ديماش قۇدايبەرگەن الەمدىك جانە ءداستۇرلى دىندەر كوشباسشىلارى سەزىنىڭ ىزگى نيەت ەلشىسى اتاندى
استانا. KAZINFORM - سەنات ءتوراعاسى ماۋلەن اشىمبايەۆ الەمدىك جانە ءداستۇرلى دىندەر كوشباسشىلارى سەزىنىڭ ىزگى نيەت ەلشىسى بەلگىسىن تابىس ەتتى. بۇل تۋرالى سەناتتىڭ باسپا ءسوز قىزمەتى ءمالىم ەتتى.
ماۋلەن اشىمبايەۆ ديماش قۇدايبەرگەن ءوزىنىڭ شىعارماشىلىعىمەن قازاقتىڭ ۇلتتىق مادەنيەتىن دارىپتەۋگە ۇلكەن ۇلەس قوسىپ كەلە جاتقانىن اتاپ ءوتتى. پالاتا سپيكەرى ءانشىنىڭ ونەر ارقىلى بەيبىتشىلىك پەن ىزگىلىك يدەيالارىن ناسيحاتتاۋعا جانە حالىقتار مەن مادەنيەتتەر اراسىنداعى ديالوگتى نىعايتۋعا تيگىزىپ وتىرعان ىقپالىنا نازار اۋدارىپ، بۇل اسا ماڭىزدى ميسسيا ەكەنىن ايتتى. سونداي-اق ول اتالعان قۇندىلىقتار الەمدىك جانە ءداستۇرلى دىندەر كوشباسشىلارى سەزىنىڭ قاعيداتتارىمەن ۇندەس ەكەنىن تىلگە ەتتى.
- پرەزيدەنتىمىز قاسىم-جومارت كەمەل ۇلى توقايەۆ ءدىنارالىق جانە وركەنيەتارالىق ديالوگ ماسەلەلەرىنە ۇنەمى باسا ءمان بەرىپ كەلەدى. قازىرگى تاڭدا بۇكىل الەم بۇرىن-سوڭدى بولماعان جاھاندىق سىن-قاتەرلەرمەن بەتپە-بەت كەلىپ وتىر. وسىنداي جاعدايدا رۋحاني ديپلوماتيانىڭ ماڭىزى بۇرىنعىدان دا ارتا تۇسكەنى انىق. سوندىقتان بەيبىتشىلىك پەن ديالوگ مادەنيەتىن دارىپتەۋ اسا ماڭىزدى. بۇل رەتتە ءدىني، ساياسي جانە قوعامدىق كوشباسشىلاردىڭ بىرلەسكەن كۇش-جىگەرى ايرىقشا مانگە يە. وسى باعىتتا الەمدىك جانە ءداستۇرلى دىندەر كوشباسشىلارى سەزىنىڭ ىزگى نيەت ەلشىلەرى ماڭىزدى ءرول اتقارادى. ءسىز الداعى ۋاقىتتا دا ءوزىڭىزدىڭ شىعارماشىلىعىڭىزبەن جانە كرەاتيۆتى جوبالارىڭىزبەن بەيبىتشىلىك پەن كەلىسىم يدەيالارىن حالىقارالىق دەڭگەيدە ىلگەرىلەتۋگە زور ۇلەسىڭىزدى قوسا بەرەسىز دەپ سەنەمىن، - دەپ، ماۋلەن اشىمبايەۆ ديماش قۇدايبەرگەنگە سەزدىڭ ىزگى نيەت ەلشىسى توسبەلگىسىن تابىس ەتتى.
كەزدەسۋدە الەمدىك جانە ءداستۇرلى دىندەر كوشباسشىلارىنىڭ VIII سەزى مەن جاس ءدىني ليدەرلەردىڭ II فورۋمىنا دايىندىق بارىسى، سيەزد تۇجىرىمداماسىن ىسكە اسىرۋ ماسەلەلەرى جانە وسى باعىتتاعى بىرلەسكەن جوبالار تالقىلاندى.
ايتا كەتەيىك، «دىندەر ديالوگى: بولاشاق جولىنداعى سينەرگيا» تاقىرىبىنا ارنالاتىن الەمدىك جانە ءداستۇرلى دىندەر كوشباسشىلارىنىڭ VIII سيەزى 2025 -جىلعى 17-18 -قىركۇيەكتە استانادا وتەدى.
ەسكە سالا كەتەيىك، بۇعان دەيىن ايگىلى Rolling Stone جۋرنالى ديماشتىڭ حالىقارالىق بەدەلدى سىيلىقتى قالاي العانىن جازعان بولاتىن.
