ديكي ارمان ءىسى: سوت وتىرىسى جابىق رەجيمدە وتەتىن بولدى

بۇگىن الماتىدا ارمان جۇماگەلديەۆ پەن قايرات قۇدايبەرگەنگە قاتىستى قىلمىستىق ءىس بويىنشا الدىن الا تىڭداۋ اياقتالدى. الداعى سوت وتىرىستارى جابىق تۇردە وتەتىن بولدى، دەپ حابارلايدى قازاقپارات ءتىلشىسى.

الماتى قالالىق سوتىنىڭ باسپا ءسوز قىزمەتىنەن ءمالىم ەتكەندەي، سوتقا قاتىسۋشىلاردىڭ قاۋىپسىزدىگى ماقساتىندا قىلمىستىق ءىستى قاراۋ جابىق فورماتقا اۋىستىرىلدى.

سوتتالۋشىلاردىڭ جالپى سانى - 45 ادام.

«ولارعا «بيلىگىن نەمەسە لاۋازىمدىق وكىلەتتىگىن اسىرا پايدالانۋ» (قىلمىستىق كودەكستىڭ 362-بابى)، ۇيىمداسقان قىلمىستىق توپ قۇرۋ، وعان باسشىلىق ەتۋ جانە وعان قاتىسۋ (ق ك- ءنىڭ 262-بابى)، قاراقشىلىق شابۋىل (ق ك- ءنىڭ 191-بابى)، زاڭسىز باس بوستاندىعىنان ايىرۋ (ق ك- ءنىڭ 126-بابى)، 2022 -جىلعى قاڭتارداعى جاپپاي تارتىپسىزدىكتەردى ۇيىمداستىرۋ جانە ولارعا قاتىسۋ (ق ك- ءنىڭ 272-بابى)، بانديتيزم (ق ك- ءنىڭ 268-بابى) بويىنشا ايىپتار تاعىلدى»، - دەلىنگەن حابارلامادا.

اتاپ وتىلگەندەي، وتىرىس بارىسىندا پروتسەسكە قاتىسۋشىلاردان سوتتالۋشىلارعا قاتىستى بۇلتارتپاۋ شاراسىن وزگەرتۋ جانە جويۋ، قىلمىستىق ءىستى قايتارۋ جانە توقتاتۋ، جاقىن تۋىستارىن قورعاۋشى رەتىندە تانۋ تۋرالى جۇزدەن استام ءوتىنىشحات تۇسكەن.

«سونداي- اق ءىس بويىنشا 10 جابىرلەنۋشى، 1 كۋاگەر جانە 1 سوتتالۋشى سوت وتىرىسىن جابىق تۇردە وتكىزۋدى سۇرادى. ولار ءوز ومىرلەرى، وتباسىلارى مەن جاقىندارىنىڭ قاۋىپسىزدىگى ءۇشىن قاۋىپتەنەتىنىن ءبىلدىردى. بۇل وتىنىشتەردى سوت قاناعاتتاندىردى»، - دەپ ءتۇسىندىردى سوت وكىلدەرى.

باستى سوت وتىرىسى وسى جىلدىڭ 6-قازانىنا بەلگىلەندى.

ايتا كەتەيىك، ءماسليحاتتىڭ ەكس- دەپۋتاتى قايرات قۇدايبەرگەن مەن ارمان جۇماگەلديەۆكە («ديكي» ارمان) قاتىستى سوت پروتسەسى 14-قىركۇيەك كۇنى الماتى ماڭىنداعى №72 تۇزەۋ مەكەمەسىنىڭ تەرگەۋ يزولياتورىندا باستالعان بولاتىن.

كەيىن سوت پروتسەسىنە ادۆوكاتتاردىڭ كىرۋىنە كەدەرگى كەلتىرىلىپ جاتقانى تۋرالى اقپارات تارادى.

«ديكي» ارمان بىلتىر قاڭتار وقيعاسىنان كەيىن ۇستالعان بولاتىن. كەيىن باس پروكۋراتۋرا ونىڭ ۇلتتىق قاۋىپسىزدىك قىزمەتىنىڭ تەرگەۋ يزولياتورىندا وتىرعانىن ءمالىم ەتتى.

ال قايرات قۇدايبەرگەننىڭ ۇستالعانى تۋرالى اقپارات 2022 -جىلدىڭ 22-ساۋىرىندە پايدا بولدى.

قايرات قۇدايبەرگەن مەن «ديكي» ارمانعا قاڭتار وقيعاسى كەزىندە ادام جيناۋدى ۇيىمداستىردى دەگەن ايىپ تاعىلىپ وتىر.