اسىلوۆ.
ديماشتىڭ جاڭا بەينەبايانىندا اتا- اناسى، تانىمال ارتىستەر ازات سەيىتمەتوۆ جانە داناگۇل تەمىرسۇلتانوۆامەن بىرگە قازاقستاندىق اكتريسا ءارى بلوگەر ايىم سەيىتمەتوۆا ءتۇستى.
ايىم قازۇوۋ- ءدى «مۋزىكالىق تەاتر ءارتىسى» ماماندىعى بويىنشا بىتىرگەن. اكتريسا كومەديالىق جانە مەلودرامالىق سەريالدار مەن فيلمدەردەگى رولدەرىمەن تانىمال. ول: «كۆارتيرانتتار»، «توي ليۋبوي سەنوي»، «جىبەك»، «شەكاراسىز ماحاببات» جانە ت. ب. كينولاردا ويناعان.
ايىم بەينەجازبانى ءتۇسىرۋ جۇمىسىنىڭ قالاي باستالعانىن ايتتى.
- ماعان انام حابارلاسىپ، ديماشتىڭ كليپىنا تۇسپەكشى بولىپ جاتقاندارىن جانە ماعان باستى رولدە ويناۋدى ۇسىنعانى تۋرالى ايتتى. انام مەنىڭ كونتاكتىمدى انشىگە بەرىپ قويعانىن جانە ولاردىڭ جاقىن ارادا ماعان قوڭىراۋ شالاتىنى تۋرالى ەسكەرتتى. سەناريدىڭ وتە قىزىقتى ەكەنىن جانە مەنىڭ كەلىسىمىمنىڭ ماڭىزدى ەكەنىن ايتتى. اتا-انامدى دا كليپكە قاتىسۋعا شاقىرىپتى. سەناري شىنىمەن دە وتە قىزىقتى ەكەن. مەن بىردەن بۇل جوباعا قاتىسۋ تۋرالى ۇسىنىستى قۋانا قابىلدادىم، - دەيدى اكتريسا.
ونەر يەسى اتا- اناسىمەن جۇمىس ىستەۋ قۇندى دۇنيە ەكەنىن اتاپ ءوتتى.
- مەن اتا- اناممەن بىرگە تۇسىرىلىمدەرگە تۇسكەندى جاقسى كورەمىن. ولاردىڭ جانىندا ءوزىمدى ەرەكشە جايلى سەزىنەمىن. ولار ءاردايىم قولداپ، كەڭەستەرىن بەرۋدەن ايانبايلى. ارينە، ولاردىڭ تاجىريبەسى دە مول. ءبىر كادرعا بىرگە ءتۇسۋ وتە قۇندى دۇنيە. ويتكەنى بۇل دا بىزدىڭ وتباسى تاريحىمىزدىڭ ۇزاق جىلدار بويىنا ساقتالاتىن ەستەلىگى. كينوداعى ەڭ العاشقى رولىمدە اكەممەن بىرگە تۇسكەن بولاتىنمىن. ول سەناري بويىنشا ماعان اكەمدەي بولعان اعا رولىن ويناعان بولاتىن. ونىڭ مەنى سول كەزدەگى قولداۋىن ەشقاشان ۇمىتپايمىن. اتا- اناممەن ءبىر كادردا ويناعانىما ەرەكشە قۋانىشتىمىن، - دەدى ول.
ول ديماشپەن العاش رەت ءتۇسىرىلىم الاڭىندا جۇمىس ىستەگەندە العان اسەرىمەن ءبولىستى.
- ديماش - وتە مۇقيات، قامقور جان، سونداي-اق، ونىمەن اڭگىمەلەسۋ وتە قىزىقتى. ول بارىنە كوڭىل بولۋگە تىرىسادى. وسى ءۇش كۇندىك تۇسىرىلىمدە ۇجىممەن بىرگە وتكىزگەن از عانا ۋاقىتىمىزدا - قانشاما ەموتسيالار، جىلۋلىق پەن جاقسى ەنەرگياعا تولى ساتتەر كوپ بولدى. ديماشپەن جانە ونىڭ كومانداسىمەن جۇمىس ىستەۋ ماعان قاتتى ۇنادى. ول كوڭىلدى، تالانتتى جانە ەڭبەكقور، سونداي-اق يۋموردى ەرەكشە تۇسىنەتىن تاماشا ادام. ەلىمىزدىڭ ناعىز ماقتانىشى! وسىنداي ءانشىنىڭ بەينەبايانىنا ءتۇسۋ ءبىز ءۇشىن ۇلكەن مارتەبە، - دەپ تۇيىندەدى ايىم سەيىتمەتوۆا.
ايتا كەتەيىك، ديماش قۇدايبەرگەن «تاۋ ىشىندە» اتتى جاڭا انىنە چەللەندج جاريالادى.
وسىعان دەيىن برازيليادا ديماشتىڭ سۋرەتىمەن بەزەندىرىلگەن اۆتوبۋستار پايدا بولعانىن جازدىق.
