ديپلوماتيالىق تۇرعىدان ءوز پوزيتسياسىن قورعاپ شىعاتىنى ۇنايدى - كسەنيا سوبچاك توقايەۆ تۋرالى
ماعان پرەزيدەنت قاسىم- جومارت توقايەۆتىڭ ءوز پوزيتسياسىن ديپلوماتيالىق تۇرعىدان قورعاپ شىعاتىنى ۇنايدى. دينارا ءساتجانعا سۇحبات بەرگەن رەسەي جۋرناليسى كسەنيا سوبچاك بىلتىر سانكت- پەتەربۋرگ حالىقارالىق ەكونوميكالىق فورۋمىنداعى مەملەكەت باسشىسىنىڭ سوزىنە قاتىستى وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
سۇحبات اياسىندا دينارا ءساتجان كسەنيا سوبچاكتان قازاقستانعا كوشۋ نيەتى تۋرالى سۇرادى. بۇل سۇراققا جاۋاپ بەرە وتىرىپ، رەسەي جۋرناليسى پرەزيدەنت قاسىم- جومارت توقايەۆتىڭ جۇرگىزىپ وتىرعان ساياساتىنا قاتىستى پىكىر ءبىلدىردى. كسەنيا سوبچاك اسىرەسە مەملەكەت باسشىسىنىڭ دونەتسكى مەن لۋگانسكىگە قاتىستى قازاقستان ۇستانىمىن بايىپتى جەتكىزگەنىن اتاپ ءوتتى.
«ءسىزدىڭ ەلدىڭ قازىرگى پرەزيدەنتى وتە مىقتى. ساياسي جارناما جاساۋدان اۋلاقپىن، بۇعان قوسا قازاقستاندا بولىپ جاتقان جاعدايلاردان جەتكىلىكتى دەڭگەيدە حاباردار ەمەسپىن. ماعان ونىڭ (ق ر پرەزيدەنتى قاسىم- جومارت توقايەۆ - اۆتور تۇسىندىرمەسى) ديپلوماتيالىق تۇرعىدان ءوزىنىڭ پوزيتسياسىن قورعاپ شىعاتىنى ۇنايدى. مەنىڭ ويىمشا، بۇل اسىرەسە رەسەيدەگى فورۋمنان كەيىن ايقىن كورىندى. مەنىڭ «سۇيىكتى» قۇربىم مارگاريتا سيمونيان ونى (ق ر پرەزيدەنتى قاسىم- جومارت توقايەۆ - اۆتور تۇسىندىرمەسى) تىعىرىققا تىرەگىسى كەلدى. ال ول: «جوق، مەنىڭ ءوز تاريحىم بار، اڭگىمەم بولەك» دەپ كەسىپ ايتتى. ماعان ەلدىڭ تاۋەلسىزدىگىن ساقتاپ، ادامداردىڭ ۇستانىمىن قورعاپ جانە ول ءۇشىن ەشكىممەن جانجالداسپاعانى ۇنايدى. بۇل ۇلكەن دانالىقتىڭ بەلگىسى»، - دەپ پىكىر ءبىلدىردى كسەنيا سوبچاك.
